Tŏk bŏk chă hiĕm 2 tŏ rơmo yŏng Sind đơ̆ng teh đak tơgŭm ăn đunh kơ ou 1 khei lơ̆m tơdrong vă jang pơjing tơdrong jang sa atŏk tơ iung trong jang tơjur dơnuh găh Tơdrong jang tơm Teh đak tơjur dơnuh kơjăp ‘lơ̆ng jăl sơnăm 2021 – 2025, ƀok Trần Ngọc Phương oei tơ̆ tơring Thuận Hòa, apŭng Châu Thành ưh kơ kĕ kơ ôn jơhngơ̆m đon chơt hơ iă, kơ yuơ hăm tơdrong tơgŭm djru ou, ŭnh hnam ƀok đei dơ̆ng rơvơn jang sa vă sơđơ̆ng hơrih sa. Dang ei ƀok Phương pơtăm dơ̆ng ‘ngiĕt hiĕm rơmo, adoi mơng teh đe dang pêng sao pơtăm ‘long tăo hồng hăm hơmŏ ŭnh hnam gô jang sa iŏk yua kơ jăp, hrôih yak hloh dơnuh hin. Ƀok Trần Ngọc Phương, tơbăt: Đei teh đak tơgŭm djru ba gô hơdrin hloh dơ̆ng, jang sa lơ liơ hơnhăk đei iŏk yua kơjăp hloh. Ba jei hlôi pơtăm ‘ngiĕt bơih, găh hơdroong hlôi ming man đang, găh kih thuơ̆t rong ‘me ‘noh tŏk bŏk hŏk pơhrăm”.

Tơdrong jang tơm teh đak tơjur dơnuh kơjăp ‘lơ̆ng, Tơdrong jang tơm Teh đak tơ iung pơjing tơring tơrang ‘nao, Tơdrong jang tơm Teh đak atŏk tơ iung mŭk drăm-tơpôl tơring kon kông, atŭm hăm lơ tơdrong jang, tơdrong vă jang, trong jang tơgŭm djru kon kông anai rim hơnih jang lơ̆m dêh char Sóc Trăng pơrô̆ tơlĕch jang kiơ̆ iŏk đei jơnei hơ iă. Đơ̆ng noh, hlôi tơgop tơgŭm ăn ŭnh hnam dơnuh, vă jê̆ dơnuh pơma atŭm, ŭnh hnam dơnuh, vă jê̆ dơnuh kơ kon kông pơma hơdrô̆ roi năr roi hơmet pơ ‘lơ̆ng hơrih sa, atŏk tơ iung mŭk drăm, hơdrin yak hloh dơnuh hin.

Năm tơ̆ apŭng Trần Đề hrei ou, nhôn ƀôh tơdrong tơplih tih tên tơ̆ tơring kon kông. ‘Noh găh gơng, trong nơnăm pơlei pơla roi năr roi ‘lơ̆ng liĕm, kơjăp ‘lơ̆ng. Hơdrô̆ lơ̆m jăl sơnăm 2019 – 2024, apŭng hlôi tơ iung pơjing ‘nao đei 519 tơdrong jang, keh đang păng tơmơ̆t iŏk yua 451 hơnih jang. Lơ hơnih jang pơyua ăn tơpôl hlôi jang keh đang păng tơmơ̆t iŏk yua đei jơnei hơ iă, tơgop pơm pơtrŭt kơtang atŏk tơ iung muk drăm-tơpôl, pơm tơplih ‘nao pơlei pơla. Ƀok Thạch Soi, kon pơlei oei lơ̆m ăp Hội Trung, thĭ trân Lịch Hội Thượng, chơt hơ iă pơma: “Teh đak lăng ba tôch kơ jăp truh hăm kon pơlei, mă kăl kon pơlei kon kông. Mă hơdăh, sơ̆ trong ou lăp să 2 met, dang ei pơih să truh 3 met, kon pơlei jei tôch lăp đon, plang teh ăn teh đak pơm trong, đơ̆ng noh tơdrong chă yơ yak kơ kon pơlei rơvơn, kôn mon kon sou năm hŏk jei hiôk hian hloh”.

Đơ̆ng kon jên klăh asong hloh 103 ti hlak jên đơ̆ng Tơdrong jang tơm Teh đak atŏk tơ iung mŭk drăm-tơpôl tơring kon kông păng Tơdrong jang tơm teh đak tơjur dơnuh kơjăp ‘lơ̆ng jăl jang 2021 – 2025; apŭng Trần Đề hlôi tơgŭm hnam oei ăn 344 ŭnh hnam, tơgum teh oei ăn 37 ŭnh hnam, tơplih tơdrong jang sa ăn hloh 360 unh hnam, tơgŭm đak sŏ nhă rơgoh ăn hloh 190 ŭnh hnam; Tơmơ̆t jên jang ming man 28 tong gơng, trong nơnăm pơlei, ăp, tơring tơnap tap. ‘Ngoăih kơ ‘noh, tơ iung pơjing păng ming hơmet kơchơ kon kông, tơgŭm atŏk tơ iung choh jang sa, jang sa kon pơlei, pơtho tơdrong jang ... Ƀok Trịnh Văn Bé, Kơ iĕng Kơdră Hơnih vei lăng kon pơlei apŭng Trần Đề tơbăt, apŭng sơkơ̆t hơdăh bơ̆ jang vei lăng kon kông păng trong jang tơgum djru kon kông ‘noh tơdrong jang kăl hloh, kơ yuơ lơ loh, khei năr kơnh, apŭng gô akŏm jang kiơ̆ lơ trong jang vă tơlĕch jang kiơ̆ jơnei hloh dơ̆ng.“Akŏm tơlĕch jang tơmơ̆t jên jang ăn rim tơring, ăp tơnap tap hloh nhen: xek tơchơ̆t tơgŭm ăn teh oei, hnam oei, teh jang sa, đak sŏ nhă; tơgŭm djru atŏk tơ iung choh jang sa lơ trong ăn kon pơlei; tơmơ̆t jên jang trong ou to tơgŭm ăn choh jang sa, hơrih sa ăn kon kông. Hơmet pơ ‘lơ̆ng khul jang chinh trĭ tơring, pơlei, lăng kơjăp pơtho ming, atŏk jơhngơm đon bơ̆ jang ‘lơ̆ng ăn kang ƀô̆, hơtŏk kơtang jơhngơ̆m đon hlôh vao kơ kon pơlei atŭm hăm pơtho tơdrong jang, pơjing tơdrong jang ăn kon pơlei kon kông”.

