Tơ̆ hơnăp tơdrong rim ‘măng soai pơnhul tơmam drăm sa kơtang, bơngai tang măt Nguyễn Minh Tâm, khul Quảng Bình athei Khul kơdră teh đak, Kuô̆k hô̆i hơnơ̆ng pơjing keh đang trong jang, khôi luơ̆t vă pơjing đei tơdrong pơkăp găh bơ̆ jang teh đak vei lăng rơgoh ‘lơ̆ng tơmam drăm sa, mă kăl ‘noh tơmam drăm sa đe tĕch mơdro tơ̆ trong. Lơ̆m bơ̆ jang tang găn ŭnh sa, đôh, bơngai tang măt Nguyễn Minh Tâm sơkơ̆t hơdăh: găh tơdrong “Kơpăl iung jang kơtang, tơ̆ hơla pơhơi” lơ̆m jang kiơ̆ rim trong jang vei lăng năng tông tơdrong au:“ ‘Măng hop akŏm mă 5, Kơdră chĕp pơgơ̆r Hơnih tơm tơ iung pơjing sơkơ̆t hơdăh gô atŭm hăm Hơnih tơm kŏng ang vă sơđơ̆ng ‘lơ̆ng bơ̆ jang tang găn ŭnh sa, pĭt ŭnh sa. ‘Măng hop akŏm mă 6 lơ kơdră tang măt pơma tơbăt jơhngơ̆m đon tơtăm bơ̆ jang tang găn ŭnh sa, pĭt ŭnh sa, Khul kơdră teh đak jei hlôi pơkăp păng jei hlôi pơrô̆ chĕp pơgơ̆r kơtang găh tơdrong dăr lăng tang găn ŭnh sa, pĭt ŭnh sa mă kăl tơ̆ tơring kơdrơ̆m mă lei dôm ‘măng ŭnh sa kơtang hloh au ki tơƀôh hơdăh nhen lĕ bơ̆n hơnơ̆ng tơrăn tơ̆ hơnăp găh tơdrong ŭnh sa. Hơpơi rim hơnih bơ̆ jang tơ̆ tơring iung jang kơtang, tơtom, hơmet pơ ‘lơ̆ng tơdrong tơ̆ kơpal tơlĕch jang kơtang, tơ̆ hơla pơhơi vă dôm nơ̆r athei đơ̆ng Khul kơdră Teh đak đei tơlĕch jang kiơ̆ tơtom vă tang găn dôm tơdrong ơ̆h sơ-‘ngon, hiong răm đơ̆ng ŭnh sa, đôh pơrăm lơ̆m khei năr kơnh”

Lơ̆m pơtho pơhrăm, bơngai tang măt Trần Đình Gia, khul Hà Tĩnh akhan, lăp đơ̆ng rŏng khei năr jang kiơ̆ tơplih ‘nao trong pơtho pơhrăm, kơsơ̆p hla bơar hŏk, lơ kmăi kmok tơgŭm ăn pơtho hŏk pơhrăm tim mă tơmơ̆t jên jang tơgăl, pơtho ming ăn ƀok thây kô pơtho rim môn akŏm oei đei lơ tơdrong tơnap tap ... Găh vei lăng tơdrong pơtho ming, hŏk ming dơ̆ng, bơngai tang măt Trần Đình Gia pơma:“Pơtho ming, hŏk ming dơ̆ng ‘noh tơdrong ‘meh vă đơ̆ng tơpôl tơdăh đei vei lăng, pơtho tơbăt jơnei mă lei rim hla bơar pơtho tơbăt vei lăng, pơgơ̆r pơtho dơ̆ng, hŏk dơ̆ng ‘ngoăih kơ hŏk tơ̆ hnam trương tim gan trŏ lăp, pơm ăn truh mĭnh ƀar ‘nu bơngai pơgơ̆m pơm kơnê̆ truh tơdrong jang. Tơdrong mă au, hơnih pơtho pơhrăm kăl đei pơtho tơbăt mă hơdăh”.

