Hơnih bơ̆ jang Kuô̆k hô̆i hlôi ăn tơgop nơ̆r tơl hơdăh, tơgoăt iŏk, hơmet ming trong vă pơjing Khôi luơ̆t Tang găn hơlou, pĭt ŭnh sa păng tơgŭm dŏng. Pơtêng hăm trong vă pơjing Khôi luơ̆t pơtruh ăn tơ̆ ‘Măng hop akŏm mă 7, trong vă pơjing Khôi luơ̆t ou đei tơchơ̆t 1 apăng hơdrô̆ gah tang găn hơlou hăm hnam oei; 1 păng hơdrô̆ găh tang găn ŭnh sa hnam oei mơdro sa; Tơmơ̆t dơ̆ng tơchơ̆t hăm ƀar kơ loăi hnam oei ou sơđơ̆ng tơdrong trŏ lăp sơđơ̆ng tang găn ŭnh sa, pĭt ŭnh sa, lĕch veh. Mă lei, kiơ̆ đơ̆ng Kơdră chĕp pơgơ̆r Hơnih bơ̆ jang Khôi luơ̆t Nguyễn Trường Giang, rim tơdrong tơchơ̆t ou oei tim mă sele, tơnap mă jang kiơ̆ trŏ lăp hăm hơnih bơ̆ jang khôi luơ̆t păng kon pơlei:"Bơ̆n đei tơchơ̆t ‘noh đei kmăi tơbăt ăn ŭnh sa, kmăi kmŏk tơlĕch ‘nhui ŭnh sa, hơyuh pơnhul kiơ̆ tơdrong tơchơ̆t. Mă ƀar  ‘nou jĭ trong jang hrei ou đei lơ mă kăl tơ̆ rim tơring kơdrơ̆m, rim hnam trong kơphô̆ jei đei găh tơdrong oei hloi tĕch mơdro tơmam drăm hloi. Tơdăh ưh kơ đei tơchơ̆t hơdăh lei kăl pơjao ăn Khul kơdră chĕp pơgơ̆r Teh đak dăh mă Kơdră chĕp pơgơ̆r Hơnih tơm Kŏng ang tơchơ̆t".

Rim kơdră jang lơ̆m Hơnih bơ̆ jang Kuô̆k hô̆i pơma hơdăh tơdrong mơmat tat lơ̆m tang găn ŭnh sa, pĭt ŭnh sa hăm hnam tăl kơjung. Kơdră chĕp pơgơ̆r Hơnih jang vei lăng Joh ayŏ Pơtho pơhrăm Nguyễn Đắc Vinh athei:“Hnam tăl kơjung ‘noh tôch kơjung, akŏm đei lơ bơngai. Tơdăh đei tơdrong ŭnh sa lei tơnap mă iung jang dŏng tơgŭm. Kơna mă ‘lơ̆ng hloh ‘noh kăl đei trong jang tang găn hơlou lei ‘lơ̆ng hloh. Mă lei tơdrong mă ƀar ‘noh rim tơmam drăm pơ yua ăn jang tang găn hơlou pĭt ŭnh sa ăn hnam tăl kơjung mơmat tat, kăl tơchơ̆t mă hơdăh hloh dơ̆ng tơdrong ‘nou".

Găh Kơ iĕng Kơdră chĕp pơgơ̆r Kuô̆k hô̆i Trần Quang Phương ‘noh sơkơ̆t hơdăh.“Đĭ đăng rim kơ loăi hnam tăl kơjung jei kăl trŏ lăp hăm tơdrong pơkăp ‘lơ̆ng. Mă lei hrei ou hnam oei akŏm tăl kơjung oei jing tơdrong kăl lăng ba hloh ‘noh tơchơ̆t găh tang găn hơlou, pĭt ŭnh sa. Pơtih gia đei lơ hnam oei akŏm ming man tơ̆ trong koeng iĕ, ưh kơ đei trong tih vă gre jang pĭt ŭnh gơ̆h năm truh. Lăp đei mĭnh ƀar hơnih hnam tăl oei akŏm hrei ou kiơ̆ ƀlep tơdrong tơchơ̆t tơ iung pơjing tơring kơdrơ̆m ‘noh đei".

