VOV4.Bahnar - Tơ drong tơ chơ̆t 05 đơ̆ng Khŭl chĕp kơ̆l pơ gơ̆r Đảng bộ apŭng Lắk, dêh char Dak Lak găh “ kơ dră chĕp kơ̆l jang kiơ̆ tơ plih trong jang ‘long pơ tăm, kon tơ rong jăl jang 2021-2025”, đơ̆ng rŏng vă jê̆ 1 sơ năm jang kiơ̆ hlôi pơm tơ drong hơ iă jrŭ să, pơ̆ih ăn trong jang tơ jur dơ nuh hin ăn kon pơ lei kon kông tơ̆ tơ ring mơ mat tat dêh hloh âu.

Tơ drong ƀôh hơ iă đơ̆ng Tơ drong tơ chơ̆t 05 Đảng bộ apŭng Lắk, dêh char Dak Lak ‘noh jĭ hơ vơn pơ đĭ khŭl jang chĭnh trĭ đơ̆ng apŭng truh pơ lei, pơ la vang mơ̆t jang. Kang ƀô̆, đảng viên vang jang hơ dai, hăm jơ hngơ̆m đon jang tơ năp “ jê̆ kon pơ lei, yua kơ kon pơ lei, vei lăng ăn kon pơ lei”. Ưh kơ iŏk yua jên jang teh đak, lơ̆m apŭng hơ vơn tơ drong tơ gop đơ̆ng kang ƀô̆, đảng viên; rim anih jang, anih mơ dro sa pơm ‘nhŏng oh hăm pơ lei bơ ngai kon kông tơ gop jên răt kơ hrĕng rơ bâu tơ nơm ‘long hơ drĕch asong ăn rim ŭnh hnam dơ nuh hin; pơ tho ki thuơ̆t pơ tăm, vei lăng. Kơ tă lơ̆m sơ năm blŭng jang kiơ̆, apŭng Lắk jang pran kơ tang lơ̆m tơ plih ‘long pơ tăm, tơ ƀĕnh tơm ‘long tơ̆ teh hoh.

Tơ̆ plei Dơ Tu, xăh Buôn Triết, apŭng Lắk, dêh char Dak Lak, dôm pơ gar hoh teh kơ dăng, dôm groi kông hŭt hoh dang ei hlôi đei tơm ‘long yua kơ rim hnam hlôi đei asong ăn ‘long, pơ tho ki thuơ̆t pơ tăm vei lăng lăp. ‘Nhŏng Y Jony Byă, oei tơ̆ plei Dơ Tu, xăh Buôn Triết, apŭng Lắk, chhôk hơ iă yua kơ hlôi tom pơ tăm hơ lam dôm jĭt tơ nơm ‘long mit thái hơ drol pơ yan ‘mi sơ năm ‘nâu hlôi jing ‘lơ̆ng tơ̆ 4 sao pơ gar: “Unh hnam nhôn tôch bơ nê kơ apŭng, xăh hlôi ăn hơ drĕch ‘long sa plei vă tơ plih ‘long pơ tăm lơ̆m teh mir nhôn kiơ̆ tơ drong jang pơ tăm hơ lam. Unh hnam gô hơ drin vei lăng vă hơ tŏk tơ iung dơ̆ng mŭk drăm găh ‘long sa plei, ƀrư̆ ƀrư̆ đơ̆ng ‘noh klăih đơ̆ng dơ nuh hin.”

Bí thư Apŭng Võ Ngọc Tuyên asong ‘long hơ drĕch ăn kon pơ lei xăh Buôn Triết

Tơ̆ xăh Yang Tao, apŭng Lắk, pơ gar ‘long mit thái pơ tăm hơ lam kơ ƀok Y Gham Triết, oei tơ̆ plei Phốk ckŭm hlôi chăt rơh bluh jing ‘lơ̆ng đơ̆ng rŏng khei ‘năr pơ tăm. Y Gham tơ băt, ưh khan lăp đei asong ăn dôm jĭt tơ nơm ‘long hơ drĕch, kang ƀô̆ apŭng, xăh oei năm truh tơ̆ pơ gar pơ tho trong pơ tăm păng vei lăng kơ na ‘long bluh jing ‘lơ̆ng. Hlôh ‘lơ̆ng đei tơ drong tơ plih ‘long pơ tăm lăp, ƀok Y Gham Triết tơ chĕng vă jang pơ yan ‘mi âu gô pơ tăm ‘long tơ ƀĕnh pơ gar hŭt hoh lơ sơ năm: “Unh hnam nhôn kŭm đei xăh asong ăn ‘long pơ tăm. Ĭnh bơ nê kơ teh đak hlôi tơ gŭm. Ĭnh ‘meh vă Teh đak asong ăn dơ̆ng ‘long vă inh pơ tăm thim lơ̆m pơ gar ‘nâu, hơ drin hơ tŏk tơ iung mŭk drăm”.

