Tơdrong tơchơ̆t găh pôk tơmơ̆t ƀok Trần Thanh Mẫn iŏk jang kơchư̆k Kơdră chĕp pơgơ̆r Kuô̆k hô̆i jăl XV hlôi đei rim kơdră tang măt Kuô̆k hô̆i pơdrơ̆ng kiơ̆ hăm 475/475 ‘nu kơdră vang năm pơdrơ̆ng nơ̆r hlôi drơ̆ng (tơmơ̆t 97,54% akŏp măt bơngai Kơdră tang măt Kuô̆k hô̆i). Kơdră chĕp pơgơ̆r Kuô̆k hô̆i Trần Thanh Mẫn pơma pơkăp:“Tơ̆ hơla hla kơ ƀrê hơnglŏng dreng gĭt kăl kơ Teh đak, tơ̆ hơnăp Kuô̆k hô̆i păng kon pơlei bơngai tăh hla lơ̆m teh đak, ĭnh-Kơdră chĕp pơgơ̆r Kuô̆k hô̆i teh đak CHXHCN Việt Nam pơma pơkăp: Ling lang mĭnh jơhngơ̆m đon hăm Đảng, hăm Kon pơlei, hăm Khôi luơ̆t tơm Teh đak CHXHCN Việt Nam; kơrŭn đĭ ai hơdrin jang keh đang ‘lơ̆ng tơdrong jang mă Đảng, Teh đak păng Kon pơlei pơjao ăn”.

Iung pơma lăp đơ̆ng rŏng pơma pơkăp tŏk bơ̆ jang, Kơdră chĕp pơgơ̆r Kuô̆k hô̆i Trần Thanh Mẫn pơma tơbăt jơhngơ̆m đon kŭp yom păng hôn bơnê kơtang kơ Ƀok Hô, ƀlŏk hơdơ̆r hlach bơnê kơ rim kơdră so, rim kơdră so, rim kang ƀô̆ kĕch mang sơ̆, rim Mĕ yă Việt Nam nuih mơng, rim Ƀô̆ đô̆i nuih mơng pran kơtang, rim Bơngai jang gơ̆h hơgei nui mơng; rim ŭnh hnam đei bơngai lôch tang teh đak, rim ƀô̆ đô̆i rơka, ŭnh hnam đei iŏk yua ăn teh đak; hmach bơnê kơtang găh trong chĕp pơgơ̆r, pơrô̆ jang ‘lơ̆ng tơnăp đơ̆ng Khul kơdră chĕp pơgơ̆r Trung ương, Hơnih tơm Chinh trĭ, Ban Bí thư, kơ Ƀok Tổng Bí thư Nguyễn Phú Trọng.

Tơdrong tơchơ̆t găh pôk tơmơ̆t ƀok Tô Lâm tŏk pơm Kơdră chĕp pơgơ̆r Teh đak Cộng hòa xã hội chủ nghĩa Việt Nam đei rim kơdră tang măt Kuô̆k hô̆i pơdrơ̆ng nơ̆r hăm 472/473 ‘nu kơdră tang măt drơ̆ng lăp đon. Iung pơma pơm lêh pơkăp tŏk jang, Kơdră chĕp pơgơ̆r teh đak Tô Lâm pơkăp, gô jang ‘lơ̆ng, tôm tong tơdrong jang, tơdrong gơ̆h jang kơ Kơdră chĕp pơgơ̆r teh đak hlôi đei Tơchơ̆t; kơrŭn đĭ ai jang kiơ̆ ‘lơ̆ng tơdrong jang hơpeh hơpong lơ̆m teh đak, jang tơbôl hăm teh đak đe, vei lăng sơđơ̆ng dơ̆ng kơjăp teh đak.“Ƀôh hơdăh hơnăp jang tih tên tơ̆ hơnăp Đảng, Teh đak, Kon pơlei, Ĭnh pơkăp gô jang kiơ̆ ‘lơ̆ng, tôm tong tơdrong jang, hơnăp gơ̆h jang kơ mĭnh ‘nu Kơdră chĕp pơgơ̆r Teh đak hlôi Tơchơ̆t ăn; hơdrin jang keh đang ‘lơ̆ng tơdrong jang hơpeh hơpong lơ̆m teh đak, jang tơbôl hăm teh đak đe, vei lăng sơđơ̆ng dơ̆ng kơjăp kơ teh đak; atŭm hăm Đảng, hăm kon pơlei, hăm ƀô̆ đô̆i kŏng ang bơ̆n păng rim khul jang lơ̆m khul chinh trĭ kiơ̆ yok rok jơ̆ng ‘lơ̆ng hơnăp jang “pơm tơm kơdih, lui kiơ̆ kơjăp, kơrŭn đĭ ai, hưch hanh hơmanh bơnê kơ hơdrĕch hơdrung”; hơdrin jang kiơ̆ jơnei keh đang rim trong tơlĕch jang đơ̆ng Đảng, mă blŭng ‘noh Tơdrong tơchơ̆t Pơm lêh hop akŏm kơdră tang măt lơ̆m teh đak ‘măng mă XIII kơ Đảng”.

