Lơ̆m hloh 1 giĕng năm vei hơkăn hơmet tơ̆ Hnam pơgang Đa khoa dêh char Gia Lai, mưh ƀlep 11 jơ ‘năr dơ̆ng, ƀok Nguyễn Thanh (75 sơnăm, oei tơ̆ thôn 2, xăh Ia Hlốp, apŭng Chư Sê) ‘noh trŭh tơ̆ hơnih mơdro Thị Huy vă sŏng por. Ƀok tơbăt, ‘măng sŏng sa đei tôm kơchơ̆t bek ‘lơ̆ng păng oei tŏ, đei por, đâ̆u khuôn, kơtăp iĕr, bip, ‘nhot, đei hloi tơmam sa đơ̆ng rŏng sŏng sa đang ‘noh prit ( dăh mă plei gu ga, đak toh đậu nành) mă lei kơjă lăp 2 rơbâu hlak jên. Tơdăh năr hơyơ ưh kơ chĕp ba jên, ‘noh ưh kơ kăl kla.

Ƀok Nguyễn Thanh tơroi, ưh khan lăp hơdrô̆ ƀok, mă rim ‘năr dơ̆ng rim năr oei đei kơ hrĕng ‘nu bơngai ŭnh hnam bơngai jĭ, bơngai ƀĭch hơmet tơ̆ hnam pơgang truh sŏng sa tơ̆ hơnih tĕch por ‘nâu: “Ĭnh ƀôh đei hơnih tĕch mơdro nhen thoi ‘nâu tơgŭm ăn bơngai jĭ păng bơngai ŭnh hnam tôch kơ gĭt, dă ƀiơ̆ kơ hoach tôch kơ lơ, por sŏng ‘noh rơgoh ‘yâu. Por rơmuăn, tŏ, ‘meh sŏng dôm yơ kŭm gơh, ưh kơ đei pơgăn. Đei đak nhă tôm, kơƀang tang dŏ ‘yâu rơgoh.”

Kŭm hăm hơnih tĕch por 2 rơbâu hlak jên, tơ̆ pơlei tơm Pleiku oei đei por sŏng tơ̆ kơ ‘năr đĕch tơgŭm bơngai jĭ dơnuh hin yua đơ̆ng Grŭp jang tơgŭm ‘mêm mơnat Khŭl jang pơgang GEM asong. Mŏ Trần Thị Mỹ Hằng- tơ ‘ngla vei lăng grŭp jang tơbăt: 2 sơnăm âu ki, 200 ‘nu bơngai ‘noh jĭ bơngai jang pơgang hơnơ̆ng iŏk jên yua rim khei kiơ̆ tơdrong hơgăt “mơ̆ng jơhngơ̆m”. Đơ̆ng jên mong âu, grŭp jang tơlĕch 20 triệu hlak jên 1 khei vă răt dôm ‘măng sŏng sa đĕch tơgŭm dôm bơngai đei tơdrong arih sa mơmat tat: “Nhôn đei 1 hơtuh ƀĕng mi, năr hơyơ kŭm đei. Lơ̆m noh ‘noh đei đơ̆ng 300 truh 400 tŏ ƀĕng mi. Bu truh khăm tă kơ đei gơh iŏk ngăl. Oei tơ̆ kơ ‘năr dơ̆ng ‘noh nhôn pơma dơnuh đei hơnih tĕch por. Đei năr 30 truh 40 kơ suơ̆t, đei năr ‘noh 50 truh 60 kơ suơ̆t vă tơgŭm dôm bơngai tơ̆ tơring tơrang, tơring hơtăih hơtŏ.”

Tơdrong jang ‘mêm mơnat tơgŭm bơngai jĭ dơnuh hin tŏk bŏk lang să kơtang tơ̆ dôm anih jang pơgang tơ̆ pơlei tơm Pleiku, dêh char Gia Lai, sơng đei lơ lap kon pơlei vang jang. ‘Ngoăih hơnih tĕch por 2 rơbâu hlak jên, hơtuh ƀĕng mi, kơsuơ̆t por asong đĕch, oei đei lơ grŭp ‘mêm mơnat asong chao ăn kơ bơngai hơioh jĭ, bơngai jĭ kơdâu plei lĕn... Lơ bơngai jang kiơ̆ hăm trong tơra phe, tơmam ƀoh ngot ăn kơ dôm hơnih pai gŏ, grŭp ‘mêm mơnat. Mŏ Nguyễn Thị Dung, oei tơ̆ phường Ia Kring, pơlei tơm Pleiku, tơbăt: “Ĭnh đei yă kiơ ‘noh tơgŭm yă ‘nei. Ĭnh tơgŭm ăn hơnih pai gŏ 1 kơ chai đak kho 5 kơ lich, 2 kĭ ƀôt nêm păng 2kĭ ƀôt ngot. Rim bơngai vang tơgŭm ‘noh dôm bơngai jĭ oei tơ̆ hơtăih, bơngai ŭnh hnam bơngai jĭ kŭm dă ƀiơ̆ đei tŏ sĕt.”

Kŭm hăm tơdrong tơgŭm đơ̆ng kon pơlei, khŭl kơdră dôm xăh phường tơ̆ pơlei tơm Pleiku, Gia Lai kŭm tơgŭm, pơm tơdrong hiôk vă tơdrong jang ‘mêm mơnat đei tơlĕch jang hiôk păng ‘lơ̆ng ƀiơ̆. Ƀok Đỗ Trung Hùng- Kơdră Anih vei lăng kon pơlei phường Phù Đổng- pơlei tơm Pleiku, hơnih đei lơ hơnih jang pơgang păng dôm tơdrong jang ‘mêm mơnat, tơbăt: “Nhôn kŭm hlôi băt, pơtho hơnih jang kăl kơ mă rơgoh vă vei sơđơ̆ng tơmam sa rơgoh, păng răt tơmam sa. Khŭl pai gŏ kăl kơ pơm hla ar pơhrăm vă đei hla ar pơkăp tơmam sa rơgoh. Đei lơ ŭnh hnam tôch kơ mơmat tat. Lơ bơngai, tơpôl jang tơgŭm ‘mêm mơnat tơgŭm ăn bơngai jĭ ‘noh tơdrong tôch kơ ‘lơ̆ng, tôch kơ kăp gĭt”.