Tung rôh lăm pôu dêi Khu kăn xiâm Đảng Kŏng san Cuba pôu pêi cheăng a Việt Nam, kơxo lơ 4/5, Khu kăn xiâm Đảng Kŏng san Việt Nam xua jâ Trương Thị Mai, ngế cheăng tung khu xiâm pơkuâ hnê ngăn Đảng, pơkuâ djâ khu kăn kố hiăng tơpui tơno ƀă Khu kăn xiâm Đảng Kŏng san Cuba.

Teăng mâ Khu xiâm Đảng Kŏng san Việt Nam, jâ Trương Thị Mai hâk tơngăm koh tơdah Khu kăn xiâm Đảng Kŏng san Cuba pôu pêi cheăng a Việt Nam ƀă rơtế tơkŭm po Rô hôp Lĭ luâ̆n rôh má 5 pơla péa Đảng; vêh tối rơdêi tuăn tơmiât dêi Việt Nam cho tơtrâ mâu troăng hơlâ mơdât Cuba; tối loi tơngah xua tơdroăng pơkuâ dêi Đảng Kŏng san Cuba; Đảng, Tơnêi têa ƀă kuăn pơlê Cuba nhŏng o kô pêi pro ƀlêi chiâng mâu tơdroăng pơkâ Hneăng hôp rôh má 13 pơkâ mơ’no.

A rôh hôp, péa pâ tơpui tơno, mơnhên tối klêi kơ’nâi pêi pro Tơkêa tơrŭm cheăng ƀă tơpui tơno hneăng hơnăm 2018 – 2023 pơla péa Đảng, malối cho tung kơvâ tơrŭm cheăng ki xiâm môi tiah pơtroh khu râ kăn, tơpui tơno lĭ luâ̆n ƀă tơdroăng ki ai khât, hnê kăn ƀô̆, tơrŭm tối tơbleăng tơdrăng kal, hnê, tơrŭm tung mâu rôh hôp, troăng hơlâ tơrŭm cheăng lâp plâi tơnêi, tơdrêng amê hlối mơnhên mâu tơdroăng ki kal ƀă túa ki tơrŭm pơla péa Đảng tung la ngiâ, malối cho xo tơrŭm cheăng Đảng pro ivá cheăng xiâm tung tơdroăng kal kí mơdêk tơrŭm pơla péa tơnêi têa.