VOV4.Xơ Đăng - Pơtối Roh hôp tơdroăng luât khế 8, kơxo lơ 18/8, ƀă 100% ngế ai mâ môi tuăn, Vi ƀan pơkuâ Kuô̆k hô̆i hiăng tơbleăng ăm pêi pro Luât Pơxâu phâk liăn ƀă mâu ngế mơdât tơdroăng săm tối săm tơkêng. Luât hiăng pơkâ nhên ƀă tơdroăng mơdât tơdroăng săm tối săm tơkêng môi tiah tơdroăng săm tối, tơbleăng ‘na tơdroăng xôi ôh tá tro khât; tơdroăng tối tơdroăng ki kal séa ngăn; tơdroăng mơdât ngế teăng mâ dêi kơ koan, khu pú hên lơ ngế krê veăng săm tối săm tơkêng ƀă hía hé.

Luât pơxâu phâk liăn ƀă mâu ngế ki mơdât tơdroăng săm tối săm tơkêng tiô pơkâ, tâng kăn ƀô̆, kŏng chưk, viên chưk, mơngế ối tung khu lêng kuăn pơlê, Kŏng an kuăn pơlê, mơngế pêi cheăng ki kal pêi pro tơdroăng mơdât tơdroăng săm tối săm tơkêng drêng dế pêi tơdroăng cheăng tơnêi têa, hnoăng cheăng ƀă tơdroăng pro xôi mê ối tung tơdroăng cheăng tơnêi têa, hnoăng cheăng mê ôh tá tro pơxâu phâk tiô pơkâ dêi luât ‘na pơxâu phâk liăn ngân mê kô tro pơxâu phâk tiô pơkâ dêi luât ‘na kăn ƀô̆, kŏng chưk, viên chưk ƀă pơkâ ki ê dêi luat ai tơdjâk.

A Sa Ly tơplôu ƀă tơbleăng