Jĭ ŭnh hnam dơnuh kơ ƀuôn Cư Kanh, tơring Ea Sin, apŭng Krông Ƀuk, dêh char Dak Lăk, blŭng sơnăm 2023, yă H’Yam Mlô, đei tơgŭm djru 1 tŏ rơmo yŏng chă rong. Hloh vă jê̆ 2 sơnăm, hăm tơdrong kơrŭn đơ̆ng khul jang, mă kăl ‘noh tơdrong pơtho phăl hơlăng đơ̆ng kang ƀô̆ jang pơgang vei lăng kon tơrong lơ̆m vei lăng năng tông rơmo yŏng, dang ei, ŭnh hnam yă H’Yam hlôi đei 1 tŏ rơmo kon kơ yuơ rơmo yŏng ou su. Yă H’Yam chơt hơ iă tơbăt:“ Gơnơm đei Teh đak tơgŭm djru kơna ŭnh hnam mă đei rơmo chă rong, hơdrin vei rong vă rơmo yŏng ou chek lar char lơ dơ̆ng. Bơnê kơ teh đak hlôi tơgum djru dôm bơngai tap tap nhen ŭnh hnam nhôn, tơgŭm nhôn lơ tơdrong vă tơdrong hơrih sa kơ nhôn roi năr roi sơđơ̆ng dơ̆ng kơjăp”.

Sơ kơ̆t hơdăh tơdrong rơvơn kơ tơring păng ‘moi kiơ̆ rim tơdrong tơchơ̆t đơ̆ng Khul kơdră chĕp pơgơ̆r đảng ƀô̆ rim hơnih găh tơjur dơnuh kơjăp ‘lơ̆ng, Đảng ƀô̆ tơring Ea Sin, apŭng Krông Ƀŭk, dêh char Dak Lăk hlôi tơ iung pơjing tơdrong tơchơ̆t chĕp pơgơ̆r atŏk tơ iung mŭk drăm jăl jang 2020-2025. Lơ̆m ou, tơlĕch trong jang hơdăh, trŏ lăp hăm tơdrong đei kơ tơring. Tơplih trong iung jang ‘lơ̆ng hơ iă hloh dơ̆ng. Atŭm hăm ‘noh, atŏk kơtang pơrô̆ pơrôp kon pơlei jang kiơ̆ khoa hŏk kih thuơ̆t lơ̆m choh jang sa, rong kon tơrong, chă pơtăm hơdrĕch ‘long pơtăm hle, rong yŏng kon tơrong hle đei iŏk yua kơjăp hloh dơ̆ng. Ƀok Vũ Văn Tuấn, Ƀĭ thư Đảng tơring, tơbăt:“Tơring Ea Sin hlôi tơlĕch jang kiơ̆ hloi trong pơprŏ jang rim sơnăm. Khei năr jang kiơ̆ lăng kon pơlei ‘noh kăl hloh, kiơ̆ yok hơnăp jang vang iung jang đơ̆ng pơđĭ khul chinh trĭ. ‘Moi kiơ̆ rim sơnăm ‘noh ŭnh tơdrong tơjur dơnuh kơ ŭnh hnam dơnuh roi năr roi ‘lơ̆ng hơ iă. Mă kăl jơhngơ̆m đon hlôh vao kơ kon pơlei lơ̆m bơ̆ jang tơjur dơnuh hlôi tŏk kơtang, kon pơlei hlôi băt chă tơgĕch jang kiơ̆ rim trong jang hơ iă, hŏk pơhrăm dih băl vă kĕ yak hloh dơnuh hin. Hlôi đei lơ ŭnh hnam hơdrin jang sa kĕ jing đei ƀôh”.