Pơtôch pơdrơ̆ng kiơ̆ pôk tơmơ̆t Kơdră chĕp pơghơ̆r Teh đak, Kơdră chĕp pơgơ̆r Kuô̆k hô̆i hăm kơsô̆ kơphĭu drơ̆ng lơ tơƀôh hơdăh tơdrong lui yom đơ̆ng kơdră tang măt Kuô̆k hô̆i, adoi tơƀôh hơdăh tơdrong hơpơi ‘meh vă đơ̆ng kon pơlei. Kơdră ‘nao chĕp pơgơ̆r teh đak Tô Lâm hăm kơdră ‘nao chĕp pơgơ̆r Kuô̆k hô̆i Trần Thanh Mẫn sơđơ̆ng tôm dôm tơdrong pơkăp atŭm kơ Kơdră jang lơ̆m Hơnih tơm Chinh trĭ, Ban Bí thư, đei lui yom kơtang lơ̆m Đảng păng kon pơlei. Bơngai tang măt Phạm Văn Hòa, Khul Đồng Tháp hơmĕng: “Ƀar nơ̆r pơma đơ̆ng Kơdră chĕp pơgơ̆r Teh đak hăm Kơdră chĕp pơgơ̆r Kuô̆k hô̆i, dôm nơ̆r pơma au jĭ hlôi ƀôh hơdăh, kơdih ĭnh păng kon pơlei tôch kơ hơmĕng tih tên hloh Kơdră chĕp pơgơ̆r Teh đak, Kơdră chĕp pơgơ̆r Kuô̆k hô̆i tơchơ̆t kơrŭn đĭ ai yak hloh dôm tơdrong mơnat tat, hrat hrĭn vă jang keh đang tơdrong jang đơ̆ng Đảng păng Teh đak păng kon pơlei pơjao ăn”.

          Lơ̆m khei năr mŭk drăm lơ̆m teh đak păng apŭng plĕnh teh tơƀơ̆p tơnap tap, tơdrong hơmet pơ ‘lơ̆ng tôm tong kơchư̆k jang tơm dơnơm gô tơgŭm ăn hơmet pơ ‘lơ̆ng hloh dơ̆ng jơhngơ̆m đon lui yom, pơjing jơhngơ̆m pran pơđĭ lơ̆m khul chinh trĭ akŏm keh kong tơdrong jang oei đei lơ mơmat tat tơ̆ hơnăp. Kơdră tang măt Tạ Văn Hạ, khul Quảng Nam hơlen, Kơdră chĕp pơgơ̆r Teh đak Tô Lâm hăm Kơdră chĕp pơgơ̆r Kuô̆k hô̆i Trần Thanh Mẫn jĭ dôm bơngai đei hŏk jrŭ, iŏk jang lơ kơchư̆k jang kơpal, bơ̆ jang hơgei, băt hlôh ƀôh kloh klĕch lơ̆m bơ̆ jang.“ ‘Măng hop akŏm mă au ‘noh đei mĭnh tơdrong kăl hloh păng jei đei bơngai tăh hla lăng kơjăp, mă kăl ‘noh pôk tơmơ̆t kơdră chĕp pơgơ̆r. Kuô̆k hô̆i pôk tơmơ̆t Kơdră chĕp pơgơ̆r Teh đak, Kơdră chĕp pơgơ̆r Kuô̆k hô̆i ‘moi kiơ̆ tăh hla, tơƀôh hơdăh hơnăp jang ‘lơ̆ng kơ rim kơdră tang măt Kuô̆k hô̆i ưh khan lăp hăm rim Kơdră chĕp pơgơ̆r đei pôk tơmơ̆t năr au mă lei oei jing hơnăp jang pơm lơ liơ mă trŏ lăp hăm trong bơ̆ jang kơ Đảng, jơhngơ̆m đon kon pơlei lơ̆m tơdrong chĕp pơgơ̆r Teh đak”.