Jĭ mĭnh lơ̆m dôm ŭnh hnam tơnap tap đei sơng iŏk pơbŭng hnam ‘mêm kơ eng kơ yuơ Khul kơdră tang măt Kuô̆k hô̆i dêh char Dak Lăk iung jang hơdoi hăm Hơnih mong jên Ƀô̆ đô̆i pôk ăn, ƀok Y Nguyên Niê oei tơ̆ ƀuôn Jung B, tơring Ea Ktur, apŭng Cư Kuin măh chhưu lơ̆m jơhngơ̆m. Jĭ bơngai hơdro po oei sa hơdrô̆ hơdrăn, hơkăn ƀok jĭ jăn lôch đunh kơ ou 2 sơnăm. Kon hơ ‘lơ̆p chă jang sa tơ̆ hơtăih, lê̆ hơdrô̆ ƀok rong ‘me 2 ‘nu sou oei ‘lơ̆p. Tơdrong hơrih sa kơ ŭnh hnam lăp gơnang đơ̆ng mir pơgar chehphe kră krŭt atŭm hăm tơdrong jang chă jang pơm hnam đe ưh sơđơ̆ng kơ ƀok. Pơbŭng hnam tơ̆r hnăt hnot dôm sơnăm kơ ou jei ưh kơ kĕ vă ming hơmet pơ ‘lơ̆ng. Kơna mưh đei tơgŭm ăn 80 triu hlak jên vă man hnam ‘nao, ƀok chhôk ‘nă pă sŭk kơtep. Ƀôh hơdăh rim năr roi jing hnam đei tơ iung pơjing ming man, pơm ăn jơhngơm ƀok roi chhôk hơ iă ‘nă hal hloh dơ̆ng. Ƀok Y Nguyên Niê tơroi:“ Sơ̆ hnam hyăh hyoh đĭ bơih, dang ei đei teh đak tơgŭm djru ŭnh hnam nhôn pơm hnam. Bơnê kơ Đảng, teh đak lăng ba nhôn ou”.

Đei pơjao ăn hnam ‘mêm mơnat atŭm hăm ƀok Y Nguyên Niê lơ̆m hơtuch khei 9 ou ki, yă H’Sang Pang Ting oei tơ̆ ƀuôn Buốc, tơring Nam Ka, apŭng Lăk, dêh char Dak Lăk jei tôch chơt hơ iă ‘nă hal. Ŭnh hnam yă ‘noh ŭnh hnam dơnuh, teh jang sa iĕ, ưh kơ đei jang sa sơđơ̆ng, mă kăl chă jang ăn kơ đe. Pơđĭ lơ̆m ŭnh hnam đei 8 ‘nu bơngai lơ̆m mă jang sa iok yua ưh kơ gan đei, kơna yă jei ưh kơ pơ̆n chă tơchĕng truh tơdrng ming hơmet hnam tơ̆r đĭ hơgrêng lơ sơnăm ou. Mưh sơng iok đei hnam ‘nao yă H’Sang chơt hơ iă ‘nă hal:“Ŭnh hnam bơ̆n ‘noh jĭ ŭnh hnam mơmat tat, hnam jĭ hyăh hyok. Dang ei đei khul kơdră lăng ba tơgŭm djru ăn unh hnam nhôn hnam ‘lơ̆ng lơ lou kơdih ba păng ŭnh hnam gô hơdrin hloh dơ̆ng chă jang sa vă kĕ yak hloh dơnuh hin”.

