Lơ̆m hnam “Tơgoăt 1 jơhngơ̆m đon lĭnh kon pơlei” ‘nao đei man asong ăn, ƀok Y Huê Êban oei tơ̆ plei Niêng 1, xăh Ea Nuôl, apŭng Buôn Đôn chơt hơiă tơroi, đơ̆ng năr đei hnam ‘nao ‘lơ̆ng, ŭnh hnam ưh kơ pă bơngơ̆t tơdrong pĕng tŏ, tơjră ‘mi hngăt. Jơhngơ̆m jăn sư kŭm đei tơplih ‘lơ̆ng, jang đei lơ tơdrong, ŭnh hnam đei dơ̆ng iŏk yua. Ƀok bơnê kơ đe ‘nhŏng ƀô̆ đô̆i hlôi man hnam asong ăn ŭnh hnam: “Hơdrol sơ̆ hnam oei ‘mi ‘noh hngăt, tŏ ‘noh hŭl hang, dang ei tơring bơngơ̆t truh tơgŭm man hnam ‘lơ̆ng ‘noh chhôk hơiă dêh. Ĭnh gô hơdrin jang sa vă hơtŏk tơiung, kŭm hăm kon pơlei lơ̆m pơlei  tơgop vei sơđơ̆ng tơpôl.”

Kiơ̆ kơ ƀok Y Kim Êban, bơngai pơgơ̆r pơlei plei Niêng 1, ƀô̆ đô̆i mă ƀok Y Huê tơroi truh ‘noh jĭ kang ƀô̆, khŭl lĭnh anih jang K864 (Hơnih vei lăng tơmam yua khŭl lĭnh, Anih jang vei lăng Ki thuơ̆t). ‘Nâu kŭm jing anih pơm ‘nhŏng oh hăm Plei Niêng 1 đơ̆ng lơ sơnăm ‘nâu. Tơdrong tơgŭm pơm hnam ăn ŭnh hnam dơnuh hin hlôi hơtŏk dơ̆ng tơdrong ‘lơ̆ng vă dôm ŭnh hnam hơdrin jang tŏk. “Tơdrong ‘mêm đơ̆ng lĭnh hăm kon pơlei đe sư tôch kơ ‘lơ̆ng, truh năm ngôi apĭnh jet gia, tơroi băl dôm tơdrong hlôh vao vă kon pơlei hơtŏk tơiung mŭk drăm. Pơlei pơla nhôn tôch kơ chhôk păng ‘nă hal. Mă loi ‘noh dôm ŭnh hnam dơnuh hin đe sư hơdrin hơtŏk tơiung mŭk drăm vă đơ̆ng rŏng âu kơsô̆ ŭnh hnam dơnuh hin roi ‘năr roi tơjur lơ”.

Jĭ anih jang pơm ‘nhŏng oh hăm Plei M’riu, xăh Cư Huê, apŭng Ea Kar, dêh char Đắk Lắk, 20 sơnăm âu ki, kŏng ti Ŭnh điên Đắk Lắk hlôi tơgop ưh kơ iĕ lơ̆m tơplih um ai tơring tơrang tơ̆ âu. Đơ̆ng 1 pơlei dơnuh hin, athei iŏk tơgŭm phe lơ̆m pơyan ƀa pơtai hoăt, ‘noh dang ei, kơsô̆ ŭnh hnam dơnuh hin lăp oei pă 10%. Lơ ŭnh hnam lơ̆m pơlei hlôi man đei hnam, răt đei gre kŏng nŏng, kơmăy tơruih pơyua ăn jang sa. Kiơ̆ kơ ƀok Trần Văn Thuận, Kơdră vei lăng kŏng ti Ŭnh điên Đắk Lắk, lăng kiơ̆ lơ̆m trong tơlĕch jang pơm ‘nhŏng rim sơnăm, Anih jang Đảng kơ kŏng ti hlôi klăih song hơnăp jang hăm rim khŭl jang, khŭl tơpôl, chi bộ jang hơdai hăm dôm anih jang pơm ‘nhŏng oh vă tơlĕch jang kiơ̆ đei yua tơdrong jang ‘nâu. “Kiơ̆ tơdrong jang pơm ‘nhŏng oh ‘noh anih jang hlôi tơlĕch ăn lơ trong vă jang rim sơnăm tơgŭm vei sơđơ̆ng tơdrong arih sa tơpôl păng bơngơ̆t truh dôm ŭnh hnam teh đak tơgŭm, ŭnh hnam mơmat tat vă tơgŭm dôm ŭnh hnam hơtŏk tơiung mŭk drăm. Hăm plei M'riu ‘noh dôm tơdrong mơmat tat tơ̆ anih jang hlôi băt hơdăh păng tơlĕch lơ trong jang tơgŭm ‘lơ̆ng hăm kon pơlei kŭm nhen tơdrong pơjing pơlei arih sa ‘lơ̆ng hơiă.”

