Tơdrong vă jang tơmơ̆t jên jang ming man trong glung rĕnh Tu-Pơbăh păh Hơlĕch jăl trong Gia Nghĩa (Dak Nông) - Chơn Thành (Bình Phước) ‘noh jăl trong kăl hloh, tơgoăt tơring Tây Nguyên hăm tơring Đông Nam Bộ, tơring Tây Nam Bộ păng Pơlei Hồ Chí Minh. Hăm trong hơtăih 128km, tơmơ̆t jên jang kiơ̆ jăl sơnăm, jăl mă 1 ming man 4 trong gre. Akŏp kon jên tơmơ̆t jang 25.540 ti hlak jên. Rim kơdră tang măt athei Khul kơdră Teh đak tơlĕch jang kiơ̆ Tơdrong vă jang sơđơ̆ng ƀlep trong tơlĕch hơdrol, ming man kơjăp ‘lơ̆ng, jơnei tơmơ̆t jên jang kiơ̆ ƀlep tơdrong tơchơ̆t kơ Khôi luơ̆t. ‘Ngoăih kơ ‘noh, tơdrong tơmơ̆t jên jang Tơdrong vă jang kiơ̆ trong jang hơdoi teh đak kon pơlei kăl hơlen mă brĕ hơvơn rim bơngai tơmơt jên jang, khul hơnih mong jên vang iung jang. Bơngai tang măt Trình Lam Sinh, Khul An Giang pơma hơdăh: "Mưh krao hơvơn bơngai tơmơ̆t jên jang vang iung jang tơdrong vă jang ou kiơ̆ trong Teh đak kon pơlei vang mơ̆t jang, bơ̆n kăl hơlen mă brĕ truh tơdrong đei iŏk yua adoi nhen vang tơgŭm dih băl tơdăh đei tơdrong sar bar mă trŏ ƀlep kơ ƀar păh, lơ̆m ou Teh đak kăl pơjing rơvơn ăn bơngai tơmơ̆t jên jang đei trong jang kĕ iŏk tơvih kon jên tơmơ̆t jang. Tơdrong mă ou tôch kơ kăl kơ yuơ tơdrong vă jang ưh kơ hơ iă vă hơvơn bơngai tơmơt jên jang ‘noh đei ‘măng bơ̆n kăl tơplih tơdrong vă jang jing trong tơmơ̆t jang kơ teh đak tơmơ̆t jang lei gô pơm ăn truh tơdrong chă ming man hiơ hiơ̆, pơm kơnê̆ truh kon jên jang Teh đak, tơdrong chă hơvơn tơpôl vang tơra vă tơ iung pơjing ming man rim tơdrong jang ming man trong nơnăm”.

Hăm sir iŏk teh, tơmo, chuơ̆h vă pơm tơmam drăm ming man tơgŭm ăn tơdrong vă jang, bơngai tang măt Nguyễn Trường Giang, khul Dak Nông athei Kuô̆k hô̆i ăn asong jang kiơ̆ mĭnh ƀar trong jang tơgŭm djru kăl: "Hăm tơring tim mă đei hla bơar tơchơ̆t ăn asong năm tơchă teh, tơmo, chuơ̆h ‘noh bơngai iŏk jang ming man đei rơih iok vă sir iŏk teh, tơmo chuơh. Bơngai iŏk ming man kăl pơtruh ăn hla bơar apĭnh tơdrong chă sir iŏk đei tơbăt hơdăh găh tơdrong vei lăng sơđơ̆ng cham char păng pơjao ăn Hơnih vei lăng kon pơlei dêh char Bình Phước păng Hơnih jang vei lăng kon pơlei dêh char Dak Nông iung jang hơlen hơdăh trong pơprŏ vă sir iŏk tơbăt truh vei lăng năng tông cham char hăm rim tơdrong jang chă sir iŏk teh, tơmo chuơ̆h tơgŭm ăn ming man’.

Hăm kon jên tơmơ̆t jang đơ̆ng Trung ương hloh 10.000 ti hlak jên, rim bơngai tang măt athei Khul kơdră chĕp pơgơ̆r teh đak tơblang hơdăh tơdrong chă pơprŏ kon jên vă tơlĕch jang kiơ̆ Tơdrong vă jang lơ̆m sơnăm 2026. Hăm kon jên jang tơring dang hloh 2.000 ti hlak jên, athei rim tơring pơkăp hơnăp jang kơdih tơ̆ hơnăp Khul kơdră teh đak, Khul kơdră teh đak chiu pŭ tơ̆ hơnăp Kuô̆k hô̆i găh tơdrong pơprŏ kon jên jang tơring ăn Tơdrong vă jang sơđơ̆ng ‘lơ̆ng ăn ming man. Hăm kon jên jang đơ̆ng rim bơngai tơmơ̆t jên jang dang 12.000 ti hlak jên, tơmơ̆t 50% kon jên tơmơ̆t jang Tơdrong vă jang, athei Khul kơdră teh đak drơ̆ng mĭnh nơ̆r hăm bơngai tơmơ̆t jên jang, vă veh ver hơmet ming trong jang tơmơ̆t jên jang Tơdrong vă jang.

Tơblang hơdăh tơ̆ hop akŏm, ƀok Nguyễn Văn Thắng, Kơdră chĕp pơgơ̆r Hơnih tơm vei lăng Trong gre nơnăm pơma hơdăh, khei năr tơlĕch jang tơdrong vă jang, rim tơring jei sơkơ̆t hơdăh gô hơmet pơ ‘lơ̆ng kon jên jang, chă pơprŏ tôm kon jên vă tơlĕch jang tơdrong vă jang ƀlep khei ‘năr pơkăp pơm keh đang lơ̆m hơtuch sơnăm 2026:"Tơdrong kăl hloh kơ tơdrong vă jang ou tôch rơvơn găh tơmam drăm ming man. Hrei ou kiơ̆ đơ̆ng ƀar tơring hơlen ‘noh ƀar tơring hlôi hơmet đang rim hơnih vă sir kôch iŏk chuơh tơmo teh. Lăp đei tơdrong hrei ou bơ̆n đei trong tơlĕch jang mă Kuô̆k hô̆i tŏk bŏk vă pơjing tơlĕch jang kiơ̆ ‘noh jei tôch rơvơn, đei rim trong tơgŭm djru kăl ƀơm truh tơdrong iŏk tơvih teh, xơkơ̆t hơdăh hơnih iŏk ming man vă tơ iung pơjing hơnih oei ‘nao ăn kon pơlei. ‘Nou jing tơdrong kăl hloh ăn tơdrong ming man keh đang tĕnh koăng ƀlep pơkăp. Găh tơdrong đei ƀơm truh pơ prŏ ăn hơnih sir iŏk teh chuơh tơmo tơgŭm ăn ming man ... đĭ đăng tơdrong nou tôch rơvơn".

Bơngai tang măt Kuô̆k hô̆i păng kon pơlei lui akhan, tơdrong tơmơ̆t jên jang Tơdrong vă jang ming man trong glung rĕnh Gia Nghĩa (Dak Nông) - Chơn Thành (Bình Phước) gô roi năr roi pơjing đei ‘lơ̆ng hơ iă trong glung rĕnh, pơ̆ih trong atŏk tơ iung pran kơtang ‘nao ăn tơring Tây Nguyên.