Hơnih tơm vei lăng Choh jang sa păng Atŏk tơ iung tơring tơrang hăm Hơnih tơm bơ jang Vei lăng tĕch răt tơmam drăm hăm teh đak đe kơ Trung Quốc ‘nao kĭ Tơdrong tơchơ̆t kơthơ găh pơkoel rơgoh ‘lơ̆ng tơmam drăm hăm sâu riêng pơkrot kơ Việt Nam tĕch tơ̆ teh đak Trung Quốc. Hăm Tơdrong tơchơ̆t kơthơ ‘nao đei kĭ pơkăp, tơdra hơdrol tĕch mơdro sâu riêng pơkrot kơ Việt Nam lơ̆m sơnăm 2025 rŏ năng gô iok đei 300 triu dolar Mi. Tơ̆ Dak Lăk, dêh char đei hơgăt teh păng plei sâu riêng lơ dơ̆ng mă 2 lơ̆m teh đak, dêh char ou tŏk bŏk hơdrin hơmet ăn, sơđơ̆ng trŏ lăp hăm nơ̆r pơkoel vang iung jang tĕch mơdro tơ̆ teh đak đe mưh Tơdrong tơchơ̆t kơthơ đei tơlĕch jang kiơ̆. Dak Lăk đei vă jê̆ 33.000ha sâu riêng, lơ̆m sơnăm phĕ iŏk plei đei hloh 280.000 tân. Lơ̆m dêh char hlôi đei 23 hơnih tăh ‘nŭng păng 68 tơring pơtăm hlôi đei ƀơk ăn mã kơsô̆ tơgŭm ăn tĕch mơdro tơ̆ teh đak đe plei sâu riêng năm tơ̆ teh đak Trung Quốc. Tơdrong Hơnih tơm vei lăng Choh jang sa păng Atŏk tơ iung tơring tơrang hăm Hơnih tơm bơ̆ jang Vei lăng tĕch răt tơmam drăm hăm teh đak đe kơ Trung Quốc kĭ pơkăp Tơdrong tơchơ̆t kơthơ găh tĕch mơdro sâu riêng pơkrot hlôi pơih đei lơ tơdrong rơvơn ăn tơdrong jang sâu riêng Việt Nam pơma atŭm, Dak Lăk pơma hơdrô̆.