Pơma dơnuh tơ̆ hop akom găh nơ̆r tơgop kăl tơmơ̆t jên jang ăn hơnih jang pơgang, bơngai tang măt Nguyễn Lân Hiếu, khul Bình Định sơkơ̆t hơdăh: tơdăh pơm kiơ̆ trong so, ưh jơnei păng tơlĕch nơ̆r hơlen:“Ĭnh apĭnh tơlĕch mĭnh trong jang lơ̆m jăl hrei au kăl tơmơ̆t jên jang khul jang pơgang apŭng kơ yuơ jĭ hơnih jang pơgang pă gan sơđơ̆ng ‘lơ̆ng pơ đĭ găh bơngai păng mŭk drăm kmăi kmŏk. Bơngai jĭ đei ƀôh ‘noh năm tơ̆ hnam pơgang kơpal, dôm bơngai ming hơmet tơ̆ hnam pơgang apŭng tơring ‘noh lăp dôm bơngai dơnuh, jĭ ăl, tơdrong jang trăp trĭn hlôi kơtŭng tơ̆ sơngiĕng”.

Sơkơ̆t hơdăh găh tơdrong gĭt kăl ‘lơ̆ng hơ iă kơ Tơdrong jang tơ iung pơjing tơring tơrang ‘nao pơm ăn tơdrong hơrih sa, jang sa, tơpôl đei atŏk ‘lơ̆ng, mă lei bơngai tang măt Nguyễn Văn Huy, khul Thái Bình tơtăm tơdrong lăng bơhơi tơdrong oei sa joăt joe đơ̆ng sơ̆. Hơnih găh lơ̆m mŭk drăm gĭt kăl dăr sơnăm, tơdrong pơgơ̆r tơpôl roi iĕ; dôm trong hơlĕnh pơdăr kơnê̆ tŏk bŏk pơgơ̆m pơm kơnê̆ truh tơdrong hơrih sa kơ kon pơlei tơring choh jang sa…“Vă tơgop hơnơ̆ng pơtrŭt kơtang tơring tơrang ‘nao, pơm keh đang rim pơkăp lơ̆m tơ iung pơjing tơring tơrang ‘nao pơma hơdrô̆, ĭnh athei Khul kơdră teh đak akŏm chă tơchĕng hơlen mă brĕ pơtruh trong tơ iung pơjing rim khôi luơ̆t găh tơdrong oei sa joh ayŏ, dôm tơdrong tơnap tap găh kon jên tơmơ̆t jang hlôi pơm kơnê̆ truh tơdrong atŏk tơ iung oei sa, jŏh ayŏ ‘lơ̆ng rŏ sơ̆ ki, apĭnh Khul kơdră teh đak lăng ba kơjăp dăr lăng, pơtho tơbăt vă tơdrong tơchơ̆t hơdăh hloh, trŏ lăp hloh găh tơring tơrang ‘nao, mă kăl ‘noh rim tơdrong pơkăp đei ƀơm truh tơdrong oei sa joh ayŏ”.

          Jei lơ̆m giĕng au ki, Kuô̆k hô̆i hlôi akŏm pơma dơnuh găh tơdrong mŭk drăm, tơpôl păng kon jên jang teh đak sơnăm 2023 păng dôm khei blŭng sơnăm. Rim kơdră tang măt hơlen, mŭk drăm kơ teh đak bơ̆n vei kơjăp tŏk tơ iung ‘lơ̆ng, mŭk drăm sơđơ̆ng lơ̆m mă apŭng plĕnh teh đei lơ tơdrong ưh sơđơ̆ng. Pơma hơdăh trong hơ iă ‘noh găh tơdrong jang choh jang sa hơnơ̆ng sơkơ̆t hơdăh hơnăp jang pran kơtang hloh kơ tơdrong jang mŭk drăm, rim kơdră tang măt jei kăl dăr lăng kơ jăp lơ̆m tơdrong tơplih kơ tơdrong jang mŭk drăm, lăng ba kơjăp tơdrong tĕch mơdro lơ̆m teh đak đei 100 triu ‘nu kon pơlei; adoi atŏk kơtang pơjao jang, pơjao gơ̆h jang ăn rim tơring vă iung jang ‘lơ̆ng tơdrong bơ̆ jang chĕp pơgơ̆r hơbĕch hơbal, gơ̆h hơgei.