Kiơ̆ đơ̆ng Hơnih bơ̆ jang Kuô̆k hôi tơbăt, 6 khei blŭng sơnăm, bơ̆ jang pơchoh trong, tơgŭm ăn tơlĕch rim tơdrong jang pơjing khôi luơ̆t hơnơ̆ng iung jang kơtang, pơm hơtŏk jang ‘lơ̆ng. Hlŏh 4 jăl hop akŏm, Kuô̆k hô̆i hlôi pơdrơ̆ng 13 khôi luơ̆t, 3 tơdrong tơchơ̆t khôi luơ̆t, ăn tơgop nơ̆r găh 11 tơdrong vă jang khôi luơ̆t anai; mă kăl, dôm tơdrong jang ‘lơ̆ng găh bơ̆ jang pơjing khôi luơ̆t blŭng sơnăm 2024.

Iung pơma tơ̆ Hop akŏm, Kơdră chĕp pơgơ̆r Kuô̆k hô̆i Trần Thanh Mẫn pơma hơdăh, 6 khei blŭng sơnăm, teh đak bơ̆n hlôi iŏk đei jơnei hơ iă, lơ̆m jơnei ou, đei tơdrong tơgop đơ̆ng Kuô̆k hô̆i, Hơnih bơ̆ jang Kuô̆k hô̆i, rim hơnih jang kơ Kuô̆k hô̆i, hơnih jang găh Hơnih bơ̆ jang Kuô̆k hô̆i. Lơ̆m ou, bơ̆ jang pơjing khôi luơ̆t, dăr lăng păng tơchơ̆t rim tơdrong kăl hơnơ̆ng đei tŏk kơtang găh ‘lơ̆ng, trŏ lăp rim tơdrong đei bơngai tăh hla, kon pơlei lăng truh.

‘Moi kiơ̆ ‘noh, Kơdră chĕp pơgơ̆r Kuô̆k hô̆i Trần Thanh Mẫn hôn bơnê tơdrong hơdrin đơ̆ng Jơnŭm vei lăng Hơdrĕch hơdrung, rim Hơnih bơ̆ jang kơ Kuô̆k hô̆i păng pơđĭ kang ƀô̆ hlôi iung jang keh kong lơ tơdrong bơ̆ jang tơ̆ rim ‘măng hop akŏm hăt hot,hop akŏm joăt joe kơ Kuô̆k hô̆i.

Kơdră chĕp pơgơ̆r Kuô̆k hô̆i Trần Thanh Mẫn athei, rim kơdră jang lơ̆m Hơnih bơ̆ jang Kuô̆k hô̆i, Jơnŭm vei lăng kon kông, rim hơnih jang kơ Kuô̆k hô̆i hăm jơhngơ̆mđon lăng tơpăt tơdrong tơpă, pơma tơpăt dôm tơdrong jag tim mă ‘lơ̆ng vă hơmet ming, adoi lăng dơ̆ng dôm tơdrong ‘lơ̆ng vă hơnơ̆ng kiơ̆ yok rok jơ̆ng lơ̆m khei năr kơnh.

