Hlŏh 10 sơnăm bơ̆ jang tơdrong tơchơ̆t 217/2013 đơ̆ng Anih tơm Chinh trĭ, Công đoàn păng MTTQ jơ̆p tơring hlôi pơgơ̆r păng vang jang hăm vă jê̆ 144 rơbâu tơdrong dăr lăng, vă jê̆ 80 rơbâu ‘măng tơl tơblang lơ̆m tơpôl; đei hlŏh 408 rơbâu hla ar chih athei đơ̆ng rŏng kơ dăr lăng, păng hlŏh 39.200 hla ar apinh đơ̆ng rŏng kơ tơdrong tơblang hơdăh; đei hlŏh 33 rơbâu hla ar nơ̆r tơl đơ̆ng dôm anih jang, khul grŭp đei dăr lăng.

Hơdai hăm dôm tơdrong ‘lơ̆ng, bơ̆ jang tơdrong tơchơ̆t 217 kŭm oei đei lơ tơdrong ưh hơiă ‘năi. Ƀok Vũ Hồng Quang – Kơdră jang lơ̆m Khul kơdră chĕp kơ̆l, Phŏ Kơdră Anih jang kiơ̆ luơ̆t kơ Tổng Liên đoàn Lao động Việt Nam ăn tơbăt, dôm tơdrong ưh hơiă âu gô đei Tổng Liên đoàn Lao động Việt Nam hơnơ̆ng chih răk păng roi tơƀôh lơ̆m tơdrong chih pơjing luơ̆t păng dôm hla ar hơgăt luơ̆t tơ̆ hơnăp kơnh.