Kon pơlei jang chŭn mir Gia Lai tŏk bŏk yak mơ̆t lơ̆m pơyan phĕ tĕch sầu riêng sơnăm 2024. Lơ̆m dêh char dang ei đei vă jê̆ 6.000hek tar sầu riêng, lơ̆m noh hơgăt teh đei plei phĕ tĕch đei dang 1 puăt, akŏm tơ̆ dôm apŭng nhen Chư Prông, Ia Grai, Đăk Đoa, Chư Sê păng Chư Pưh. Dêh char hlôi pơjing đei 16 hơnăn kơsô̆ tơring pơtăm sầu riêng păng tŏk bŏk pơjing sầu riêng jing tơmam đơ̆ng choh jang sa gĭt kăl.

Mă đơ̆ng yak hloh khei ‘năr  tŏ phang tôch kơ dêh pơdui đunh, mă lei hăm tơdrong tơmơ̆t jên jang ‘lơ̆ng păng lăng kăl ki thuơ̆t, bơngai pơtăm tơ̆ dêh char oei đei dôm pơgar sầu riêng plei hơ krĭu hơ krau. Yă Nguyễn Thị Lý, mĭnh ‘nu bơngai mơdro răt iŏk sầu riêng tơ̆ apŭng Chư Păh, dêh char Gia Lai tơbăt, sơnăm ‘nâu sầu riêng tơ̆ Gia Lai tôch kơ lơ păng plei ‘lơ̆ng kơna sơng đei lơ bơngai mơdro truh răt iŏk. Kơjă răt iŏk sầu riêng Ri6 đei đơ̆ng 55.000 - 60.000 hlak jên 1 kĭ, oei sầu riêng Dona đei đơ̆ng 65.000 - 70.000 hlak jên 1 kĭ.