Kiơ̆ đơ̆ng Ƀĭ thư Đảng dêh char Sóc Trăng Lâm Văn Mẫn, Sóc Trăng hlôi yak hloh jăl jang 2019 - 2024 ƀĕnh ƀang tơnap tap hăm tơdrong tơplih tih tên. Lơ̆m tơdrong ou, hăm tơdrong chĕp pơgơ̆r đơ̆ng kơdră đảng, khul kơdră chĕp pơgơ̆r tơring păng kon pơlei lơ̆m dêh char, mă kăl kon pơlei kon kông hlôi jang kiơ̆ ‘lơ̆ng kiơ̆ yok yok jơ̆ng tơdrong joăt joe tơgoăt tơgoăl pôm nơ̆r ƀơ̆r đon, jơhngơ̆m đon ‘mêm kơ eng teh đak, kơrŭn đĭ ai pơting dih băl jang pran kơtang, yak hloh tơnap tap, tơdrong long, hơnhăk iŏk đei jơnei tih tên. Lơ̆m jăl jang 2019 - 2024, mŭk drăm kơ dêh char hơnơ̆ng tŏk lơ. Hơdrô̆ 6 khei blŭng sơnăm 2024, iŏk đei hloh 6,5%, lơ hloh pơtêng hăm jô̆ hơtŏ lơ̆m teh đak (6,42%), dơ̆ng mă 6 lơ̆m tơring Tơmăn đak kroong Cửu Long. GRDP jô̆ hơtŏ măt bơngai jô̆ truh hơtuch sơnăm 2023 iŏk đei 60 triu hlak jên lơ̆m 1 ‘nu, 1 sơnăm.

Bok Lâm Văn Mẫn jei pơma hơdăh, đơ̆ng kon jên kơ 3 Tơdrong jang tơm Teh đak vang tơmơ̆t jang, tơlĕch jang kiơ̆ jơnei vă tơmơ̆t jên jang, ming hơmet, pơm ‘nao trong nơnăm, tơdrong jang mŭk drăm-tơpôl tơring kon kông, gơnơm đơ̆ng noh, truh dang ei, đĭ đăng tơring jei đei trong glung ‘lơ̆ng; hloh 99% ŭnh hnam tơring kon kông đei iŏk yua ŭnh hơyuh teh đak; ŭnh hnam kon pơlei sŏ nhă đak rơgoh hloh 99,6%. Mă kăl, bơ̆ jang tơjur dơnuh tơ̆ tơring kon kông đei tơplih kơtang; lơ̆m dêh char hlôi tơgŭm djru tơplih tơdrong jang ăn 4.600 ŭnh hnam hăm 67 trong jang sa, tơgop pơjing đei lơ trong jang sa ăn kon pơlei păng tơjur dơnuh kơjăp ‘lơ̆ng. Jô̆ truh hơtuch sơnăm 2023, lơ̆m dêh char oei pă hloh 4.000 ŭnh hnam dơnuh ‘noh bơngai kon kông, tơjur hloh 6.500 ŭnh hnam pơtêng hăm sơnăm 2021.“Ŭnh hnam dơnuh jô̆ hơtŏ tơjur 2% lơ̆m sơnăm; lơ̆m ou, tơjur ŭnh hnam hnam Khmer dơnuh 3%/năm. Rim trong jang tơgŭm ăn jang sa tơpôl đei tơlĕch jang kiơ̆ tơtom, ƀlep bơngai. Lơ̆m jăl jang 2019 - 2024, dêh char hlôi tơgŭm ming man đei 14.826 pơbŭng hnam ăn ŭnh hnam dơnuh, lơ̆m ou đei hloh 6.184 pơbŭng hnam ‘măn ăn ŭnh hnam dơnuh bơngai kon kông ...”.

Dôm tơdrong iŏk đei jơnei ‘noh tơchơ̆t hơdăh tơdrong kơrŭn chinh trĭ păng tơdrong chĕp pơgơ̆r kơtang đơ̆ng Khul kơdră Đảng, khul Kơdră chĕp pơgơ̆r tơring tơrang lơ̆m dêh char Sóc Trăng, ‘ngoăih kơ ‘noh jĭ tơdrong hơdrin, kơrŭn đĭ ai đơ̆ng kon pơlei lơ̆m dêh char, hloh đơ̆ng ou, hlôi pơm tơplih ‘nao ăn tơring kon kông roi năr roi ‘lơ̆ng liĕm.