Kơxê lơ 29/5, a Pơlê kong kân Hồ Chí Minh, Vi ƀan péa kong pơlê Hậu Giang, Bình Định, Vi ƀan pơlê kong kân Thủ Đức ƀă Khu pơkuâ Tin hok Pơlê kong kân Hồ Chí Minh (HCA) hôp khu chêh hlá tơbeăng Măng tĭng NASA a Việt Nam – Vietnam Space Week. Tiô Khu pơkuâ Tin hok Pơlê kong kân Hồ Chí Minh, kố cho roh apoăng Măng tĭng leh NASA châ pêi rpo a mâu kong têa peăng mâ hâi lo pá hdroh châu Á.

NASA cho Kơ koan pơkuâ ‘na tơƀai pơto mơngế ƀă Hbo plêng Tơnêi têa dêi Chin phuh Mih, châ mơjiâng a hơnăm 1958, pôu râng hnoăng cheăng ‘na tơdroăng rơvâ plêng xivil ƀă hriăn plĕng ‘na tơƀai pơto mơngế. Măng tĭng leh NASA a Việt Nam – Vietnam Space Week kô tơkŭm po a 3 kong pơlê, cho: pơlê kong kơdrâm Vị Thanh, kong pơlê Hậu Giang a hâi lơ 5/6 ƀă 6/6; pơlê kong kân Thủ Đức, Pơlê kong kân Hồ Chí Minh a hâi lơ 7/6; pơlê kong kơdrâm Quy Nhơn, kong pơlê Bình Định a hâi lơ 8/6 ƀă lơ 9/6/2023.

Măng tĭng leh NASA a Việt Nam mơđah tơbleăng mâu tơdroăng châ tơƀrê ƀă veăng tŏng kum dêi NASA tung tí tăng plĕng hbo plêng, hriăn plĕng khoa hok ƀă mơjiâng kŏng ngê̆ ƀă mâu troăng tơmiât pêi nếo má môi. Mâu tơdroăng kố vâ pơtâng tối ăm rơxông nếo ƀă mâu tơdroăng dêi mâu ngế ki vê tơƀai tung tơdroăng pêi cheăng ƀă tơdroăng rêh ối dêi vâi a plêng, hbo plêng. Tơdrêng amê, tối ‘na mâu tơdroăng hriăn plĕng khoa hok vâ rak vế plâi tơnêi, kơdroh pro ‘mêi kong prâi ƀă hía hé.