Kơdră chĕp pơgơ̆r Kuô̆k hô̆i pơma hơdăh, tơdrong jang 6 khei hơtuch sơnăm tôch kơ lơ, mă kăl hơmet ăn ‘măng hop akŏm mă 8, Kuô̆k hô̆i jăl XV gô vă pơgơ̆r lơ̆m khei 10; Pơgơ̆r Hop akŏm khul Kơdră tang măt ‘măng mă 6; tơlĕch jang jơnei rim tơdrong bơ̆ jang jăl 3 kơ Đảng khul Kuô̆k hô̆i, Khul kơdră chĕp pơgơ̆r Kuô̆k hô̆i; rim ‘măng hop akŏm kơ Hơnih bơ̆ jang Kuô̆k hô̆i.“Bơ̆n akŏm tơlĕch dôm trong jang lơ̆m tơ iung pơjing khôi luơ̆t, khôi luơ̆t tơm teh đak sơnăm 2024 đei tơmơ̆t dơ̆ng ‘noh trŏ ƀlep pơkăp, trong bơ̆ jang Kuô̆k hô̆i hlôi tơchơ̆t tơmơ̆t dơ̆ng tơdrong jang tơ iung pơjing khôi luơ̆t, khôi luơ̆t tơm teh đak kơ sơnăm 2024, dôm tơdrong vă pơjing khôi luơ̆t hlôi hơmet tôm tong hla bơar hô sơ ‘noh tơlĕch jang hloi, hơmet ming keh đang rim khôi luơ̆t tơchơt hlôi đei pơdrơ̆ng kiơ̆ tơ̆ ‘măng hop akŏm mă 7. Rim kơ iĕng Kơdră chĕp pơgơ̆r gô pơrô̆ dăr lăng oei dôm yơ tơdrong ‘noh tim mă pơtruh kĭ tơchơ̆t vă pơm pơkeh”.

Kơdră chĕp pơgơ̆r Kuô̆k hô̆i tơbăt, truh ou kơnh, Hơnih bơ̆ jang Kuô̆k hô̆i hăm Khul kơdră Teh đak gô vang pơgơ̆r Hop akŏm tơlĕch jang Khôi luơ̆t, tơdrong tơchơ̆t tơm hlôi đei pơdrơ̆ng kiơ̆. Mă kăl, Khul kơdră teh đak gô chĕp pơgơ̆r tơdrong tơƀôh tơbăt, pơtho tơbăt khôi luơ̆t, rim tơdrong Tơchơ̆t, Tơdrong pơkăp ou to vă mă tôm tong.

Kơdră chĕp pơgơ̆r Kuô̆k hô̆i athei, Hơnih bơ̆ jang Kuô̆k hô̆i ,pơchoh trong ăn Hơnih jang jang Khul kơdră Kuô̆k hô̆i pơrô̆, dăr lăng, tơ iung pơjing trong pơprŏ jang vă tơlĕch rim tơdrong tơchơ̆t mă hơdăh, pơtho tơbăt jang kiơ̆, hơnơ̆ng chă tơchĕng hơlen, pơtruh ăn, tơgoăt iŏk nơ̆r tơgop, hơmet ming 11 tơdrong vă pơjing Khôi luơ̆t hlôi đei Kuô̆k hô̆i ăn tơgop nơ̆r tơ̆ hop akŏm mă 7 păng gô pơdrơ̆ng kiơ̆ tơ̆ ‘Măng hop akŏm mă 8; Hơmet ăn tơdrong Kuô̆k hô̆i gô ăn tơgop nơ̆r hăm 12 tơdrong vă pơjing khôi luơ̆t păng rim trong vă pơjing tơchơ̆t đei tơmơ̆t dơ̆ng lơ̆m tơdrong jang tơ iung pơjing khôi luơ̆t, Khôi luơ̆t tơm teh đak sơnăm 2024; pơchoh trong, tơgŭm ăn pơgơ̆r bơ̆ jang apĭnh jet tơ̆ ‘măng hop akŏm mă 8; akŏm jang kiơ̆ keh đang hla bơar tơbăt pơtôch bơ̆ jang dăr lăng 2 tơdrong tơchơ̆t đơ̆ng Hơnih bơ̆ jang Kuô̆k hô̆i lơ̆m sơnăm 2024.

Kơdră chĕp pơgơ̆r Kuô̆k hô̆i Trần Thanh Mẫn jei pơkă, kăl atŏk kơtang bơ̆ jang vei lăng chinh trĭ ăn rim đảng viên, kang ƀô̆; mă kăl lăng ba kơjăp truh dôm tơdrong tơgŭm djru, kon jên khei mă hơtŏ hơnơ̆ng, mă trŏ lăp păng tơtom..