Lơ̆m hla bơar pơtruh ăn đơ̆ng Khul kơdră Teh đak ăn kơ Hơnih chĕp pơgơ̆r Kuô̆k hô̆i lăng hơlen 2 tơdrong: Klah asong Trong tơmơ̆t jên jang teh đak jăl jang 2021-2025 ‘noh 22.551 ti hlak jên kon jên răk hơlou atŭm trong pơprŏ jang tơmơ̆t jên jang teh đak đơ̆ng kon jên bơ̆ jang Trung ương sơnăm 2022 ăn 11 tơdrong vă jang; klăh asong kon jên teh đak tơmơ̆t jang sơnăm 2024 ‘noh hloh 2.100 ti hlak jên đơ̆ng kon jên jang Trung ương sơnăm 2022. Kơdră chĕp pơgơ̆r Kuô̆k hô̆i Trần Thanh Mẫn akhan, truh khei năr dang ei, oei đei lơ tơdrong vă jang, tơdrong jang iung jang tim mă keh đang, đei ‘măng tim mă klăh asong kon jên jang. Kơ yuơ lơ loh, Kơdră chĕp pơgơ̆r Kuô̆k hô̆i athei, Khul kơdră chĕp pơgơ̆r Teh đak pơrô̆ athei rim hơnih tơm, hơnih jang tĕnh koăng dăr lăng, pơm hơdăh tơdrong tơm pơm ăn, pơrô̆ athei jang kơtang, jang keh đang pơm hla bơar klăh asong kon jên tơmơ̆t jang. Kơdră chĕp pơgơ̆r Kuô̆k hô̆i jei pơkă, bơ̆ jang vei lăng, iok yua kon jên teh đak tơmơ̆t jang kăl pơkom, iŏk jơnei, ưh kơ lê̆ đei tơdrong pơm hiong răm, brăh brư, pơjing đei tơdrong lui yom lơ̆m Đảng, lơ̆m kon pơlei; ‘ngoăih kơ ‘noh kăl dăr lăng kơjăp rim tơdrong jang kơ yuơ Kuô̆k hô̆i kĭ tơchơ̆t ăn jang.