Jei lơ̆m giĕng ou ki, mưh ăn tơgop nơ̆r găh tơdrong tơblang hơdăh, tơgoăt iŏk, hơmet ming trong vă pơjing Khôi luơ̆t Thuê̆ kơjă tŏk măt (hơmet ming), Hơnih bơ̆ jang Kuô̆k hô̆i akhan, tơdrong tơplih thuê̆ tĕch tơlĕch phŏng đơ̆ng 0% jing thuê̆ 5% ‘noh bơngai kon pơlei choh jang sa gô chiu pŭ tih tên hloh truh kơjă phŏng gô tŏk măt, pơm ăn truh atŏk kơjă tơmam drăm choh jang sa. Kơdră chĕp pơgơ̆r Jơnŭm vei lăng kon kông Y Thanh Hà Niê K'đăm pơma hơdăh:"10 sơnăm ou, kơjă phŏng ưh kơ tơjur. Kiơ̆ tơbăt, găh phŏng pơm tơlĕch đei lơ mă lei kơjă ưh kơ tơjur păng kon pơlei choh jang sa ‘noh chiu pŭ tơm hloh. Đe lăng kơjăp găh phŏng ‘lơ̆ng, kiơ̆ kơ ĭnh tơchĕng ‘nou jĭ tơdrong jang mă Teh đak lơ̆m vei lăng kăl lăng hơlen kơjăp hloh dơ̆ng".

Mă lei, kiơ̆ trong chă hơlen đơ̆ng Jơnŭm Mơdro sa Kmăi kmŏk Việt Nam, ƀok Đậu Anh Tuấn tơbăt, tơdrong tơmơ̆t phŏng lơ̆m tơdrong thuê̆ tĕch tơlĕch 5% jei hoei pơm ăn kon jên pơm tơlĕch phŏng măt:"Tơdrong gơ̆h pơm tơlĕch phŏng kơ bơ̆n jĭ tôch kơtang, kơna tơdăh pơlăp jang kiơ̆ thuê̆ 5% lei jei răt tơmơ̆t phŏng đơ̆ng teh đak đe jei gô chiu pŭ thuê̆ 5%, lơ̆m teh đak kon jên pơm tơlĕch tơjur. Lơ loh phŏng lơ̆m teh đak pơm tơlĕch gô ưh kơ gơ̆h tŏk măt păng đei ‘măng gô đei tĕch răt lơ dơ̆ng. ‘Nou jei jing mĭnh trong kăl pơm lơ liơ bơ̆n gơh pơm tơlĕch phŏng păng jei vei kơjăp hơnih jang pơm tơlĕch phŏng lơ̆m teh đak".

Pơma pơtôch hop akŏm joăt joe khôi luơ̆t khei 8, Kơdră chĕp pơgơ̆r Kuô̆k hô̆i Trần Thanh Mẫn athei rim hơnih bơ̆ jang pơm pơkeh 10 trong vă pơjing khôi luơ̆t vă pơtruh hla bơar ăăn Hop akom Kơdră kơpal tang măt Kuô̆k hô̆i, gô vă pơgơ̆r lơ̆m năr 28-30/8. Kơdră chĕp pơgơ̆r Kuô̆k hô̆i tơbăt, ‘măng hop akom mă 36 kơ Hơnih bơư̆ jang Kuô̆k hô̆i gô pơgơ̆r lơ̆m năr 19-22/8, tơdrong tơm kăl lăng kơjăp tơ̆ ‘măng hop akŏm ou ‘noh Hơnih bơ̆ jang Kuô̆k hŏi gô apĭnh hơlen hăm 3 ‘nu Kơdră  dơnơm:"Hop akŏm mă 36, apĭnh tơl nơ̆r apĭnh kơ rim Hơnih tơm, hơnih bơ̆ jang. Kơdră chĕp pơgơ̆r Kuô̆k hô̆i, Kơdră chĕp pơgơ̆r păng rim Kơ iĕng Kơdră chĕp pơgơ̆r hlôi chĕp pơgơ̆r rim hơnih tơm, hơnih jang hăm Khul kơdră teh đak vă hơmet ăn ‘măng apĭnh păng tơl nơ̆r apĭnh ou. Lơ̆m ou, Hơnih tơm vei lăng Choh jang sa păng Atŏk tơ iung tơring tơrang, Hơnih tơm vei lăng Mơdro sa, Hơnih tơm vei lăng Joh ayŏ kơdŏ soang, Đă ƀŏng lŏng tơplŏng kơdou păng Tơmang pơhiơ̆” gô tơl nơ̆r apĭnh".