VOV4.Xơ Đăng - Kơxo lơ 18/7 a Hà Nội po leh tơbâ 60 hơnăm hâi mơjiâng tơrŭm cheăng pơla Việt Nam - Lếo ƀă 45 hơnăm kĭ tơhrâ tơrŭm cheăng pơla péa tơnêi têa. Pôa Nguyễn Phú Trọng, Kăn xiâm pơkuâ hnê ngăn Đảng ƀă Ngế hnê ngăn Đảng, Kăn phŏ hnê ngăn kong têa Lếo Bounthong Chitmany pơkuâ ƀă ai ƀai pơchuât a leh tơbâ.

Leh tơbâ 60 hơnăm hâi mơjiâng tơrŭm cheăng pơla Việt Nam - Lếo châ ngăn cho môi tơdroăng hdró ki kal dêi tơdroăng tơrŭm cheăng kân, môi tuăn ƀă tơrŭm tơ-rôa tung tâi tâng tơdroăng cheăng pơla Việt Nam - Lếo; cho rôh péa pâ rơtế tơbâ tơdroăng khên tơnôu ton nah dêi khu tơrŭm môi tuăn tơplâ Việt Nam - Lếo, ƀă tơdroăng veăng kum khât, hdrối môi tiah kơ’nâi pơla péa Đảng, péa tơnêi têa ƀă kuăn pơlê péa tơnêi têa tung rơxông tơplâ pro tơleăng lĕm ăm péa hdroâng kuăn ngo hdrối nah ƀă tung tơdroăng mơjiâng, mơnhông ƀă kring vế tơnêi têa a tơrêm kong têa nôkố.

Kố xuân cho tơdroăng pêi pro veăng mơdêk hnê tối ăm mâu khu râ kuăn pơlê, malối cho mâu rơxông nếo dêi péa tơnêi têa ai pơxúa ƀă kal khât dêi tơrŭm cheăng pơla Việt Nam - Lếo.

Gương tơplôu ƀă tơbleăng