VOV4.Xơ Đăng - Pơtối roh hôp tơdroăng ‘na luât khế 9, hâi kố, lơ 21/9, Viƀan pơkuâ Kuô̆k hô̆i tơpui ‘na tơdroăng tiâ tối, tơmâng xo, ‘mâi rơnêu ‘na Luât Khăm, pơlât (‘mâi rơnêu). Tơmâng xo mâu rơkong tơpui tối kăn teăng mâ Kuô̆k hô̆i a Hneăng hôp má 3, troh nôkố tơdroăng tơkêa bro luât khăm, pơlât (‘mâi rơnêu) pơkâ yă khăm, pơlât châ mơnhên tiô kơxô̆ liăn tŭm mâu tơdroăng ‘na kơxô̆ liăn mơ’no, tơtro ƀă ivá chêl ƀă mơhnhôk mơdêk ki dâi lĕm, mơnhông mơdêk kih thuât tơdroăng cheăng.

Hdrối mê, a Hneăng hôp Kăn teăng mâ Kuô̆k hô̆i pơkuâ pơla kố nah, mâu kăn teăng mâ tối, kal ai mâu troăng pêi ki phá tơ-ê, troăng pêi krê ăm tơdroăng pêi cheăng mơdró khăm, pơlât ƀă tơdroăng rôe tơmeăm khăm pơlât tơnêi têa, vâ tơniăn tơxâng pơkâ teăm tơdrêng mâu tơdroăng kal vâ khăm, pơlât ƀă mơjiâng tơdroăng ki tơxup tơbriât tơdâng tơ’mô pơla mâu tơdroăng khăm, pơlât.

Pôa Vương Đình Huệ, Kăn xiâm hnê ngăn Kuô̆k hô̆i a roh tơpui tơno

Mâu kăn teăng mâ xuân tối: tơdroăng xiâm ki pá má môi ƀă kal má môi ƀă kơvâ khăm pơlât nôkố cho tơrŭm cheăng tơnêi têa – mâu ngế krê, xua mê pơkâ thế tah lôi tơdroăng ‘’pơlê pơla pơ’lêh nếo’’ ngăn pơkeăng ƀă khăm pơlât. Xua ôh tá chiâng pơlê pơla pơ’lêh ƀă troăng mâu ngế krê mơ’no dêi liăn tơdjuôm ƀă hngêi pơkeăng rôe kơmăi kơmok khăm pơlât, ‘măn tung hngêi pơkeăng xúa klêi mê xing xoăng liăn rơkâ ăm dêi pó.

A Sa Ly tơplôu ƀă tơbleăng