Dôm ‘long hơ drĕch ưh kơ hoach jên tơ gŭm unh hnam dơ nuh hin

        Ƀok Nguyễn Văn Huyên, Bí thư Đảng xăh Yang Tao, apŭng Lắk, tơ băt, dang ei lơ̆m xăh hlôi asong hloh 7.000 tơ nơm ‘long sa plei ‘noh đei mit thái, gao, mit koan ăn kơ 1.473 ŭnh hnam dơ nuh hin. Kŭm hăm ‘noh, tơ ring hlôi pơ jing 22 tơ drong jang pơ tăm mit thái tơ̆ 11 pơ lei kơ xăh vă kon pơ lei hŏk pơ hrăm; hơ nơ̆ng krao hơ vơn rim anih jang pơm ‘nhŏng oh, bơ ngai đei jơ hngơ̆m đon ‘mêm mơ nat răt dơ̆ng ‘long hơ drĕch vă tơ gŭm kon pơ lei: “Nhôn hlôi hơ len lăng pơ đĭ hơ găt teh lơ̆m tơ ring hơ drol sơ̆ kon pơ lei ưh kơ gan jang. Nhôn athei kon pơ lei mă hơ drol choh hơ met ming dơ̆ng pơ gar kơ dih, vă hơ met ăn tơ plih trong jang kon tơ rong, ‘long pơ tăm kiơ̆ Tơ drong tơ chơ̆t 05. Đơ̆ng rŏng kơ pơ gơ̆r tơ roi tơ băt, nhôn hlôi hơ vơn kon jên tơ gŭm đơ̆ng đĭ đăng rim khŭl jang, anih mơ dro sa, kŭm nhen kơ dih kang ƀô̆, đảng viên lơ̆m tơ ring vang tơ gop. Hăm xăh nhôn krao hơ vơn, tơ gop hloh 10 triệu hlak jên vă răt hơ drĕch mit thái. ‘Long mít ‘noh jĭ vă sut pơ ngot tơ jur dơ nuh hin ăn kon pơ lei lơ̆m jăl jang truh”.

Kon pơ lei pơ tăm ‘long sa plei

        Lắk ‘noh jĭ apŭng đei kơ sô̆ ŭnh hnam dơ nhuh hin dơ̆ng mă 2 kơ dêh char Dak Lak hăm hloh 27%. Lơ̆m noh, tơ̆ 90 pơ lei kon kông oei lê̆ “ pơ gar hoh, hnam hoh”, hơ nhăk truh tơ drong jang sut pơ ngot tơ jur dơ nuh hin oei lơ mơ mat tat. Ƀok Võ Ngọc Tuyên, Bí thư apŭng Lắk tơ băt: Đơ̆ng rŏng vă apŭng 1 sơ năm tơ lĕch jang kang ƀô̆, đảng viên rim tơ ring hlôi krao hơ vơn, pơ jao asong đei hloh 100 rơ bâu tơ nơm ‘long sa plei rim kơ loăi, lơ̆m noh găh lơ ‘noh mit thái, sầu riêng, kam, krô̆i, pơ ŏ, ôi, gao đei kơ jă hloh 2 ti hlak jên. Vă jê̆ 10.000 unh hnam dơ nuh hin hlôi đei iŏk ‘long hơ drĕch tơ gŭm păng kon pơ lei hlôi tơ plih ‘long pơ tăm, pơ tăm tơ ƀĕnh đei hloh 200 hek tar teh hoh, teh hŭt hơ chăng. “Tơ drong tơ chơ̆t tơ lĕch ăn tôch kơ đei yua tơ pă păng đei tơ drong păr ang tôch kơ tih. Truh jơ pơ nĭt âu apŭng Lắk tam mă yua jên jang teh đak, truh dang ei nhôn hlôi hơ vơn rim anih jang pơm ‘nhŏng oh asong ‘long ăn rim pơ lei đei pơm ‘nhŏng oh. Lơ̆m khei ‘năr tôch kơ đeh đơ̆ng 5/3 truh dang ei hlôi pơ tăm đei hloh 100 rơ bâu tơ nơm ‘long hơ drĕch rim kơ loăi. Tơ ƀôh đei tơ drong ‘mêm, jang tơ năp đơ̆ng Đảng, teh đak hăm kon pơ lei, mă loi ‘noh jĭ kon pơ lei kon kông”.

        Tơ drong tơ chơ̆t kơ sô̆ 05 đơ̆ng Khŭl chĕp kơ̆l pơ gơ̆r Đảng bộ apŭng Lắk, dêh char Dak Lak đei tơ lĕch jang hlôi tŏk bŏk iŏk đei tơ drong drơ̆ng lăp tơ gŭm lơ đơ̆ng kang ƀô̆, đảng viên păng kon pơ lei. Đơ̆ng noh tơ gop pơm tơ drong tơ plih lơ̆m trong tơ chĕng trong jang đơ̆ng kon pơ lei tơ̆ rim pơ lei pơ la, hơ dai hăm ‘noh pơ trŭt jang sa, pơ̆ih ăn trong tơ jur tơ jur dơ nuh hin kơ jăp tơ̆ tơ ring ‘nâu.

            Tuấn Anh: Chih

            Thuem: Tơ blơ̆