Mih tơhrâ hnê tối mâu tơdroăng ƀă hnê túa pêi pro ki tro má môi ăm Việt Nam vâ kơdroh iâ ƀă hlối hmâ ƀă hyôh kong prâi hơ’lêh. Mê cho tơdroăng ki Ngế xiâm ngăn ‘na pêi chiâk dêi Mih - pôa Thomas Vilsack tối a rôh trâm khu chêh hlá tơbeăng kơxê hâi lơ 19/4, a Hà Nội, drêng lăm pôu pêi cheăng a Việt Nam.

Hneăng lăm pôu tung mâu tơdroăng cheăng leh tơbâ 10 hơnăm mơjiâng tơrŭm cheăng tung tŭm tơdroăng pơla Việt Nam - Mih, vâ ‘mâi mơnhông tơrŭm cheăng pơla péa pâ, hlối pro trâu rơdâ, thăm tơrŭm krá tơdroăng tê mơdró pơla péa tơnêi têa.

A rôh trâm khu chêh hlá tơbeăng, pôa Thomas Vilsack tối nhên, tơdroăng tơrŭm cheăng pơla Mih - Việt Nam dế rế krá khât tâ nếo, malối riân sap kơ’nâi péa tơnêi têa mơjiâng tơrŭm cheăng tung tŭm tơdroăng. ‘Na tơdroăng po rơdâ rôh vâ châ tê mơdró pơla péa pâ, malối cho tung kơvâ ‘na chiâk deăng, pôa Vilsack hiăng pêi cheăng ƀă mâu kơ koan tơdjâk troh vâ tăng rôh tơ’lêi hlâu châ tê tơmeăm ăm kong têa ê mâu túa tơmeăm ki nếo ing Mih tê ăm Việt Nam ƀă ing Việt Nam tê kĕn kong têa Mih.