Hâi lơ 20/10, Viê̆n Khoa hok kih thuât pêi chiâk deăng pêt kong Tây Nguyên (a pơlê kong kơdrâm Ƀuôn Ma Thuột, kong pơlê Dak lak) tơkŭm po Tơbâ 25 hơnăm mơjiâng ƀă tơdah xo Medái pêi cheăng ối má môi.

Viê̆n Khoa hok – Kih thuât pêi chiâk deăng pêt kong Tây Nguyên tơdah xo Medái Pêi cheăng ối má môi.

Mâu hơnăm hdrối mê hiá nah, Viê̆n khoa hok kih thuât pêi chiâk deăng pêt kong Tây Nguyên hiăng rah bro ƀlêi chiâng 15 túa hdrê kơphế vô̆i ki dâi lĕm, hên hdrê tiu, ƀơr, ca cao ki lĕm vâ pêt mơjiâng. Kố cho mâu hdrê ki xiâm tung mâu tơdroăng ki ‘mâi pêt kơphế, hơ’lêh mâu hdrê pêt a mâu kong pơlê Tây Nguyên. Pakĭng mê, viê̆n xuân djâ troăng ahdrối tung hriăn ngăn, mơnhên tối ki ai khât ‘na tơdroăng ki pêt, pêi chiâk deăng pêt kong a Tây Nguyên, bro tíu vâ mâu kong pơlê tung kơpong pêi pro mâu túa pơkâ mơnhông mơdêk pêi chiâk deăng – pêt kong. Viê̆n mơdêk tơrŭm ƀă kong têa ê, tung mê, ai tơrŭm ƀă Cuba ‘na pêt kơphế krá ton; Tơrŭm ƀă Nestle tung tŏng kum hdrê kơphế ăm kuăn pơlê ki pêi chiâk deăng.