Pơtôch jang ƀa phang sơnăm ou, Hơp tak xah Tĕch răt tơmam drăm Choh jang sa Nhật Minh, oei tơ̆ tơring Bình Hòa, apŭng Krông Ana, dêh char Dak Lăk hlôi kech yô̆ đei hloh 3.600 tân ƀa, đei plei tŏk 15% pơtêng hăm sơnăm sơ̆. Ƀok Nguyễn Văn Tưởng, Kơdră chĕp pơgơ̆r Hơp tak xah tơbăt, Hơp tak xah hlôi đei 4 sơnăm hơdrin pơjing hơnăn “Phe Krông Ana”, phe ou hlôi iŏk đei pơkăp ‘lơ̆ng OCOP 4 sao. Mă lei, 90% ƀa mă Hơp tak xah jang đei, oei tĕch hơyoh ăn kơ đe hăm kơjă kiơ̆ kơjă tĕch răt. Kiơ̆ đơ̆ng ƀok Tưởng, tơdrong tơm pơm ăn phe 4 sao kơ Hơp tak xah ưh kơ ƀôh kang bang kơl tơ̆ lơ hơnih tĕch răt ‘noh tơdrong chă ot phe ƀa tim gan kĕ.  “Hrei ou Hơp tak xah tim mă đei kon jên vă răt kmăi kmŏk sơ̆k hơdrĕng. Rim kmăi kmŏk hơdrĕng sơ̆k tơ̆ ou tim ‘lơ̆ng kơna mưh sơ̆k hơdrĕng ‘noh gô pơm ăn kơ phe ưh kơ ƀou phu, pơm ăn phe krĕnh. Kơna Hơp tak xah tŏk bŏk iung jang hăm trong chă sơ̆k tơ̆ tŏ, sơ̆k hrĕng, tăh lơ̆m hnam păng chă ot dar deh”.

Kiơ̆ đơ̆ng ƀok Nguyễn Văn Tưởng, mă đơ̆ng đei đe chă apĭnh răt iŏk lơ, mă lei yuơ tim mă kĕ kơna Hơp tak xah ưh kơ pơ̆n drơ̆ng nơ̆r. ‘Nou jei jing dôm tơdrong lei lăi tơ̆ apŭng Krông Ana, mĭnh lơ̆m tơring đei chŭn na ƀa đak să hloh lơ̆m dêh char Dak Lăk. Hăm vă jê̆ 6.000ha ƀa phang, apŭng Krông Ana kĕch yô̆ đei vă jê̆ 40.000 tân ƀa. Mă lei, lơ̆m apŭng lăp đei 10 hơnih sơ̆k ot phe hăm kmăi kmŏk lơ̆m mĭnh năr chă ot đơ̆ng 8 – 14 tân păng 40 hơnih kmăi ot ƀa iĕ. Lơ̆m ou, lăp đei 1 hơnih đei kmăi sơ̆k ƀa păng 28 hơnih đei kmăi kmŏk um rơgoh phe. Kơ yuơ lơ loh, lăp sơđơ̆ng ăn tơdrong chă ot ƀa ăn rim ŭnh hnam, tim mă kĕ vă chă ot phe tĕch mơdro ăn kơ đe kiơ̆ pơkăp tĕch răt dih băl lơ.

Jei lei lăi, tơ̆ apŭng Lăk, chŭn na chă rei pơtăm ƀa rim sơnăm hloh 13.000ha, mă lei lơ̆m apŭng ‘nao đei 2 hơnih ot ƀa lơ̆m minh năr ot đei 10 tân păng 80 hơnih ot ƀa iĕ. Kơ yuơ lơ loh, đĭ đăng ƀa lơ̆m tơring jang đei chă tĕch ăn kơ đe. ‘Nhŏng Nguyễn Văn Tình, bơngai chă răt ƀa tơ̆ apŭng Lăk tơbăt:“Dôm sơnăm tơjê̆ au dôm bơngai mơdro đơ̆ng Miền Tây năm tơ̆ ou jei chă răt phe ƀa kơ Dak Lăk tôch kơ măt. Tơpă yan ou ‘noh kon pơlei tĕch ƀa hloi vă hơnhăk ba ăn rim dêh char Miền Tây đei kmăi kmŏk ‘lơ̆ng hloh”

