Rim anih iŏk tơguăt ‘nhŏng oh tơlĕch chă tơgŭm kon pơlei pơm jang sut lê̆ pơngot tơjur hin dơnuh, hăm tơdrong tơgŭm hơdrĕch ‘long pơtăm, kon tơrong, phŏng rei, pơgang hơdrông; pơtruh kang ƀô̆ jang atŭm hăm kang ƀô̆ choh jang xa chă pơtho kon pơlei băt gah kih thuơ̆t vei lăng ‘long pơtăm, kon tơrong, tơplih hơdrĕch ‘long pơtăm. Đơ̆ng noh, rim anih iŏk jang tơ̆ dôm jăl jang hlôi pơtruh hloh 212.000 kang ƀô̆ vih truh pơlei tơguăt ‘nhŏng oh, asong hloh  200.000 tơpu tơmam, hăm kơsô̆ jên jê̆ 262 tih hlj păng lơ tơdrong tơgŭm nai.

Vă tơdrong jang tơguăt ‘nhŏng oh gơh đei jơnei tơnăp, trŏ tơchơ̆t, khei năr truh, ƀok Nguyễn Đình Trung, jang lơ̆m Trung ương Đảng, Ƀĭ thư Tĭnh uy Đak Lăk pơkăl, rim anih jang, rim tơring pơtoi tơplih ‘nao trong jang tơguăt ‘nhŏng oh hăm pơlei kon kông tơ̆ dêh char mă trŏ ƀlep hăm tơdrong pơkăl hơtŏk mŭk drăm, joh ayŏ, tơpôl lơ̆m khei năr dang ei.