Vang năm ‘măng năm tơchă, kôch akŏm, chơ brŏk kơting ƀô̆ đô̆i lôch dŏng teh đak ‘măng mă ou, rim kang ƀô̆, ƀô̆ đô̆i Khul K52, Hơnih jang Chinh trĭ găh Dơnŏ anih Ƀô̆ đô̆i dêh char Gia Lai hơnơ̆ng đei klăh asong rim khul iung jang năm tơchă tơ̆ pêng dêh char Hơlĕch Tu Campuchia ‘noh: Preah Vihear, Stung Treng păng Ratanakiri. Khei ‘năr iung jang đơ̆ng dang ei truh đĭ pơyan phang sơnăm 2025. Tơ̆ pơm lêh iung năm, kơdră chĕp pơgơ̆r dêh char Gia Lai atŭm hăm kơdră chĕp pơgơ̆r Khul Ƀô̆ đô̆i dêh char Gia Lai hlôi apĭnh jet gia pơma dơnuh, hơlêm jơhngơ̆m đon ăn rim kang ƀô̆ ƀô̆ đô̆i năm iung jang ‘măng mă ou. Adoi athei Khul K52 hơnơ̆ng băt hơdăh rim tơdrong tơchơ̆t găh tơgoăt tơgoăl apŭng plĕnh teh, pơm kiơ̆ kơjăp jơhngơ̆m đon bơ̆ jang ƀô̆ đô̆i, rim tơdrong tơchơ̆t đơ̆ng Hơnih tơm Ƀô̆ đô̆i vei lăng sơlam teh đak, kơ Quân khu lơ̆m tơdrong jang tơbôl. Băt hơdăh tơdrong lơ̆m tơring, rim kơtơ̆ng ang găh lŏk pơsat ƀô̆ đô̆i lôch dŏng teh đak, sơđơ̆ng băt hơdăh rim kơtơ̆ng ang đei hơlen mă brĕ.