‘Nhŏng Y Suk Ênuôl, oei tơ̆ Ƀuôn Tría, tơring Ƀuôn Tría, apŭng Lăk akhan, dôm sơnăm tơjê̆ au kơjă ƀa măt hlôi tơgŭm ăn rim ŭnh hnam jang ƀa đei iŏk yua kơjăp. Mă lei tơdăh đei hnam kmăi ot phe ƀa rơgoh ‘lơ̆ng hloi kơtă tơ̆ ou lei rŏ năng gô pơm ăn phe ƀa tơring bơ̆n dou măt hloh ƀiơ̆.“Hrei ou, chă jang ƀa ‘noh kon pơlei tĕch ƀa hloi, tơdrong chă chơ pơdŭ, preh ƀa ‘noh hlôi pơkăp dih băl đĭ bơih kơna chă kĕch yô̆ ƀa jei ƀônh hloh, trong chŭn na hlôi đei ming man ‘lơ̆ng. Kon pơlei hơpơi ‘meh vă đei hnam kmăi chă răt iŏk ƀa kơtă tơring bơ̆n hloi vă kon pơlei chă tĕch ƀônh hlot ƀiơ̆”.

Mĭnh sơnăm, dêh char Dak Lăk jang 100.000ha ƀa, kĕch yô̆ đei 800.000 tân. Ƀok Trần Trọng Lưu, Kơdră Hơnih vei lăng tĕch mơdro găh Hơnih vei lăng Mơdro sa dêh char Dak Lăk tơbăt: tơ̆ dêh char hlôi pơjing hơnăn phe ƀa kơ rim hơnih mơdro sa păh ai păng iĕ, akŏm tơ̆ rim apŭng Lăk, Krông Ana, Krông Pach, Ea Kar, Ea Súp, mă lei phe ƀa jei ưh kơ măh lơ dôm yơ. Truh dang ei, dêh char oei tim mă đei trong jang ayơ tơmơ̆t jên jang lơ̆m pơm tơlĕch phe ‘lơ̆ng. Găh lơ ƀa kơ Dak Lăk lăp chă sơ̆k đang ‘noh tĕch mơdro, tim mă đei tơgoăt dih băl lơ̆m choh jang sa-pơm tơlĕch-tĕch mơdro.

Jei kiơ̆ kơ ƀok Lưu, dêh char hlôi pơjing Trong pơprŏ jang hơmet ming choh jang sa kơ dêh char jăl jang 2021-2025 păng Tơdrong vă jang atŏk tơ iung jang kmăi kmŏk pơm tơlĕch tơmam drăm ‘lơ̆ng kơ dêh char jăl sơnăm 2021 - 2025, lăng truh sơ năm 2035, lơ̆m ou sơkơ̆t hơdăh phe ƀa ‘noh tơmam drăm tơm hloh kơ dêh char.“Rim sơnăm dêh char pơjing dôm trong jang krao hơvơn tơmơ̆t jên jang, lơ̆m ou đei tơdrong vă jang pơm tơlĕch phe ‘lơ̆ng adoi nhen rim tơmam drăm choh jang sa ‘lơ̆ng kơ dêh char. Atŭm hăm ‘noh, hơnih jang vei lăng mơdro sa jei hlôi tơlĕch jang kiơ̆ Tơdrong vă jang “Pơm tơlĕch ‘lơ̆ng rim tơmam drăm choh jang sa păng kmăi kmŏk pơm tơlĕch tơmam drăm jăl sơnăm 2021-2025, lăng truh sơnăm 2030”, akŏm krao hơvơn tơmơ̆t jên jang adoi nhen tơgŭm djru rim hơnih mơdro sa păng hơnih tơlĕch jang kiơ̆ tơdrong vă jang”.

Hăm rim pơchoh trong ou, dêh char Dak Lăk hơmŏ rim hnam kmăi tih đei ming man tơ̆ rim tơring jang chŭn na ƀa đak tơm hloh kơ dêh char. Đơ̆ng mă noh gơh pơm tơlĕch ‘lơ̆ng phe ƀa, pơm hơtŏk ‘lơ̆ng, lăng truh tĕch mơdro tơ̆ teh đak đe, tơgop pơm hơtŏk đei jơnei lơ̆m choh jang sa păng atŏk tơ iung phe ƀa kơjăp ‘lơ̆ng tơ̆ tơring.