‘Ngoăih kơ ‘noh, hăm kon jên tơgŭm djru đơ̆ng rim Tơdrong jang tơjur dơnuh, đak sŏ nhă rơgoh, tơgŭm djru ăn tŏk iŏk jên đơ̆ng hơnih mong jên hlôi pơjing rơvơn ăn kon pơlei tơmơ̆t jên jang atŏk tơ iung mŭk drăm. Truh dang ei, ŭnh hnam dơnuh kơ tơring Ea Sin hlôi tơjur đơ̆ng 57% (sơnăm 2021) tơjur pă 39,8 % (sơnăm 2023), jang sa iŏk đei jô̆ hơtŏ măt bơngai jei roi năr roi tŏk lơ kiơ̆ rim sơnăm.

Đơ̆ng iŏk đei trong jang “Tơjur dơnuh kơjăp ‘lơ̆ng” tơ̆ tơring Ea Sin, Khul kơdră chĕp pơgơ̆r Đảng apŭng Krông Ƀŭk, dêh char Dak Lăk hlôi tơlĕch jang kiơ̆, lang să truh rim tơring lơ̆m apŭng. Vă lăng kơjăp hloh hăm tơring, Khul kơdră chĕp pơgơ̆r Đảng apŭng oei pơjao ăn rim kang ƀô̆ lơ̆m hơnih rim khei vang hop akŏm atŭm hăm chi ƀô̆ pơlei vă băt hơdăh jơhngơ̆m đon hơpơi ‘meh vă đơ̆ng kang ƀô̆, đảng viên păng kon pơlei, tơtom hơmet pơ ‘lơ̆ng tơnap tap, tơhlăk tơhlĭn lơ̆m atŏk tơ iung mŭk drăm tơ̆ tơring. Ƀok Nguyễn Hải Đông, Ƀĭ thư apŭng Krông Ƀŭk, dêh char Dak Lăk, tơbăt:“Apŭng hlôi pơrô̆ athei rim kang ƀô̆ đảng viên chĕp pơgơ̆r lăng hơlen tơring nhen kang ƀô̆ 7 tơring hơnơ̆ng vang năm hop akŏm hăm chi ƀô̆ pơlei pơla. Hơnơ̆ng dăr lăng păng hơlen pơtôch jang kiơ̆ rim trong tơlĕch jang vă jang kiơ̆ rim tơdrong jang lơ̆m tơdrong tơchơ̆t tơgŭm ăn xut sa pơngot rơvĕt tơjur dơnuh roi năr roi ‘lơ̆ng hơ iă hloh dơ̆ng”.

Apŭng Krông Ƀŭk, dêh char Dak Lăk hrei ou đei hloh 30 hơnih đảng hăm hloh 180 chi ƀô̆ găh rim Đang ƀô̆ tơring. Gơnơm jang kiơ̆ ‘lơ̆ng hơnăp jang chĕp pơgơ̆r, pơrô̆ jang, pơchoh trong lơ̆m atŏk tơ iung muk drăm tơpôl tơring, kơna 16 trong tơlĕch jang găh atŏk tơ iung mŭk drăm, tơpôl kơ apŭng sơnăm 2023 hlôi iŏk đei păng jang keh đang hloh trong tơlĕch jang. Lơ̆m ou, ŭnh hnam dơnuh tơjur 1% (jơnei 100% trong tơlĕch jang); ŭnh hnam dơnuh lơ̆m tơring tơnap tap hloh tơjur 6,97% (jơnei 116% trong tơlĕch jang). Apŭng jei hlôi tơ iung pơjing đei 74 tơdrong jang kiơ̆ khoa hŏk kmăi kmŏk, hơdrĕch ‘long pơtăm, yŏng kon tơrong hle hơnhăk đei iŏk yua kơjăp. Tơdrong hơrih sa kơ kon pơlei roi năr roi sơđơ̆ng, tơgop jang kiơ̆ keh đang Tơdrong tơchơ̆t Pơm lêh hop akŏm Đảng apŭng Krông Ƀŭk, jăl jang 2020-2025 tơlĕch ăn, tơ iung pơjing tơring roi năr roi atŏk tơ iung.