Jơ sŏng sa tơ̆ kơ ‘năr dơ̆ng, hơnih tĕch por sŏng Lê Na, tơ̆ plei Akŏ Dhông, pơlei tơm Buôn Ma Thuột, dêh char Đắk Lắk mơ sưt tơmoi mơ̆t lĕch. Lăp đơ̆ng 40 rơbâu hlak jên, tơmoi gơh rơih 3 – 4 tơmam sa, đei bơ̆n ‘nhĕm, ka, tơmam sao, tơmam ƀuh, tơmam tŭl păng ‘nhot. Tơdrong gĭt kăl ‘noh jĭ đĭ đăng dôm tơmam sa tă kơ pai kiơ̆ trong joăt kơ bơngai Ê Đê, tăh bơ̆n ƀoh ngot păh lăp, ‘lơ̆ng hơdrô̆ yua đơ̆ng hiơ̆ păng tăng. ‘Nao krao por sŏng hăm ‘nhot pro har, hla ƀlang sao, ‘nhĕm ‘nhŭng ƀuh hrâu hăm ƀoh hơmrĕ, ‘nhŏng Lê Vạn Tiếp, oei tơ̆ phường Ea Tam, pơlei tơm Buôn Ma Thuột tơroi, sư hơnơ̆ng năm sŏng tơ̆ kơ ‘năr dơ̆ng tơ̆ âu.

“Hơdrol ki ĭnh lăp đei sa tơmam sa âu ƀơ̆t năm tơ̆ dôm pơlei pơla, 1,2 ‘măng et sa. Ƀơ̆t lăp ‘meh sa ‘noh chă pai kơdih mă lei sa ưh kơ ‘lơ̆ng nhen thoi bơngai kon kông đe sư pai. Mă hrei ‘nâu ‘noh ĭnh ƀôh tơ̆  Buôn Ma Thuột đei 1,2 hơnih tĕch por sŏng anih jang đei dôm tơmam sa ‘lơ̆ng hơdrô̆ ‘noh lơ̆m hơnăn tơmam sa tĕch ăn tơmoi sŏng sa ƀôh tôch kơ hơiă, dôm tơmam sa tôch kơ ‘lơ̆ng, đei lơ tơdrong rơih iŏk hloh.”

Kiơ̆ kơ mŏ H Rul Niê, tơ ‘ngla hơnih tĕch por Lê Na, gơnang đơ̆ng tơmam đei lơ đơ̆ng pơlei pơla, hơnăn tơmam lơ, hơnih tĕch por roi ‘năr roi sơng đei tơmoi. Đơ̆ng rŏng khei ‘năr kơđeh, hơnih tĕch mơdro hlôi đei 3 hơnih tĕch lơ̆m plei Akŏ Dhông, pơih tĕch đơ̆ng 10jơ - 22jơ rim năr.

“‘Meh sa tơmam sa kiơ ‘noh tơmoi chih lơ̆m hla ar đang kơ ‘noh pơm pai kiơ̆ ‘meh vă đơ̆ng tơmoi, mă loi ‘noh jĭ hla ƀlang, ‘nhot hơte, ‘nhot pro har, ka kro, tơneh tŭl, ‘nhot tăng hnet, plei kơnôk....Ĭnh iŏk răt đĭ đăng dôm kơloăi ‘nhot đơ̆ng bơngai Ê Đê kiơ̆ pơyan”.

Đơ̆ng hơnih lăp pai sa pơyua ăn dôm ‘măng et sa dăh mă kiơ̆ pơkă đơ̆ng dôm khŭl tơmoi tơmang lăng, đơ̆ng blŭng sơnăm truh dang ei, lơ ŭnh hnam lơ̆m plei Akŏ Dhông hlôi tơplih jing tĕch por sŏng anih jang. Dôm tơmam sa mă hlôi tôch kơ hmă lơ̆m dôm pơlei pơla, dang ei jing tơmam sa ‘lơ̆ng gơ̆t jơ̆ng tơmoi sŏng sa. Mŏ H Minh Byă (mĕ Jay), tơ ‘ngla hơnih tĕch Mnga Tăng Bi, tơ̆ plei Akŏ Dhông tơroi, dôm tơmam sa đei tơdrong hơmet ăn mă lăp hăm lơ lap tơmam sa.

“Tơmoi kŭm lơ dêh, dang ei pai kŭm lơ. Ĭnh pai kiơ̆ trong kơ bơngai Ê Đê, đei pai lăp ai, ưh kơ hơ̆, ư̆h kơ tăng, lơ lăp ăn kơ bu kŭm gơh sa ngăl. Tơmam sa ‘noh lơ tơmam dêh kơna ĭnh akŏm, năr hơyơ kŭm tơplih tơmam sa, mưh đei tơmam hơyơ ‘noh ĭnh pai tơmam ‘noh.”

Ưh khan lăp tơ̆ pơlei tơm Buôn Ma Thuột, por anih jang hăm ‘lơ̆ng hơiă tơmam sa Ê Đê kŭm hlôi đei ƀôh tơ̆ thị xã Buôn Hồ. ‘Nhŏng Lê Thanh Vinh, tơmoi truh đơ̆ng pơlei tơm Hồ Chí Minh akhan, tơmam sa kŭm jing trong vă kon pơlei tơring roi tơƀôh tơdrong joăt ‘lơ̆ng hơiă.

“Ĭnh tơchĕng akhan hăm tơdrong hơiă đơ̆ng dôm tơmam sa kơ bơngai Ê Đê ‘noh kŭm jing 1 tơdrong hơiă vă sơng đei tơmoi tơmang lăng tơ̆ lơ tơring truh hăm dêh char Đắk Lắk. Yua kơ tơmang lăng ‘noh ‘ngoăih kơ cham char ‘lơ̆ng ‘noh tơmam sa kŭm jing 1 hơnih ‘lơ̆ng tơchơ̆t 1 păh hơ yơ ‘noh lơ̆m rơih iŏk đơ̆ng tơmoi lăng.”

Ưh kơ kăl athei gô truh et sa dăh mă năm tơ̆ dôm pơlei hơtăih hơtŏ, dang ei tơmoi truh tơ̆ Đắk Lắk gơh ƀônh sa tơmam sa joăt joe kơ bơngai Êđê kơtă hloi tŏk bŏk pơlei tơm Buôn Ma Thuột. Dôm kơ suơ̆t por anih jang hlôi ăn lơ tơmam sa đơ̆ng pơlei pơla lơ̆m tơdrong arih sa ‘nao, jing tơmam sa ‘lơ̆ng pơyua ăn lơ lap kon pơlei păng tơmoi hăm kơjă lăp hăm kon pơlei.