Vâ kum ăm vâi hdrêng kơpong hơngế, hơngo ai tơ’nôm tơmeăm xúa hriâm kum ăm hơnăm hriâm nếo, hâi lơ 14/6, Kŏng đoân Kơ quan Rơ’jíu Việt Nam kơpong Tây Nguyên tơrŭm ƀă mâu khu tŏng kum hiăng diâp 600 kế xah pro pơklêp ăm hok tro mầm non dêi tơring Lăk, kong pơlê Dak Lak. 600 khu kế xah pơklêp pro um hngêi ƀă loăng MULA – IKEA châ pro kế loăng ki ‘răng, pik mơngiơk acrylic hleăng lĕm ƀă chá Polypropylen.

Tâi tâng kơnâ vâ chê 240 rơtuh liăn. Jâ Hoàng Thị Thắm, pơkuâ râ mâm non dêi Ƀơrô hnê hriâm tơring Lăk, kong pơlê Dak Lak tối ăm ‘nâi, tơring Lăk ai 13 hngêi trung mâm non, tung mê 12 hngêi trung tơnêi têa ƀă 1 hngêi trung ki kuăn pơlê mơ’no liăn pro xêh ƀă lối 4 rơpâu ngế vâi hdrêng, tung mê kơxô̆ vâi hdrêng cho mơngế vâi krâ hdroâng kuăn ngo châ lối 50%. Mâu kơxuô tơmeăm VOV Tây Nguyên diâp ăm, kô kum ăm vâi hdrêng ai tơ’nôm mâu tơdroăng pêi ki vâ tơmiât tuăn ngôa tung tơdroăng hriâm.