Năr lêh đei pơgơ̆r đơ̆ng ‘năr 31/8 truh 2/9, đei 12 tơdrong jang tơm. Hăm tơdrong adrin hơmet tôch ‘lơ̆ng đơ̆ng dôm anih jang đei ƀơm truh, truh dang ei, dôm tơdrong jang ăn lêh đei pơgơ̆r trŏ năr hơgăt. Mĭnh lơ̆m dôm tơdrong jang tơm ‘nŏh jĭ Lêh pơih blŭng (lơ̆m gơmăng 31/8) kŭm oei hăt hơmet pơkĕh dôm tơdrong mă hơtuch.

Đơ̆ng rŏng kơ lêh pơih blŭng ‘nŏh jĭ tơdrong hơri hơxoang hăm hlŏh 400 ‘nu bơngai vang akŏm. Kiơ̆ trong pơm tông hơdai hăm hơri hơxoang chăl hle gô roi tơƀôh găh tơring teh Krông Pach đei lơ tơdrong ‘lơ̆ng rŏ. Lơ̆m lêh Sầu riêng Krông Pach ‘măng mă âu, lơ tơdrong jang đei pơyoa ăn kon pơlei păng tơmoi truh lăng đei pơgơ̆r tih ƀiơ̆ nhen: Lêh yak pơrŏ tơ̆ trong glung, thi kơdâu yoa jơhngâm pran tơpôl, năr tơmam xa kơ dôm hơdrĕch hơdrung… Lơ̆m noh, tơdrong pơih nhak đak đei lơ bơngai gô chang hlŏh, vă pơih lơ̆m 60 pơnĭt 1 măng; pơih nhak hơdai hăm pơm pơrŏ đak, ƀĕnh kơmâu ‘lơ̆ng rŏ.