Jang kiơ̆ trong tơlĕch jang đơ̆ng Anih jang Đảng dêh char Đắk Lắk găh tơdrong jang pơm ‘nhŏng oh hăm dôm pơlei bơngai kon kông, truh dang ei, Đắk Lắk đei vă jê̆ 200 anih jang, anih mơdro sa kơ dêh char pơm ‘nhŏng oh hăm dôm pơlei pơla. Ƀok Nguyễn Đình Trung, bơngai jang lơ̆m Trung ương Đảng, Bí thư Anih jang Đảng dêh char Đắk Lắk tơbăt, hăm tơdrong tơgŭm ‘lơ̆ng đơ̆ng dôm anih jang pơm ‘nhŏng oh, tơdrong arih sa, tơmam drăm păng jơhngơ̆m đon đơ̆ng kon pơlei kon kông đei pơm ‘nhŏng oh hlôi tơplih ‘lơ̆ng lơ. Tơ̆ hơnăp kơnh, Anih jang Đảng dêh char Đắk Lắk gô hơnơ̆ng tŭn pran bơ̆jang kiơ̆ tơdrong jang pơm ‘nhŏng oh hăm dôm pơlei bơngai kon kông vă tơgop sut pơngot tơjur dơnuh hin, hơmet ming grŭp tơgoăt pôm nơ̆r ƀơ̆r đon hơdrĕch hơdrŭng, hơdrin pơjing Đắk Lắk roi ‘năr roi pơdrŏng ‘lơ̆ng- hơgei- hơiă. “Dôm anih jang pơm ‘nhŏng oh hăm dôm pơlei gơh tơroi bơ̆jang kiơ̆ hơnăp jang, đei dôm jơnei ‘lơ̆ng păng iŏk đei ‘meh vă, hơgăt tơlĕch ăn. tơdrong arih sa kơ kon pơlei tơ̆ tơring hơtăih hơtŏ đei dôm tơdrong tơplih rơđăh ‘lơ̆ng păng tơdrong vang tơgŭm, tơdrong 1 jơhngơ̆m đon đơ̆ng dôm hơdrĕch hơdrŭng vang hơdai băl pơjing dêh char Đắk Lắk pơdrŏng ‘lơ̆ng rŏ.”

Gơh ƀôh thoi âu, dôm tơdrong hơiă, tơklep hăm yan âu tơ̆ tơring, tơdrong jang pơm ‘nhŏng oh pơlei pơla tơ̆ Đắk Lắk hlôi hơnhăk ăn iŏk yua ‘lơ̆ng, tơgop gĭt kăl lơ̆m hơtŏk tơiung mŭk drăm- tơpôl, pơjing hơmet ming khŭl jang chĭnh trĭ tơring, vei sơđơ̆ng chĭnh trĭ, sơđơ̆ng tơpôl păng pơm kơjăp dơ̆ng tơdrong 1 jơhngơ̆m đon đơ̆ng dôm hơdrĕch hơdrŭng.