Dôm năr au, ŭnh hnam ‘nhŏng Đinh Công Nhiên atŭm hăm kon pơlei lơ̆m pơlei chơt hơ iă chă yô̆ ƀa lơ̆m hơvĕn chŭn na pơlei Klah, tơring Ia Mơ, apŭng Chư Prông, dêh char Gia Lai. ‘Nhŏng Đinh Công Nhiên tơbăt, đunh kơ au 2 sơnăm, rim kang ƀô̆ vei lăng choh jang sa apŭng, tơring năm truh chă pơrô̆ pơtho khan ăn kon pơlei jang ƀa 2 pơyan. Kon pơlei đei chă pơtho găh đơ̆ng choh teh, rei pơtăm, vei lăng năng tông truh chă yô̆ ƀa hloi. Pơyan ƀa sơnăm au, Đinh Công Nhiên chă tơchĕng lăng gô iŏk đei 5 tân ƀa, jang sa iŏk đei ăn ŭnh hnam hloh 50 triu hlak jên.“Sơ̆ tim mă đei hơboong pơnhă ‘noh chă rei pơtăm mĭnh pơyan, kơna iŏk đei ưh kơ lơ nhen lĕ jang ƀa ƀar pơyan, ƀa ƀar pơyan iŏk đei lơ hloh. Sơnăm au ‘noh pơyan au jĭ pơyan jang mă pêng, hloh mĭnh khei ‘noh truh jơ ‘năr yô̆ ƀa bơih. Dôm sơnăm hơ lau, chă jang mĭnh pơyan kơna đei ‘măng ưh kơ măh phe sa ƀa sŏng, dang ei dă ƀiơ̆ bơih”

Năm truh hăm tơring sơlam teh đak Ia Mơ khei năr au, tơdrong jang sa, hơrih sa kơ kon pơlei hiôk chơt hloh. Chơt hơ iă ‘nă hal mư̆h ƀa plei triu trăo, ‘nhŏng Siu Toàn, (pơlei Klah, tơring Ia Mơ) tơbăt, pơyan au, ŭnh hnam lang să chă rei pơtăm đơ̆ng 3 sao truh 8 sao chŭn na ƀa đak, adoi chă rei pơtăm ƀa ‘lơ̆ng păng hơmŏ pơyan au gô tơgŭm ăn ŭnh hnam đei ƀa lơ”. ‘Nhŏng Siu Toàn, pơma:“Sơ̆ tim mă đei hơboong pơnhă đơ̆ng pơnơ̆t đak au kơna ŭnh hnam ưh kơ jang chŭn na, mă lei dang ei chŭn na đei đak măh mai bơih, kơ yuơ đơ̆ng teh đak pơm pơnơ̆t đak, chor thoong pơnhă kơna kon pơlei tôch kơ lăp đon chă jang chŭn na ƀa đak, kơdih ba jei hơdrin chă jang sa vă đei por sa ƀa sŏng, hơbĕn ao hrŭk, rong kon hơ ‘lơ̆p hŏk pơhrăm păng sơđơ̆ng hơrih sa ăn ŭnh hnam”.

Tơ̆ chŭn na ƀa đak pơlei Klah, ƀok Nguyễn Tuấn Anh, Kơ iĕng kơdră chĕp pơgơ̆r Hơnih vei lăng kon pơlei tơring Ia Mơ, chơ̆p hơbĕn jur tơ̆ chŭn pơtho ăn kon pơlei vei lăng ƀa đak. Ƀok Nguyễn Tuấn Anh tơbăt, hrei au tơring đei hloh 155ha chŭn na ƀa đak, lăp lơ̆m 2 sơnăm au ki, hơdrô̆ pơlei Klah đei hloh 100ha ƀa 2 pơyan, ŭnh hnam đei bơngai jang oei jang 3 pơyan hloi.

