Pơyan pơdơh hŏk sơnăm ‘nâu, hơnơ̆ng đơ̆ng pơgê năr Mônh truh năr Đăm lơ̆m giĕng, 40 ‘nu oh iĕ đei tơdrong arih sa mơmat tat tơ̆ plei Trol Đeng, thị trấn Chư Ty, apŭng Đức Cơ ‘noh chơt iă truh hăm lăm hŏk pơgia kơtă hloi tơ̆ hnam trưng pơlei. Mă đơ̆ng đe oh iĕ 6 sơnăm dăh mă đe ‘nhŏng đe mŏ ‘lŏ 10 sơnăm, kŭm tă kơ chơt hơiă hăm hla ar, ‘long chih păng dôm jơ hŏk hơdai hăm dôm jơ pơngôi. Oh Rơ Mah H’xiêu, 7 sơnăm, plei Trol Đeng, thị trấn Chư Ty, apŭng Đức Cơ, tơroi. “Kon hŏk lăm 2, năm hŏk đei ngôi pơchơt, kô pơtho kon đŏk ƀai, kon năm hŏk he ƀôh chơt dêh”.

Oei oh H’Nhi Ê Ban, 10 sơnăm ƀôh mơn kơ băt ƀiơ̆ ƀơ̆t đei vang truh tơ̆ lăm hŏk. “Sơnăm ‘nâu oh tŏk lăm 5, năm hŏk ƀôh tôch kơ chơt, đei mơ̆ng kô pơtho ƀai, kon tôch kơ ‘meh năm hŏk he nhen thoi ‘nâu”.

Kô Nông Ngọc Huân, (kô pơtho Hnam trưng hŏk jăl 3 Lê Hoàn, apŭng Đức Cơ) ‘noh jĭ 1 lơ̆m dôm thây kô năm jang tơgŭm pơtho hŏk he ăn kơ hơioh iĕ plei Trol Đeng. Tơ̆ âu, kô pơtho ăn kơ hŏk tro iĕ tơ̆ âu đơ̆ng chih chư, pơhrăm đŏk truh pơm dôm ƀai toan ƀônh. Kô Nông Ngọc Huân tơroi, kơdih ƀôh tôch kơ chơt hơiă ƀơ̆t đe oh iĕ tơring mơmat tat păi ƀiơ̆ kiơ̆ rim jơ hŏk.“Đe oh mơ̆t lăm 1 đe kô lăng truh pơtho đe oh đŏk păng chih, hơdai hăm pơtho dơ̆ng ăn kơ đe oh 1,2 tơdrong hlôh vao gơh băt lơ̆m tơdrong arih sa. Đe oh ‘lŏ ƀiơ̆ ‘noh gơh đŏk, chih ‘lơ̆ng ƀiơ̆, mă lei vă đe oh pơ̆n păng nuih ‘noh đe kô gô đei dôm ƀai pơhrăm hơdrô̆, đei dôm tơdrong jang vă kơ đe oh gơh pơhrăm dơ̆ng tơdrong băt hơrih. Ƀôh đe oh ‘net ƀiơ̆ tôch kơ lơ, chơt ƀiơ̆, vang jang dôm tơdrong jang tôch kơ ‘lơ̆ng”.

Kiơ̆ kơ kô pơtho Lê Thị Xuân, đoàn viên Khŭl hơdruh tơdăm thị trấn Chư Ty, apŭng Đức Cơ, mă đơ̆ng tơdrong hiôk kơ ƀăh kơ ƀôch, athei năm hŏk hăm ‘năr ‘mi kial mă lei đe oh oei tôch kơ pơnam truh tơ̆ lăm. Lăm hŏk he ưh kơ hoach jên tơ̆ plei Trol Đeng ưh khan lăp hơnhăk truh tơdrong hlôh vao, tơdrong gơh băt ăn kơ đe oh hŏk tro mă oei tơgŭm đe buăl mơlôh năm jang tơgŭm đei dơ̆ng tơdrong lăng băt, đei pơvih pơvăn ăn tơpôl păng ưh kơ đei pơdơh jang đei. “Ƀơ̆t kơplăh pơtho hŏk thim tơ̆ âu ‘noh ĭnh ƀôh đe oh tôch kơ tơnăp, mă đơ̆ng ‘năr ‘mi, kial mă lei đe sư oei truh tơ̆ lăm tôm, năm hŏk ƀơ̆t lăp oei athei chông ba oh kiơ̆. Đe oh kơƀăh kơ ƀôch tôch kơ lơ mă lei ƀôh jơhngơ̆m đon hŏk pơhrăm đơ̆ng đe oh tôch kơ ‘lơ̆ng. Ĭnh ‘meh akhan tơdrong jang ‘nâu gô đei hơnơ̆ng pơvei tơ̆ dôm pơyan he sơnăm đơ̆ng rŏng”.

Mŏ Lê Thị Thu, Bí thư Đoàn Hơdruh tơdăm thị trấn Chư Ty tơbăt, lăm hŏk he pơgơ̆r tơ̆ plei Trol Đeng ‘noh jĭ lăm hŏk pơlong lăng đơ̆ng đe buăl mơlôh tơ̆ thị trấn lơ̆m pơyan he ‘nâu. Anih jang gô hơdrin hơnơ̆ng pơvei tơdrong jang tơ̆ dôm sơnăm đơ̆ng rŏng vă tơgŭm đe oh tơring mơmat tat đei tơdrong hiôk gơh hŏk pơhrăm, ngôi pơchơt păng hơtŏk tơiung tôm tơdrong.

“Dôm đoàn viên đei hơdrin lơ vă krao hơvơn đe oh truh tơ̆ lăm pơtho ăn đe oh tơdrong hlôh vao, dôm tơdrong gơh băt kăl lơ̆m tơdrong arih sa. Khŭl hơdruh tơdăm kŭm krao hơvơn dôm bơngai đei jơhngơ̆m đon ‘mêm mơnat vă đe oh mưh truh jơ lĕch ngôi 1 ‘nu buăl gô đei 1 hôp đak toh, tơgŭm hla ar hŏk, hla ar chih, hơbăn ao păng dôm tơmam yua hŏk pơhrăm pơm hơnih hŏk pơhrăm păng ngôi pơchơt hiôk ‘lơ̆ng ăn kơ đe oh”.

Sơnăm hŏk ‘nao đĭ vă jê̆ truh, 1,2 tơring ăn hơioh năm hŏk hơdrol 2 giĕng vă joăt hăm hnam trưng, kiơ̆ lăm. Uơ oei dơ̆ng đei lơ hnam trưng gô ăn hŏk tro năm akŏm tơ̆ hnam trưng lơ̆m blŭng giĕng truh.

Mĭnh pơyan he hăm dôm lăm hŏk hmă ră mă lei ƀĕnh tơdrong ‘mêm kơ eng, đe oh hơioh tơring mơmat tat nhen đei tơgŭm dơ̆ng tơdrong ‘lơ̆ng păng đon lui vă yak tŏk. Hăm đe buăl mơlôh năm jang tơgŭm, mă đơ̆ng lăp jing dôm ‘măng pơtho hŏk iĕ ră mă lei hlôi hơnhăk truh lơ tơdrong hlôh vao păng jang đei hloh ƀơ̆t hlôh jrŭ ƀiơ̆ găh tơdrong arih sa kon pơlei tơring hơtăih hơtŏ.