Đơ̆ng hơdrin tơplih ‘nao, hơdrin pơm pơdrŏng kơtă tơ̆ pơlei pơla kơdih, đơ̆ng rŏng khei năr mơmat tat, atŭm hăm tơdrong pơtrŭt hơlêm jơhngơ̆m đon đơ̆ng khul kơdră Đảng, kơdră tơring, ‘nhŏng Y Hưng Niê, đảng viên chi ƀô̆ Buôn Trăp, tơring Ea HĐĭng, apŭng Cư M'gar, Dak Lăk hlôi pơjing Hơp tak xah choh jang sa mơdro sa tơring Ea HĐĭng. Vang jang lơ̆m hơp tak xah ‘noh dôm đoàn viên, hơdruh tơdăm hơbĕh hơbal, hơdrin hŏk pơhrăm, jang kiơ̆ khoa hŏk lơ̆m choh jang sa. Đơ̆ng rŏng hloh 3 sơnăm pơjing, truh dang ei, hơp tak xah hlôi hơvơn đei 25 ‘nu bơngai jang tơpă păng hloh 500 ‘nu bơngai jang hơdoi. Lơ trong jang ‘nao, trong jang hơ iă hlôi hơnhăk đei iŏk yua kơjăp. ‘Nhŏng Y Hưng Niê tơbăt, hăm dôm trong jang nhen: rong kron pơbe, jơmŭl ƀa mir, jang chehphe, tiu, sâu riêng rơgoh ‘lơ̆ng, mĭnh sơnăm, mĭnh ŭnh hnam vang jang lơ̆m hơp tak xah jang sa iŏk đei đơ̆ng 50 triu hlak jên truh 1 ti hlak jên:“ Tơdrong atŏk tơ iung mŭk drăm kơ tơring tôch kơ gĭt kăl, mă kăl ‘noh mŭk drăm tơpôl, atŏk tơ iung găh choh pơtăm, rong kon tơrong, tơmang pơhiơ̆ cham char pơlei pơla. ‘Meh vă ‘noh ba gô tơgŭm ăn bơngai lơ̆m khul atŏk tơ iung dôm trong jang đei iŏk yua kơjăp ăn kơ dih păng tơring. Mă kăl hloh dơ̆ng ‘noh hơp tak xah đei 1 chi ƀô̆ găh đảng ƀô̆ tơring Ea HĐinh vă pơchoh trong tơgŭm ăn kon pơlei atŏk tơ iung dơ̆ng”.

Tơchĕng lơ liơ, iung jang lơ loh hloi ‘noh nơ̆r chă hơlen đơ̆ng kon pơlei thĭ trân Quảng Phú, apŭng Cư Mgar, dêh char Dak Lăk ‘măn ăn kơ ‘nhŏng Dương Văn Ngọc, mĭnh ‘nu đảng viên sơnăm mơlôh, jĭ bơngai gơ̆h hơgei lơ̆m rim tơdrong jang pơting dih băl jang sa. ‘Nhŏng Ngọc tơbăt: lăng ƀôh đe chă răt iŏk lơ dôm tơmam drăm rơgoh ‘lơ̆ng, sơnăm 2019, ‘nhŏng hlôi tơplih 4ha chehphe kră krŭt vă pơtăm sâu riêng hăm tuh mơ̆r, atŭm hăm tơruih đak pơkom đak. Truh dang ei, trong jang pơtăm sâu riêng tuh mơ̆r kơ ‘nhŏng ‘măng mă blŭng sơkơ̆t hơdăh đei jơnei mưh kon jên tơmơ̆t jang tơjur hloh 20%, mă lei găh plei, plei ‘lơ̆ng ‘noh tŏk hloh ƀar ‘măng. Kiơ̆ đơ̆ng ‘nhŏng Dương Văn Ngọc, jĭ đảng viên kơna ba hơdrin pơm jŭk yŭk trong hơlau lơ̆m rim tơdrong, vă kon pơlei ƀôh pơm kiơ̆.“ Mưh ba vang iung jang lơ̆m rim tơdrong jang kơ Đoàn, kơ Đảng ‘noh ba hŏk pơhrăm đei dôm trong jang hơ iă kơna ba pơm kiơ̆ lơ̆m tơdrong jang lơ̆m ŭnh hnam hloi. Lơ̆m khei năr kơnh, ba gô hơdrin hơmet pơ ‘lơ̆ng tơdrong jang lơ̆m ŭnh hnam păng rim tơdrong jang au to vă dôm tơdrong jang au đei keh đang ‘lơ̆ng hơ iă ngăl”.

Ư̆h khan lăp hơdrô̆ pơm jŭk yŭk trong hơlau lơ̆m atŏk tơ iung mŭk drăm ŭnh hnam, dôm đảng viên đei ƀôh ƀiơ̆ oei vang jang lơ̆m tơdrong jang tơra kon jên, pơjing jên mong ăn dôm ŭnh hnam tơnap tap chă tŏk iŏk ưh kơ ăn jên cheh. Đơ̆ng kon jên au, lơ ŭnh hnam hlôi đei kon jên tơmơ̆t jang sa, yak hloh tơnap tap, hơdrin yak hloh dơnuh hin. Tơ̆ phương Đoàn Kết, thĭ xah Buôn Hồ, dêh char Dak Lăk, ƀok Hà Ngọc Cẩn, đảng viên Chi bộ koeng kơphô̆ 2 ‘noh mĭnh lơ̆m dôm đảng viên vang iung jang lơ̆m tơdrong jang au. Ƀok Cẩn tơbăt, mă đơ̆ng kon jên chă tơra tơgop ưh kơ lơ, mă lei hăm trong “ Hơdrin chă tơgŭm dih băl”, dôm đảng viên nhen ƀok ‘meh vă vang tơgŭm tŏ sĕt ăn rim ŭnh hnam hơdrin jang sa yak hloh dơnuh hin.“Tơ̆ au găh lơ kon pơlei choh jang sa, đei ŭnh hnam đei kon jên ‘noh răt ăn jên hloi, đei ŭnh hnam chă tŏk iŏk hơdrol mưh truh pơyan phĕ, chă tĕch tơmam drăm ‘noh đe sư mă năm ba ăn. Kơ yuơ lơ loh, ƀôh kon pơlei tơnap tap lơ loh kơna bơ̆n jei chă tơgŭm tŏ sĕt ăn kon pơlei tŏk iŏk mă lei ưh kơ iŏk jên cheh”.

Đơ̆ng dôm tơdrong jang ‘lơ̆ng ‘noh, lơ đảng viên tơ̆ Dak Lăk hlôi iung jang ‘lơ̆ng hơnăp jang pơm jŭk yŭk trong hơlau, đei jing dôm kang ƀô̆ hơgei, dôm kon pơlei pơm jŭk yŭk trong hơlau lơ̆m choh jang sa, xut xa pơngot rơvĕt, tơjur dơnuh, atŭm dih băl tơ iung pơjing pơlei pơla ‘lơ̆ng rŏ hơbŏ nhen, pơdrŏng ‘lơ̆ng liĕm.