Gơnơm tơplih jang chŭn na ƀa đak, tơring Ia Mơ hlôi hơmet pơ ‘lơ̆ng tơdrong phe ƀa tơmam sa, kon pơlei pă đei pơngot rơvĕt bơih. Hăm 5 pơlei, măt bơngai kon kông tơmơ̆t 70%, chŭn na ƀa đak hlôi tơgŭm ăn kon pơlei tơplih jơhngơ̆m đon jang sa, ŭnh hnam dơnuh roi tơjur tŏ sĕt kiơ̆ sơnăm. Ƀok Nguyễn Tuấn Anh pơma.“Sơ̆ hơvĕn chŭn na pơlei Klah lăp jang mĭnh pơyan păng gơnang đơ̆ng đak ‘mi, kon pơlei tôch tơnap tap lơ̆m choh jang sa, mă kăl găh jang chŭn na ƀa đak. Mưh hơboong pơnhă đei pơro đak truh tơ̆ chŭn na kơ pơlei ‘noh kon pơlei hlôi tơplih trong jang sa, xut xa pơngot rơvĕt/. Tơdrong mă au trŏ lăp hăm trong bơ̆ jang kơ Nơ̆r athei jang kiơ̆ 08 đơ̆ng Hơnih Đảng dêh char, đơ̆ng noh tơdrong jang sa kơ kon pơlei lơ̆m 1ha chŭn na ƀa đak iŏk đei truh 9 tân ƀa. Kon pơlei ƀôh đei iŏk yua kơjăp kơna mă jang kiơ̆, tơplih trong jang sơ̆ ki păng jang kiơ̆ khoa hŏk kih thuơ̆t lơ̆m rei pơtăm păng ƀa đei plei lơ, ‘lơ̆ng jei roi lơ kơna kon pơlei tôch kơ hiôk chơt”

Vă pơtrŭt jang chŭn na ƀa đak tơ̆ tơring sơlam teh đak, apŭng Chư Prông hlôi đei lơ trong jang tơgŭm ăn. Ƀok Đinh Văn Dũng, Bĭ thư Đảng apŭng Chư Prông tơbăt, Apŭng tơgŭm ăn hơdrech, phŏng vă pơtrŭt kon pơlei hơdrin jang chŭn na ƀa đak hơdrĕch ‘lơ̆ng; pơtho ăn kon pơlei jang kiơ̆ khoa hŏk kih thuơ̆t vă dă ƀiơ̆ tơhoach kon jên jang păng đei plei lơ, ‘lơ̆ng dơ̆ng. Dôm tơdrong hơdrin au hlôi hơnhăk đei iŏk yua hơ iă.“Tơlĕch jang kiơ̆ kơtang ăn rim hơnih đảng tơring, rim hơnih bơ̆ jang vă tơlĕch jang kiơ̆ jơ̆p jang, lăng kơjăp lơ̆m choh jang sa kơ kon pơlei vă tơplih trong jang sa ‘nao, chă pơtho ăn kon pơlei hăm trong nơ̆r pơma tơ-‘ngla iung jang hloi lơ̆m jang chŭn na ƀa đak vă kon pơlei pơm kiơ̆”

Hăm trong tơplih kơtang lơ̆m choh jang chŭn na ƀa đak, kon pơlei choh jang sa pơlei Klah, tơring Ia Mơ hlôi yak hloh tơnap tap, yak hloh pơngot rơvĕt vă sơng iŏk đei tơdrong hơnih sa phĭ tơtŏ dơnŏ ‘lơ̆ng dơ̆ng kơjăp hloh. Dôm hơvĕn chŭn na ƀa đak blŭh vơ̆ jing ‘lơ̆ng ƀlĭk ƀlăk ưh khan lăp hơnhăk đei phe sa ƀa sŏng ăn kon pơlei mă lei oei jing tơdrong hưch hanh hơmanh bơnê, tơƀôh hơdăh ăn tơdrong hơdrin đơ̆ng kon pơlei kon kông oei tơ̆ tơring sơlam teh đak.