VOV4.Xơ Đăng - Kơxo lơ 22/8, pôa Vương Đình Huệ, kăn xiâm hnê ngăn Kuô̆k hô̆i hiăng pơkuâ po Rôh hôp mơnhên tối tơdroăng pêi pro túa pơkâ kơxô̆ 81 dêi Vi ƀan pơkuâ Kuô̆k hô̆i hneăng 15 ƀă tơbleăng tơdroăng mơjiâng Luât, luât pơkâ. A rôh hôp, pôa Vương Đình Huệ tối tiah kố tơdroăng pêi pro mơgêi dêi Khu xiâm pơkuâ tơdroăng kal kí ƀă túa pơkâ dêi Vi ƀan pơkuâ Kuô̆k hô̆i vâ chê 1 hơnăm hdrối nah hiăng hlo tơƀrê khât.

Tâ tá rôh hôp

Hnoăng cheăng tơkŭm tơbleăng pêi pro tơtro, rĕng ƀă tơƀrê.

Troh nôkố, Kuô̆k hô̆i hiăng pơkâ 6 Luât, 8 tơdroăng pơkâ. Vi ƀan pơkuâ Kuô̆k hô̆i hiăng pơkâ 2 tơdroăng luât pơkâ ƀă 2 tơdroăng pơkâ. Tiô tối hdrối hneăng hôp Kuô̆k hô̆i má 4 la ngiâ kô séa ngăn 7 kơxop hlá mơéa Luât, 1 tơdroăng pơkâ ƀă séa ngăn rôh apoăng 7 kơxop hlá mơéa Luât ki ê. Kăn xiâm hnê ngăn Kuô̆k hô̆i pơkâ thế kơ koan ki ai tơdjâk malối tơmâng ngăn troh ki rơkê dêi mâu kơxop hlá mơéa Luât, rak vế tơdroăng ki rơkê ƀă mâu hnoăng cheăng mơjiâng luât ki u ối dêi hneăng hơnăm, pơtối hơ’lêh nếo túa ki veăng tơpui tối,xo rơkong tơpui dêi kuăn pơlê, pêi pro kơtăng tơdroăng pơkâ luât ƀă athế hbrâ mơdât kâ kơluâ liăn ngân, pơxúa tung khu mơjiâng luât.

Katarina Nga tơplôu ƀă tơbleăng