Tơgĕch pơdơ̆h ‘năr dơ̆ng, năm dăr lăng chŭn ‘nhot păng chă choh ‘ngiĕt kơnong pro ‘ngam plei triu trăo vă sơđơ̆ng pơjao ăn bơngai mơdro chă phĕ lơ̆m khei năr kơnh, đảng viên Ya Dũng, Kơdră chĕp pơgơ̆r pơlei Labouye A, tơring Lạc Xuân, apŭng Đơn Dương (Lâm Đồng) tơbăt, lăng ƀôh trong jang sa kiơ̆ sơ̆ ki ưh kơ gan đei, kơna ŭnh hnam hlôi tơplih jang kiơ̆ choh jang sa hăm kmăi kmŏk hơgei. Hăm 4 sao chŭn ‘nhot, mĭnh pơyan ŭnh hnam jang sa iŏk đei hloh 100 triu hlak jên. Kiơ̆ đơ̆ng Ya Dũng, đơ̆ng jang sa đei iŏk yua kơjăp au hlôi tơgum ăn tơdrong chă pơrô̆ pơrôp păng nơ̆r pơma kơ đảng viên nhen bơ̆n gô đei kon pơlei lui yom hloh dơ̆ng: “Kơdih ba hơdrin hŏk pơhrăm tôch kơ dêh, ưh khan tơ̆ au mă lei đơ̆ng rim tơring anai. Chă hŏk kiơ̆ đe chă jang pơtăm ‘long pơtăm au ‘long pơtăm mă to. Jĭ mĭnh ‘nu bơngai mơlôh mă lei đei kon pơlei lui yom, jĭ bơngai pơm bơngai tang măt ‘noh ba kăl hơdrin hŏk pơhrăm hloh dơ̆ng dôm trong jang sa hle. Kơ yuơ kon pơlei vă atŭm dih băl tơ iung pơjing pơlei pơla roi năr roi atŏk tơ iung ‘lơ̆ng”

Jei lei lăi, đảng viên K’Hiệu, oei tơ̆ thôn 2, tơring Đinh Trang Thượng, apŭng Di Linh (Lâm Đồng) jei chông ba kon pơlei chă tơplih ‘long pơtăm hăm dôm trong jang hơdăh. K’Hiệu tơbăt, lơ̆m sơnăm 2014, lăp đơ̆ng rŏng vang hŏk pơhrăm trong jang chehphe kơ yuơ hơnih vei lăng choh jang sa tơring pơgơ̆r, ƀok hlôi tơplih mir chehphe đĭ kră krŭt, pă gan plei chă pơtăm hơdrĕch chehphe hle. Hlŏh 3 sơnăm jang, mir pơgar chehphe kơ K’Hiệu hlôi đei plei, hơnhăk đei iŏk yua sơđơ̆ng. Lăng ƀôh đei iŏk yua kơjăp, lơ̆m mă noh kon pơlei mă jang kiơ̆. Đảng viên K’Hiệu akhan, ‘meh vă kon pơlei lui păng pơm kiơ̆ lei kơdih ba kăl pơm jŭk yuk trong hơlau, nơ̆r pơma tơ-‘ngla iung jang hloi. “Jĭ bơngai đảng viên, kang ƀô̆ thôn, ba hơdrin iung jang tơnăp ‘mơ̆i. Ĭnh hơnơ̆ng chă pơrô̆ hơvơn kon pơlei lui kiơ̆ kơjăp trong chĕp pơgơ̆r đơ̆ng Đảng, khôi luơ̆t Teh đak, chă pơrô̆ hơvơn kôn mon kon sau hơdrin hŏk pơhrăm truh tơ̆p truh troch ‘noh mă hlôh vao, mă băt tôm tơdrong vă jang sa đei ƀôh, nhen vei lăng năng tông chehphe, jang kiơ̆ khoa hŏk kih thuơ̆t lơ̆m choh jang sa păng pơrô̆ hơvơn kon pơlei jang kiơ̆ rim tơdrong jang pơting dih băl jang sa kơ yuơ tơring tơlĕch ăn”.

Găh kiơ̆ kơ đảng viên K’Lèn, Bí thư chi bộ bon K’Long, tơring Hiệp An, apŭng Đức Trọng (Lâm Đồng), sơ̆ kon pơlei tôch tơnap tap, jang sa iŏk đei găh lơ gơnơm lơ̆m mĭnh ƀar sao chŭn na ƀa đak mĭnh pơyan kơna tơdrong pơngot rơvĕt, dơnuh hin hơnơ̆ng druh kiơ̆ đơ̆ng rŏng. Gơnơm đei Đảng păng teh đak lăng ba tơmơ̆t jên jang tôm tơdrong, tơlĕch lơ trong jang tơgŭm djru tơmơ̆t jên jang, tĕch kơjă re rim hơdrĕch ‘long pơtăm păng pơtho kih thuơ̆t choh jang sa, atŭm hăm tơdrong chă pơrô̆ pơrôp đơ̆ng rim khul jang, Măt trân păng khul kơdră tơring, tơlĕch jang kiơ̆ ‘lơ̆ng hơnăn jang “đảng viên pơm juk yŭk trong hơlau, kon pơlei kiơ̆ yok rok jơ̆ng đơ̆ng rŏng”, kơna roi năr roi đei lơ kon pơlei tơplih jơhngơ̆m đon tơchĕng, trong jang sa, hơdrin hŏk pơhrăm, jang kiơ̆ kmăi kmŏk hơgei lơ̆m choh jang sa kiơ̆ trong pơm hơtŏk kơjă tơmam drăm. Ƀok K’Lèn, pơma:“Mă blŭng ba kăl hơdrin hŏk pơhrăm, kăl băt hlôh ƀôh hơdăh tôm tong trong bơ̆ jang đơ̆ng Đảng păng khôi luơ̆t Teh đak kơna mưh chă pơrô̆ pơrôp, pơtho tơbăt ăn kon pơlei ƀônh hlôh vao. ‘Ngoăih kơ ‘noh, mưh jang mă đơ̆ng tơdrong yă kiơ jei kăl yŭk trong hơlau, pơtih gia nhen bơ̆n kăl pơm hơdrol hnam pơnĭl, hnam hơdrou pơtăm ‘long pơtăm, jang kiơ̆ kmăi kmŏk hơgei lơ̆m choh jang sa vă kon pơlei ƀôh, pơm kiơ̆. Tơdăh lăp chă pơrô̆ pơtho khan hăm ƀơ̆r, jơ̆ng ti ưh kơ jang lei kon pơlei ưh kơ ‘meh mơ̆ng, ưh khan lăp hơdrô̆ kơdih ba hơdrin mă lei truh hloi kôn mon kon hơ ‘lơ̆p ‘mơ̆i, mưh ƀôh đei iŏk yua kơjăp’noh kon pơlei mă pơm kiơ̆”.

          Hăm dôm trong jang hơdăh đơ̆ng rim đảng viên lơ̆m atŏk kơtang hơnăp jang pơm jŭk yŭk trong hơlau jang kiơ̆ pơrôư pơrôp păng chông ba kon pơlei atŏk tơ iung choh jang sa păng hơrih sa, lơ trong jang sa đei iŏk yua kơjăp roi năr roi lang să jơ̆p tơring tơring kơ tơring kon kông lơ̆m dêh char Lâm Đồng. Đơ̆ng noh, tơgop gĭt kăl ăn ŭnh hnam dơnuh kơ dêh char roi năr roi tơjur pă tim mă truh 2%, lơ̆m au ŭnh hnam dơnuh ‘noh bơngai kon kông lăp pă 5,6%./.