Năm tơ̆ dôm pơlei pơla lơ̆m apŭng Châu Thành, dêh char Sóc Trăng lơ̆m dômk năr khei 6 âu, nhôn ƀôh “tơdrong tơplih tôch ‘lơ̆ng” tơ̆ tơring tơrang mă adrol sơ̆ tôch pơmat tat. Nhôn tơƀâp ƀok Danh Mô Ry tơ̆ plei Giồng Chùa A, xăh An Hiệp ƀât ƀok oei choh ‘ngiĕt, vei rong pơkao 2 păh jih trong, ƀok pơma, trong ‘nâu đei pơm hơmet đunh sơnăm bơih, tơƀưh hăm lơ tơring tơ̆ apŭng, nhen xăh An Hiệp, Thuận Hòa, thĭ trơ̆n Châu Thành… pơm ‘lơ̆ng ăn tơdrong yak vih vât, chơ chuĕn tơmam đơ̆ng kon pơlei. Đang kơ ‘nŏh ƀok tơhlâu ti tơ̆ pơkao, ‘long pơrŏ ‘nao đei tơruih đang, trong đei unh điên tơ̆k hơdăh ‘lơ̆ng, tơroi dơ̆ng, dang ei kon pơlei đĭ băt vang vei lăng trong rơgŏh ‘lơ̆ng bơih vă pơjing cham char rơgŏh ‘lơ̆ng tơ̆ pơlei pơla kơ dih.

Ƀok Danh Mô Ry, pơma: “Dang ei trong đei man roi ‘lơ̆ng mă kon pơlei bơ̆n athei đei đon vang vei lăng, pơtăm vei rong pơkao 2 păh jih trong, nhen choh ‘ngiĕt, pruih đak hơnơ̆ng vă pơkao jing ‘lơ̆ng, trong rơgŏh, pơjing đei cham char rơgŏh ‘lơ̆ng ăn pơlei pơla.”

Vă gơ̆h jang đei tơdrong ‘nâu, 1 lơ̆m dôm tơdrong adrin đơ̆ng apŭng Châu Thành ‘nŏh jĭ mặt trận tổ quốc jơ̆p tơring bơ̆ jang ‘lơ̆ng tơdrong krao hơvơn “Đĭ đăng kon pơlei mât 1 ƀơ̆r đon pơjing tơring tơrang ‘nao, tơring kơdrâm rơgei” kiơ̆  trong “Iŏk jơhngâm kon pơlei pơvih ăn tơdrong arih xa kơ kon pơlei”. Kiơ̆ kơ ‘nŏh, lơ̆m 5 sơnăm âu ki, mặt trận tổ quốc jơ̆p tơring lơ̆m apŭng pơgơ̆r, jang hơdoi tưk tơiung, pơih xă lơ trong jang xa đei yoa ‘lơ̆ng nhen: “Kueng kơ phô̆ vei lăng kơdih găh cham char, hơmet pơ ‘lơ̆ng râm rĕk”, “Kueng kơphô̆ tang găn tơdrong yoch, tơdrong glăi lơ̆m tơpôl, tang găn ma túy”,“ ‘Măng jang kon pơlei vei lăng kơdih”,  “Camera vei sơđơ̆ng”, “chơ khoă vei sơđơ̆ng”, “Tơ̆k hơdăh trong pơlei”, pơjing trong ‘lơ̆ng rŏ, jrăng hla kơ Teh đak, pơtăm pơkao pơrŏ…

Mă loi, vang jang hơdoi krao hơvơn kon pơlei vang tơgop jên, tơmam, chĕng song teh, man anih jang, pơm trong, atŏk tơiung mŭk drăm, tơjur tơnuh hin, pơjing tơdrong arih xa ‘lơ̆ng rơgei, vei lăng rơgŏh cham char. Kiơ̆ đơ̆ng noh, krao hơvơn kon pơlei chĕng song 15.000m2 teh, tơgop hlŏh 1,5 ti hlak jên păng hlŏh 19.000 năr jang, vang pơjing tơring tơrang ‘nao. Jô̆ truh đĭ sơnăm 2023, lơ̆m apŭng đei 25.300 unh hnam arih xa ‘lơ̆ng rơgei, iŏk đei hlŏh 98% păng 100% tơring kon pơlei iŏk đei hơnăn tơring arih xa ‘lơ̆ng rơgei.

