Hâi lơ 15/6, pơtối roh lăm pôu pêi cheăng a mâu kong pơlê peăng Tơdế tơnêi têa, pôa Đỗ Tiến Sỹ, Kăn xiâm pơkuâ Rơ’jíu Việt Nam (VOV) pơkuâ djâ khu râ kăn pêi cheăng dêi VOV pêi cheăng ƀă pôa Nguyễn Hải Ninh, Kăn pơkuâ hnê ngăn cheăng Đảng kong pơlê Khánh Hòa ƀă mâu khu cheăng ki tơdjâk troh tơdroăng tơrŭm tơkŭm po tơdroăng kal kí ƀă pơlê pơla ngê̆ thuât “Rơdêi, kro mơdrŏng ing têa kơxĭ pơlê xiâm’’.

Tơdroăng kal kí ƀă pơlê pơla ngê̆ thuât ‘’Rơdêi, kro mơdrŏng ing têa kơxĭ pơlê xiâm’’ xua Rơ’jíu Việt Nam (VOV) tơrŭm ƀă Khu xiâm pơtâng tối tơdroăng tơnêi têa, Kơ koan xiâm kal kí cheăng lêng kuăn pơlê Việt Nam – Khu xiâm pơkuâ lêng ƀă Vi ƀan kong pơlê Khánh Hòa tơkŭm po. Tơdroăng pêi cheăng ton 90 phut, tiô tối hdrối tơkŭm po a kơmăng hâi lơ 15/8/2023 a kông kơno tuk Hok viê̆n Hải quân, pơlê kong kơdrâm Nha Trang.

Kố cho tơdroăng ki kân râ tơnêi têa. Tơdroăng xiâm dêi tơdroăng pêi cheăng tơkŭm hvái ngăn tơdroăng châ tơƀrê pêi pro pơkâ Hneăng hôp má XIII dêi Đảng tung mâu kơpong têa kơxĭ, rơlố sap apoăng hneăng troh nôkố. Tơdroăng pêi cheăng ‘na kal kí – rêh ối pơlê pơla nghê̆ thuât ‘’Rơdêi, kro mơdrŏng ing têa kơxĭ pơlê xiâm’’ pơtâng hnê tối mơnhên hiâm mơno tuăn pâ têa kơxĭ trâu hơngế dêi kuăn pơlê Việt Nam; pói vâ mơnhông cheăng kâ têa kơxĭ Việt Nam, gâk kring hnoăng pơkuâ têa kơxĭ, rơlố Tơnêi têa.