VOV4.Xơ Đăng - Kheăn hôu hnoăng dêi ngế ối a ko mâu tíu cheăng tâng lôi ăm ai tơdroăng hrá mơ’no liăn cheăng tơnêi têa’’, kố cho mơnhên dêi kăn hnê ngăn Viƀan kong pơlê Dak Lak a roh hôp Viƀan tiah hmâ khế 8/2022 tơkŭm po hâi lơ 13/9 drêng mơnhên tơdroăng châ tơƀrê pêi pro pơkâ mơnhông mơdêk cheăng kâ – rêh ối pơlê pơla, rak tơniăn cheăng lêng, gâk kring khế 8 po rơdâ pêi pro hnoăng cheăng khế 9 ƀă mâu khế mơ’nui hơnăm.

Viƀan kong pơlê Dak Lak hôp roh hôp tiah hmâ khế 8 hơnăm 2022

‘Na pơkâ mơ’no liăn cheăng tơnêi têa hơnăm 2022, kong pơlê Dak Lak xing xoăng ăm mâu tơdroăng tơkêa bro ƀă Kơxô̆ liăn tơniăn mung tê mơdró krâ kơvâ ƀă kŭn ƀă kơxô̆ liăn lối 3.600 rơtal liăn. Troh nôkố nếo mơ’no liăn lối 913 rơtal liăn, châ 26% pơkâ pêi. Iâ tâ tâng pơchông ƀă kơxô̆ liăn mơ’no tơdjuôm dêi lâp tơnêi têa cho lối 34%.

Klêi kơ’nâi mơnhên mâu xiâm kối chiâng hrá mơ’no cheăng, Viƀan kong pơlê Dak Lak hiăng pơkâ mơjiâng pŭn tôh pêi cheăng ƀă mâu Khu mơ’no liăn cheăng vâ séa ngăn mơhnhôk, tah lôi mâu tơdroăng pá puât, tơvâ tơvân; pơkâ mơngế ối a ko mâu khu cheăng, kơvâ cheăng pôu râng hnoăng cheăng pơtối lôi ai tơdroăng hrá mơ’no liăn cheăng.

A Sa Ly tơplôu ƀă tơbleăng