Sap ing hâi lơ 13 – 16/6/2023 a Đà Nẵng, Việt Nam kô pơkuâ po rôh hôp má 42 dêi Vi ƀan ASEAN ‘na Pơkuâ ngăn kong mêi khía mơhot. Hơnăm kố, ƀă hnoăng cheăng cho Kăn hnê ngăn Vi ƀan ASEAN pơkuâ ngăn kong mê khía mơhot, Việt Nam mơ-eăm mơhno hnoăng cheăng pơkuâ djâ tung ASEAN ôh ti xê tung mâu kơvâ gâk kring, cheăng kâ mê ối mơhno tối tung mâu kơvâ mơhno túa lĕm tro rêh ối pơlê pơla, ki akố cho rak vế tơniăn ăm pơlê pơla ‘na kong mêi khía mơhot.

ASEAN cho kơpong ki tơ’lêi tro mâu rôh kong mê khía mơhot, têa kân lân lu, kong tô mơdrăng, tơnêi tơdro ƀă ngo pơtôu ƀă hên ki ê. Mâu ivá mơ-eăm tung tơrŭm ASEAN ‘na rak ngăn kong mêi khía mơhot têa kân lân lu, kong tô  mơdrăng khăng khoăng hiăng kum tơ’nôm ivá kâi hbrâ ví ƀă kơdroh iâ ki ôh tá mơhúa ăm mâu kong têa ki tơrŭm cheăng; tơdrêng amê, ƀă hiâm mơno tơrŭm, mâu kong têa ASEAN xuân tơhrâ pêi pro hơ’lêh troăng ngăn ASEAN vâ chiâng kơpong ki ối a hdrối tung lâp plâi tơnêi ‘na pơkuâ ngăn kong mê khía mơhot têa kân lân lu, kong tô mơdrăng khăng khoăng ing tơpui tơno, tối ‘na ki hlê plĕng tung tơdroăng ki ai khât; xuân môi tiah veăng kum tung mâu tơdroăng ki mơ-eăm tung lâp plâi tơnêi ‘na hbrâ ví ƀă ki ôh tá mơhúa dêi kong mêi khía mơhot têa kân lân lu, kong tô mơdrăng khăng khoăng.