Klêi kơ’nâi tơpui tơno, pôa Nguyễn Xuân Phúc, Kăn xiâm hnê ngăn tơnêi têa prế pôa Joko Widodo, Kăn xiâm pơkuâ kong têa Indonesia trâm mâ khu chêh hlá tơbeăng. Péa khu râ kăn pơkuâ pơrá mơnhên hiăng ai roh tơpui tơno châ tơƀrê, môi tuăn châ hên tơdroăng xiâm tơrŭm cheăng ki kal, mơdêk tơrŭm cheăng ton xŏn pơla péa tơnêi têa. Pôa Nguyễn Xuân Phúc, Kăn xiâm hnê ngăn tơnêi têa tối ăm ‘nâi, ƀă pêi lo liăn tê mơdró pơla péa pâ châ 11,5 rơtal dollars a hơnăm 2021 pêi kêi đeăng hdrối 2 hơnăm ƀă hơnăm kố kô châ 13 rơtal dollars, péa pâ môi tuăn rĕng khŏm châ pêi lo liăn tê mơdró pơla péa pâ tâk 15 rơtal dollars.

Hơnăm la ngiâ, péa kong têa kô leh tơbâ 10 hơnăm Khu tơrŭm cheăng ton xŏn, po troăng prôk nếo tung tơrŭm péa tơnêi têa. Pôa Joko Widodo pâ thế Việt Nam pro tơ’lêi hlâu ăm tơmeăm khoăng Indonesia tê ngi tung tơnêi têa Việt Nam, ki má lối tơmeăm pêi lo ing chiâk deăng. Thăm mơnhông tơrŭm cheăng ôm hyô, tơdrêng amê thăm mơnhông mâu khu pơkuâ tơƀai péa tơnêi têa kêi đeăng tâi tâng pơkâ vâ po rơdâ troăng kơneăng nếo pơla Đà Nẵng ƀă Java ƀă thăm ăm tơƀai kơneăng pơla Pơlê kong kân Hồ Chí Minh ƀă Jakatar.

Pơtối mê, pôa Joko Widodo hiăng pơkuâ tơdah ôu kâ ƀă pôa Nguyễn Xuân Phúc ƀă khu râ kăn xiâm tơnêi têa pin.