Ƀok Lâm Hiệp, tơ̆ xăh Phú Tân 1 lơ̆m dôm bơngai vang tơgop lơ ăn tơdrong pơjing tơring tơrang ‘nao: “Man trong pơlei thoi noh kon pơlei tôch hơiă, Đảng, teh đak pơngơ̆t ăn kon pơlei thoi âu kŭm tôch čhôk ‘nă. Tơ̆ trong păih to inh kŭm vang tơgop pơm trong man kơpal bơnơ̆ ăn kon pơlei năm tơ̆ chŭn, inh adrin jang, pơm thoi yơ vă kon pơlei đei trong năm ‘lơ̆ng. Găh âu ‘nŏh gre kơdâu gơ̆h bơih, oei găh to gre gơ̆h năm ‘năi bơih, trong găh âu ăn gre 4 tŏ jơ̆ng, oei trong păih to ăn gre honđa kơdâu đĕch.

Ƀok Lê Hoàng Nuôi, Kơdră Anih MTTQ Việt Nam apŭng Châu Thành ăn tơbăt, apŭng Châu Thành đei hlŏh 50% kon pơlei kon kông arih xa, lơ̆m noh, lơ hlŏh jĭ kon pơlei Khmer. Tơlĕch dôm trong jang, tơdrong tơgŭm đơ̆ng đảng, dôm tơdrong jang, trong tơgŭm ăn kon pơlei kon kông dar dĕh hơnhăk tơdrong arih xa găh tơmam drăm, jơhngâm đon kon pơlei roi tŏk ‘lơ̆ng, mă lei, kŭm đei unh hnam kon pơlei tơtŏ đon găh hnam oei, tơdrong arih xa oei pơmat tat ‘năi. Yoa thoi noh, tơdrong krao hơvơn ăn Anih mong jên “Yoa bơngai tơnuh” hơnơ̆ng đei apŭng tơlĕch jang ‘lơ̆ng. Đơ̆ng sơnăm 2019 truh dang ei, apŭng krao hơvơn păng đei anih jang đơ̆ng dêh char gơih ăn vă jê̆ 29 ti, kŭm hăm dôm xăh, thĭ trơ̆n krao hơvơn đei 1 ti 670 triu hlak jên, apŭng pơgơ̆r man đei 358 tŏ hnam păng pơm hơmet 12 tŏ  hnam. ‘Ngoăih kơ ‘nŏh, tơgŭm hơmet jĭ, răt ƀao hiêm pơgang ăn 390 ‘nu bơngai, akŏm đĭ đăng kơsô̆ jên hlŏh 18 ti, kiơ̆ đơ̆ng noh, tơgop kŭm hăm tơring pơm tơjur ƀiơ̆ unh hnam tơnuh jur pă 2,45%.

Ƀok  Lê Hoàng Nuôi tơroi dơ̆ng: “Mặt trận tổ quốc apŭng adrin tơplih ‘nao tơdrong jang, trong bơ̆ jang vă oei oei ca hơdai ‘lơ̆ng hăm kon pơlei, băt hơdăh kon pơlei păng đei đon jang tơnăp hăm kon pơlei, vei lăng ‘lơ̆ng tơdrong đei yoa tôch tơ găl ăn kon pơlei. Atŭm hăm ‘nŏh mặt trận kŭm tơlĕch jang hrơ̆ch dôm tơdrong jang tơgŭm ăn bơngai đei kŏng, sut pơngot, tơjur tơnuh hin, vang bơ̆ jang tơiung pơjing khul kơdră tơring, vang tơgop nơ̆r tơiung pơjing đảng rơgŏh ‘lơ̆ng, pran kơjăp. ‘Nâu kŭm jing 1 tơdrong jang đơ̆ng mặt trận tổ quốc tơlĕch jang vang pơjing tơring tơrang ‘nao hơdai hăm pơjing tơring kơdrâm rơgei lơ̆m khei ‘năr âu ki.”

Kiơ̆ đơ̆ng Tơdrong krao hơvơn hlôi tơlĕch jang hơdoi lơ tơdrong tôch đei yoa, tưk tơiung tơdrong mât 1 ƀơ̆r đon, đei đon kon pơlei vang tơgŭm, tơgop jơhngâm kŭm hăm Đảng, teh đak, khul kơdră pơgơ̆r tơring tŏk hlŏh dôm tơdrong pơmat tat pơlong nol, vei lăng ‘lơ̆ng tơdrong arih xa tơpôl, tưk tơiung jơhngâm pran đơ̆ng kon pơlei vang tơgop bơ̆ jang kĕh tơdrong jang chinh trĭ, mŭk drăm, jŏh ayŏ kơ dŏ xoang, tơpôl.