VOV4.Xơ Đăng - Pơtối tơdroăng hnê mơhno tê ngi kong têa ê mâu tơmeăm pêi lo ing chiâk deăng Việt Nam. Kơxo lơ 22/7, Kơ koan xiâm mơhnhôk tê mơdró (Khu xiâm pơkuâ kơmăi kơmok tê mơdró) tơrŭm ƀă mâu Khu pơkuâ tơdroăng tê mơdró Việt Nam a kong têa ê ƀă Khu pơkuâ kơmăi kơmok tê mơdró kong pơlê Dak Lak tơkŭm po roh hnê mơhno tê ngi kong têa ê plâi sầu riêng Việt Nam. Lâp tơnêi têa nôkố ai dâng 85.000 ha, kơxô̆ plâi sầu riêng rêm hơnăm vâ chê 670.000 tâ̆n.

Sầu riêng Dak Lak ki hên tê cho hiăng xo tah pơ’leăng châ kơxuô tâ tung kơtuh hngíu

Tiô tối hdrối troh hơnăm 2025 kơxô̆ plâi sầu riêng châ 1 rơtuh tâ̆n. Dak Lak ƀă Tiền Giang cho 2 kong pơlê ai ƀăng deăng ƀă kơxô̆ plâi sầu riêng ối má môi lâp tơnêi têa. Plâi sầu riêng ki hên châ tê ngi kong têa ê drêng hiăng pâ xo kloăng châ ƀă châ kơxuô lĕm mơnâ mâ ngăn tâ tung kơtuh hngíu tê tung mâu mâu kong têa Sinuâ, Đà Loan, môi iâ tê tá plâi ngi kong têa Nhuk.

A roh hnê mơhno, mâu ngế rơkê, kăn teăng mâ mâu Khu pơkuâ tê mơdró Việt Nam a kong têa Sinuâ, Đài Loan, Nhuk, Australia, Siam pơchân tối troh mâu khu tê mơdró Việt Nam ‘na mâu tơdroăng vâ châ tơrŭm cheăng ƀă mâu kơchơ tê mơdró, pơkâ ki dâi lĕm, troăng chêl liăn, troăng pơto, ƀaoh hiêm tơmeăm tê rôe ngi kong têa ê, tơleăng mâu tơdroăng ối tơvâ tơvân kô chiâng ai tung tơdroăng tê ngi kong têa ê plâi sầu riêng a kơchơ mâu kong têa ê.

A Sa Ly tơplôu ƀă tơbleăng