Kơdră chĕp pơgơ̆r Hơnih tơm vei lăng Trong gre nơnăm Nguyễn Văn Thắng đŏk tơbăt hla bơar pơtruh ăn đơ̆ng Khul kơdră Teh đak găh trong tơmơ̆t jên jang Tơdrong vă jang pơm trong gre treng rĕnh Tu-Pơbăh. Kiơ̆ kơ ‘noh, jăl trong gre treng rĕnh đei pơjing đơ̆ng pơlei tơm Hà Nội păng pơtôch tơ̆ Pơlei tơm Hồ Chí Minh yak hloh 20 dêh char, pơlei tơm; trong kơjung atăih 1.540km; akŏp kon jên tơmơ̆t jang hloh 1 triu 700.000 ti hlak jên (dang 67 ti USD).  Tơchĕng hơlou gô iung jang ming man đơ̆ng sơnăm 2027; Hơdrin jang keh đang lơ̆m sơnăm 2035. Ăn tơgop nơ̆r găh tơdrong ou, Kơdră chĕp pơgơ̆r Kuô̆k hô̆i Trần Thanh Mẫn tơbăt, Hơnih tơm Chinh trĭ, Ban Bí thư lăng kơjăp tơdrong vă jang trong gre treng rĕnh Tu Pơbăh:“Tơdăh jang kĕ trong gre treng rĕnh Tu-Pơbăh ou hăm kon jên tơmơ̆t jang dang 67 ti USD, teh đak bơ̆n gô đei rơvơn kĕ atok tơ iung. Ưh khan iung jang hloi mă jang keh đang jăl jang sơnăm 2025, sơnăm 2035. Tơdăh ming man keh đang roi hrôih roi ‘lơ̆ng hloh. Hrei ou teh đak đe đei dôm tơdrong vă jang tih hloh dôm ‘măng kơ tơdrong vă jang ou mă đe tơlĕch jang ming man keh đang hrôih tim mă truh 3 sơnăm. Hăm bơ̆n kiơ̆ kơ ĭnh, hơmet ming trong jang ‘noh jĭ kơdih bơ̆n, bơ̆ jang pơm hla bơar jang ‘noh jĭ kơdih bơ̆n tơlĕch ăn. Kơ yuơ lơ loh pơm lơ liơ mă kĕ hơmet pơ ‘lơ̆ng tơdrong tơnap tap, tơhlăk tơhlĭn ‘noh”.

Đơ̆ng rŏng mơ̆ng hla bơar chih tơbăt bơ̆ jang dăr lăng hơlen adoi nhen hla bơar chih tơbăt nơ̆r tơblang hơdăh đơ̆ng Khul kơdră teh đak, sơkơ̆t hơdăh tơdrong ou, Kơ iĕng Kơdră chĕp pơgơ̆r Kuô̆k hô̆i Nguyễn Đức Hải tơbăt, Hơnih bơ̆ jang Kuô̆k hô̆i drơ̆ng mĭnh nơ̆r pơtruh ăn Kuô̆k hô̆i lăng hơlen kĭ tơchơ̆t trong jang tơmơ̆t jên jang Tơdrong vă jang pơm trong gre treng rĕnh Tu-Pơbăh tơ̆ ‘măng hop akŏm mă 8, Kuô̆k hô̆i jăl XV. ‘Nou jĭ tơdrong vă jang tih tên tim lăh đei tơ̆ teh đak bơ̆n. Kơ yuơ lơ loh, Hơnih bơ̆ jang Kuô̆k hô̆i athei, Khul kơdră teh đak hơnơ̆ng dăr lăng hơlen vă hơlen ming dơ̆ng kon jên tơmơ̆t jang păng tơdrong pơjing tơdrong jang lơ liơ mă sơđơ̆ng, trŏ lăp hloh kơ tơdrong vă jang ou.

Mưh tơlĕch jang tơdrong vă jang trong gre treng rĕnh Tu-Pơbăh, kăl hơlen dơ̆ng găh hơgăt teh jang ƀa, hơgăt teh bri vă iŏk teh ou pơm trong păng rim trong vă jang sơđơ̆ng ăn teh jang ƀa, bri ‘long hơyơ̆l, hơnih jang kơpal hlôi tơchơ̆t; hpơlen tơdrong đei ƀơm truh đơ̆ng tơdrong vă jang ou hăm cham char hơlen dơ̆ng găh pơjing hơnih gre treng dơ̆ng, hơlen dơ̆ng dôm tơdrong đei ƀơm truh iung jang ming man, đei trong jang hơdrin truh sơnăm 2035 ming man keh đang; kơchăng kơjăp tơdrong iŏk tơvih teh hrŭ ăn, pơjing hơnih oei hle; tơdrong rơ̆ih hơnih tơmơ̆t jên jang, tơdrong trŏ lăp đei tôm kmăi kmŏk, bơngai jang, tơmam drăm ming man, tơdrong ‘meh vă iŏk yua ŭnh hơyuh lơ̆m khei năr tơ iung pơjing ming man trong ou.

Găh kon jên tơmơ̆t jang ăn tơdrong jang gĭt kăl tih tên, pơđĭ găh kon jên tơ iung pơjing păng kon jên bơ̆ jang iŏk yua. Kơ yuơ lơ loh, vă sơđơ̆ng ‘lơ̆ng kon jên jang teh đak kăl hơlen mă brĕ hloh dơ̆ng, lăng kiơ̆ lơ̆m khei năr teh đak tŏk bŏk tơlĕch lơ tơdrong vă jang trong hnam kăl hloh lơ̆m tơdrong jang ming man trong nơnăm, ŭnh hơyuh vă vei lăng ‘lơ̆ng, mă kăl dôm tơdrong đei ƀơm kơnê̆ kơ yuơ jang ưh kơ keh đang kơ yuơ ưh kơ măh kon jên tơmơ̆t jang, tơdrong đei ƀơm đơ̆ng ưh hơtŏ kon jên jang teh đak mưh rim kon jên hre truh khei ‘năr vă pơdreo tôch kơ lơ; đei tơdrong đơ̆ng gơnang lơ đơ̆ng kon jên tŏk iŏk đơ̆ng teh đak đe, pơm kơnê̆ truh tơdrong jên jang teh đak.

Hơnih bơ̆ jang Kuô̆k hô̆i drơ̆ng mĭnh nơ̆r kăl đei dôm trong jang trŏ lăp hloh vă jang kiơ̆ tơdrong vă jang ou. Mă lei, vă sơđơ̆ng ‘lơ̆ng hơ iă, athei Khul kơdră chĕp pơgơ̆r teh đak dăr lăng dơ̆ng 19 trong jang pơchoh trong hơdăh hloh, hơlen mă brĕ dôm tơdrong đei ƀơm truh, lăp chih tơmơ̆t lơm Tơdrong Tơchơ̆t dôm trong tơlĕch jang trŏ lăp hloh, iung jang hơdoi kơjăp dăr lăng bơ̆ jang chĕp pơgơ̆r ƀar păh rim hơnih bơ̆ jang, trong bơư jang dăr lăng, ưh kơ lê̆ đei pơm hiong răm kon jên hu, bơ̆ jang ưh kơ ‘lơ̆ng, kơchăng kơjăp truh rim trong bơ̆ jang tơgŭm ăn, hơnih bơ̆ jang hơlen, athei ưh kơ gơ̆h tơchơ̆t hơmet ming dăh mă hơlen hơdăh dôm tơdrong đei ƀơm truh mưh tơchơ̆t.