‘Nao vơ̆r gre kŏng nŏng chă chơ ‘nhik tơgăk jang sa đơ̆ng mir brŏk tơ̆ hnam, ƀok Lương Văn Hợp oei lơ̆m pơlei O Pêch, tơring Ia Pêch, apŭng Ia Grai chơt hơ iă tơbăt, jăl trong hloh 10km tơƀư̆h năm trŭh tơ̆ tơring Ia Tô tŏk bŏk pơm vă jê̆ keh đang. Trong pơm keh đang koăng lơloh, mĭnh păh gơnơm 47 ŭnh hnam chă plang ăn teh, yuih pơgar, koh bŭch ‘long pơtăm vă pơih să trong nơnăm:“Ba plang ăn 60 dơnơm, koh hloi 60 sơnơm chehphe, teh pơchăh hloi dur pơgar vă pơm trong ăn kon pơlei chă mơdro sa, chă yơ yak, ăn kôn mon kon sou đơ̆ng rŏng ou kơnh. Ba ƀôh ‘nou jĭ tơdrong trŏ lăp hloh”.

‘Moi kiơ̆ trong ou ‘noh jĭ dôm ‘long pơtăm gĭt kăl đei iŏk yua kơjăp nhen chehphe, ‘long sa plei. Ƀok Nguyễn Trọng Túc oei tơ̆ pơlei O Pêch, tơring Ia Pêch, tơbăt, mưh đei kang ƀô̆ chă hơvơn plang ăn teh, ƀok hăm kon pơlei hơnơ̆ng tơchĕng ‘ma ‘ngieo kơ yuơ tơ hiong tŏ sĕt ‘long pơtăm. Mă lei đei kang ƀô̆ chă pơrô̆ pơrôp, tơdrong pơm trong ou đei iŏk yua ‘lơ̆ng hơ iă ăn kon pơlei 2 tơring, tơgŭm ăn chă yơ yak, chơ tơmam drăm choh jang sa rơvơn, ŭnh hnam ƀok jei drơ̆ng nơ̆r:“Ŭnh hnam  nhôn jei plang teh găh vơl să 1 met 5, tor 100 met. Tơ̆ hơgăt teh uo đei mĭnh rĕng ‘long tơƀăr păng 60 dơnơm chehphe. Hơdrar teh nhôn,‘noh ŭnh hnam ƀok Nghiêm jei polang ăn mĭnh rĕng mit Thái tŏk bŏk plei. Kon pơlei đei trong ‘lơ̆ng chă yak hiôk hian tơpă mơ̆n”.

Tơ̆ tơring Ia Khai, apŭng Ia Grai, trong sơlăh năm truh tơ̆ tơring Ia Krái jei tŏk bŏk ming man, lơ̆m ou kon pơlei plang ăn teh vă lang să. Yă Nguyễn Mai Lương, Kơdră chĕp pơgơ̆r Hơnih vei lăng kon pơlei tơring Ia Khai tơbăt, đơ̆ng sơnăm 2023 truh dang ei, đei hloh 100 ŭnh hnamn plang ăn teh vă pơm vă jê̆ 20km trong nơnăm pơlei pơla, tơring tơrang, trong năm tơ̆ mir na jang sa:“Lơ ŭnh hnam tim gan hlôh vao kơna oei drơ̆ng drơ̆t. Pơrô̆ bơ̆ jang pơrô̆ pơrôp, Hơnih Đảng, Hơnih vei lăng kon pơlei tơring hlôi pơgơ̆r hop akŏm, hơvơn rim kră pơlei, ƀĭ thư chi ƀô̆, mĭnh ƀar ‘nu bơngai đei kon pơlei lui yom vă pơjing khul chă pơrôp hăm rim ŭnh hnam ou. Tơdăh năr ou đe sư tim hlôh vao ‘noh năr dơning nhôn năm dơ̆ng”.

Tơ̆ apŭng Dơnuh sơlam teh đak Ia Grai, mưh tơlĕch jang rim tơdrong jang pơm trong nơnăm, khul kơdră tơƀơ̆p lơ tơdrong tơnap tap găh kon jên hrŭ ăn teh. Kơ yuơ lơ loh, pơđĭ khul chinh trĭ hlôi pơrô̆, hơvơn kon pơlei vang iung jang. Đơ̆ng sơnăm 2022 truh dang ei, hlôi đei rơbou ŭnh hnam plang ăn mơjĭt rơbou met vuông teh pơm vă jê̆ 60km trong nơnăm tơ̆ rim tơring Ia Pêch, Ia Yok, Ia O, Ia Krăi.

Ƀok Nguyễn Văn Hà - Hơnih pơrô̆ pơrôp kơ Dơnŏ anih Đảng apŭng Ia Grai tơbăt, khei 10/2023, Khul Kơdră chĕp pơgơ̆r Đảng apŭng Ia Grai hlôi pơjing Tơdrong tơchơ̆t kơsô̆ 15 găh atŏk kơtang tơdrong chĕp pơgơ̆r đơ̆ng đảng hăm bơ̆jang pơrô̆ hơvơn plang ăn teh vă pơm trong nơnăm lơ̆m tơring truh sơnăm 2030. Đơ̆ng mă đei Tơdrong tơchơ̆t, rim hơnih đảng, khul kơdră chĕp pơgơ̆r rim tơring jei pơjing khul chĕp pơgơ̆r găh pơrô̆ pơrôp plang ăn teh pơm truh, trong tơlĕch jang truh sơnăm 2030 pơ̆ih să hloh 600km trong nơnăm:“Hơdrin truh sơnăm 2025, lơ̆m apŭng gô chă pơrô̆ hơvơn kon pơlei pơ̆ih să trong nơnăm tơ̆ tơring, koeng kơphô̆. Tơdrong tơm kơ Tơdrong tơchơ̆t kơsô̆ 15 ‘noh pơjing đei tơdrong tơplih kơtang hloh găh trong nơnăm pơlei pơla lơ̆m apŭng truh sơnăm 2030 sơđơ̆ng ăn tơdrong ‘meh vă chă yơ yak hiôk hian kơ kon pơlei, pơjing hơyak pran ăn truh sơnăm 2030, apŭng Ia Grai iŏk đei jing tơring tơrang ‘nao”.

Trong tơlĕch jang găh pơrô̆ pơrôp kon pơlei plang ăn teh pơm trong tơ̆ apŭng Ia Grai hlôi đei tơmơ̆t lơ̆m Tơdrong tơchơ̆t, tơlĕch jang truh tơring păng sơng iŏk đei tơdrong lăp đon đơ̆ng kon pơlei. ‘Nou jĭ hơyak kăl hloh vă apŭng tĕnh koăng pơm keh đang trong nơnăm, pơjing jơhngơ̆m pran atŏk tơ iung mŭk drăm-tơpôl tơ̆ tơring sơlam teh đak Gia Lai.