VOV4.Sêdang - Pêi pro Tơkêa tơrŭm pơla Kuô̆k hô̆i Việt Nam ƀă Kuô̆k hô̆i Lếo, kơxo 19/10, a Hngêi Kuô̆k hô̆i, Vi ƀan Khoa hok, cheăng kơmăi kơmok ƀă kŏng ngê̆ dêi Kuô̆k hô̆i Việt Nam tơrŭm ƀă Vi ƀan Tơpui kâ dêi Kuô̆k hô̆i Lếo tơkŭm po Rôh hôp ‘no tơdrêng ing troăng hyôh Internet tơpui tơno ‘na ki rơkê plĕng mơjiâng Luât vê ngăn kế tơmeăm ƀă lơgât. Kăn pơkuâ Vi ƀan Tơpui kâ dêi Kuô̆k hô̆i Lếo cho Sanya Praserth tối nhên, kơxop hlá mơ-éa Luât vê ngăn kế tơmeăm ƀă mơjiâng lơgât dế châ mơjiâng, tiô tối hdrối kô pơtroh ăm Kuô̆k hô̆i Lếo hneăng má 9 séa ngăn a Hneăng hôp má péa, vâ pơkâ tơdroăng, troăng hơlâ rak ngăn ƀă séa ngăn tơdroăng cheăng vê ngăn kế tơmeăm, lơgât châ pêi pro môi tuăn, tơtro, tơdrăng, rơkê, tơrŭm ƀă kong têa ê.

Kăn xiâm pơkuâ Vi ƀan tơpui kâ dêi Kuô̆k hô̆i Lếo rơhêng vâ châ xo mâu tơdroăng ki veăng tơpui tối sap ing ƀai hriâm ki rơkê ƀă tơdroăng ki xúa mâu ƀai hriâm ki rơkê dêi mâu kong têa ki ê tung lâp plâi tơnêi tung mơjiâng, pêi pro Luât vê ngăn kế tơmeăm ƀă lơgât dêi Kuô̆k hô̆i Việt Nam.

Katarina Nga tơplôu ƀă tơbleăng