Lơ̆m 2 sơnăm 2024 păng 2025, Lâm Đồng iung jang xut hŭt 1.972 pơbung hnam hiăh hiok, hnăt hnot tơgŭm ăn ŭnh hnam dơnuh, vă jê̆ dơnuh lơ̆m dêh char. Lơ̆m ou, 1.580 pơbŭng hnam ming man ‘nao păng 392 pơbŭng hnam ming hơmet hăm akop kon jên 88 ti 800 triu hlak jên. Hơdrô̆ sơnăm 2024, Lâm Đồng tơlĕch iung jang keh đang xut hŭt 1.000 pơbung hnam hiăh hiok, hnăt hnot tơgŭm ăn ŭnh hnam dơnuh, vă jê̆ dơnuh, lơ̆m ou ming man ‘nao 840 pơbŭng hnamn păng hơmet ming 166 pơbŭng hnam. Kiơ̆ đơ̆ng ƀok Phạm S, Kơ iĕng Kơdră chĕp pơgơ̆r Hơnih vei lăng kon pơlei dêh char Lâm Đồng, truh khei năr ou, tơdrong jang vang iung jang xut hŭt pơbung hnam hiăh hiok, hnăt hnot kơ dêh char Lâm Đồng hlôi sơng iŏk đei tơdrong vang iung jang đơ̆ng lơ khul, rim bơngai, hơnih mơdro sa chă tơra tơgop hăm kon jên sơng iŏk đei hloh 45 ti hlak jên. Hăm kon jên ou sơđơ̆ng ăn xut xa hnam hiăh hiok, hnăt hnot lơ̆m sơnăm ou ƀlep trong tơlĕch jang.