Anih hơbuh pơrang jĭ klak chroh nhŭng châu Phi đei ƀôh tơ̆ unh hnam jang rong kon tơrong kơ ƀok Bùi Đức Hoạch, tơ̆ Thôn 1, xah Ea Kao, pơlei tơm Buôn Ma Thuột, dêh char Đak Lăk. Unh hnam ƀok Hoạch rong 23 tŏ nhŭng, lơ̆m noh đei hloh mơjĭt tŏ vă jê̆ tĕch tơlĕch. Đơ̆ng iŏk hơlen pham ăn ƀôh khul nhŭng âu dương tĭnh hăm virus jĭ klak chroh nhŭng Châu Phi. Tôm kơsô̆ nhŭng ƀơm pơrang noh akŏm soh ah kơsơ̆ năr (22/8).

Ƀok Hoàng Anh Dũng, Kơdră Anih jang gah hơmet jĭ kon tơrong pơlei tơm Buôn Ma Thuột, dêh char Đak Lăk ăn tơbăt: atŭm hăm kơsô̆ nhŭng athei soh kơlih ƀơm jĭ, anih jang hlôi jang atŭm hăm jơnŭm pơgơ̆r tơring chă tơroi tơbăt ăn rim unh hnam jang rong kon tơrong băt hơdah. Pơgơ̆r bơngai jang gah hơmet jĭ ăn kon tơrong băt hơdah tơring hơbuh pơrang, pơtho ăn bơngai jang rong kon tơrong băt chă yua trong tang găn pơrang păng mưh ƀơm pơrang noh soh hơmet  mă trŏ nhen tơchơ̆t.