Yă Lê Thị Thanh Xuân, Kơ iĕng kơdră Khul kơdră tang măt Kuô̆k hô̆i dêh char Dak Lăk tơbăt: ‘Ngoăih dôm tơdrong bơ̆ jang, Khul ling lang lăng tơdrong hơrih sa tơpôl ‘noh jĭ hơnăp jang kăl vă vang iung jang hơdoi hăm Măt trân tô quô̆k rim hơnih, rim khul jang chinh trĭ-tơpôl vă vei lăng năng tông tơdrong hơrih sa ăn kon pơlei tơnap tap, mă kăl rim bơngai đei iŏk yua ăn teh đak, ŭnh hnam dơnuh, kon pơlei kon kông oei tơ̆ tơring hơtăih yăih ... tơgum đe sư hơdrin jang sa, tơgop pơm sơđơ̆ng dơ̆ng kơjăp tơ̆ tơring.“ Đơ̆ng blŭng jăl jang truh dang ei, nhôn hlôi chă hơvơn, ming man đei 22 pơbŭng hnam kơ jă kơjên 1 ti 400 triu hlak jên. Kon jên ưh kơ lơ, mă lei hlôi tơgŭm ăn tơdrong lang să găh jơhngơ̆m đon Đảng păng teh đak ling lang lăng ba hăm dôm bơngai tơnap tap vă lang să hloh dơ̆ng jơhngơm đon lui yom đơ̆ng kon pơlei. Đơ̆ng noh atŭm hăm Đảng păng Teh đak jang ‘lơ̆ng bơ̆ jang vei lăng năng tông hơrih sa tơpôl vă ưh kơ đei bơngai bu hơchăng hŭt tơ̆ rŏng”.

Tơjê̆ ou hloh, lơ̆m bơ̆ jang, tơ̆ ‘Măng hop akŏm mă 8, Kuô̆k hô̆i jăl XV tŏk bŏk pơgơ̆r tơ̆ Hà Nội, Khul kơdră tang măt Kuô̆k hô̆i dêh char Dak Lăk hlôi đei lơ nơ̆r tơgop kăl vă hơmet pơ ‘lơ̆ng tơnap tap, tơhlăk tơhlĭn tơ̆ tơring. Mă hơdăh nhen tơdrong tơlĕch jang tơdrong vă jang Gơng 110 (sơlam tŏk bŏk hăm dêh char Gia Lai) păng hlôi ming man keh đak 88%, pă 12% trong jang dang ei tŏk bŏk tơhlăk tơhlĭn lơ̆m tơdrong teh păng kon jên trăi phĭu Khul kơdră Teh đak. Dêh char Dak Lăk hlôi pơm hla bơar pơtruh ăn Hơnih tơm vei lăng Trong gre nơnăm vă lăng hơlen, hơnơ̆ng tơmơ̆t jên jang ming man keh đang, veh ver brăh brư kon jên tơmơ̆t jang. Jei tơ̆ ‘măng hop akŏm ou, Khul kơdră tang măt Kuô̆k hô̆i dêh char Dak Lăk  hlôi pơma tơbăt mĭnh tơdrong hơdrơ̆k tơ̆ tơring ou ‘noh dêh char đei tơdrong rơvơn vă tơ iung pơjing ŭnh hơyuh kial, ŭnh hơyuh jơ̆ng ‘năr, mă lei truh dang ei rim tơdrong vă jang ŭnh hơyuh jơ̆ng ‘năr kơ Dak Lăk chă pơlơ̆h dih băl tĕch mơdro ŭnh hơyuh vă tơmơ̆t lơ̆m ŭnh hơyuh teh đak, kơ yuơ tơlei ŭnh hơyuh ưh sơđơ̆ng, apĭnh Khul kơdră Teh đak, Hơnih tơm vei lăng Mơdro sa kăl lăng ba kơjăp tơ iung pơjing ming hơmet mă ‘lơ̆ng tơlei ŭnh hơyuh. Atŭm hăm ‘noh, Khul kơdră tang măt Kuô̆k hô̆i dêh char Dak Lăk jei athei Hơnih tơm vei lăng Tơdrong jang, Bơngai rơka păng Tơpôl, Hơnih tơm vei lăng Hnam trương pơtho pơhrăm kăl đei hơlen sơkơ̆t hơdăh mă trŏ ƀlep tơdrong bơ̆ jang hnam trương pơtho tơdrong jang, hnam trương giáo dục thường xuyên vă đei nơ̆r pơtho ăn, hơmet ming rim hơnih ou ‘lơ̆ng hơ iă hloh dơ̆ng, sơđơ̆ng ăn tơdrong bơ̆ jang ‘lơ̆ng kơ rim hơnih bơ̆ jang kơ Teh đak.