Ŭnh hnam mŏ Lê Thị Thắm, oei tơ̆ phương Chiềng Cơi, pơlei tơm Sơn La dang ei ‘noh jang vă jê̆ 2ha ‘nhot sa. Tơdăh sơ̆ mŏ Thắm đơ̆ng hrôih gleh hrat pŭ ba ‘nhot chă tĕch tơ̆ kơchơ, hăm kơjă ưh sơđơ̆ng, ‘noh đơ̆ng mă vang jang lơ̆m hơp tak xah Choh jang sa rơgoh ‘lơ̆ng 26-3 tơ̆ pơlei tơm Sơn La, đĭ đăng ‘nhot mŏ jang sa jei đei hơp tak xah răt iŏk pơ đĭ hăm kơjă sơđơ̆ng. Tơgĕch tĕh thŭng, jing ‘lơ̆ng vă pơtăm ‘nhot sa rơgoh, mĭnh sơnăm ŭnh hnam jang sa iŏk đei vă jê̆ 200 triu hlak jên:“Đơ̆ng mă vang jang lơ̆m hơp tak xah ‘noh ‘nhot sa kơ bơ̆n đei lơ păng tĕch hlot sơđơ̆ng, ưh kơ pă chă pŭ tĕch tơ̆ kơchơ, găh kơjă ‘noh ƀar păh drơ̆ng dih băl đơ̆ng blŭng, găh bơ̆n ‘noh chă pơtăm đei dôm ‘nhot rơgoh ‘lơ̆ng ƀlep tơdrong pơkăp ‘lơ̆ng kơ hơp tak xah”.

Đơ̆ng rŏng 8 sơnăm tơchă đei hơnih răt iŏk tơmam drăm choh jang sa rơgoh ‘lơ̆ng, hơp tak xah choh jang sa 26-3 ‘noh jing hơnih lui kiơ̆ kơjăp hloh lơ̆m jang sa păng tĕch mơdro tơmam drăm choh jang sa rơgoh ‘lơ̆ng tơ̆ Sơn La. Ư̆h khan lăp chă tơgŭm ăn jang sa, tĕch răt tơmam drăm rơgoh ăn 12 ‘nu bơngai lơ̆m khul păng ŭnh hnam tơgoăt jang hơdoi, ‘nau jei jing hơnih pơtho tơbăt khoa hŏk kih thuơ̆t, tơgŭm ăn kon pơlei tơplih jơhngơ̆m đon tơchĕng, trong jang sa lơ̆m choh jang sa. ‘Nhŏng Trần Mạnh Hùng, oei tơ̆ pơlei Nong Nái, tơring Chiềng Mung, apŭng Mai Sơn tơbăt:“Sơ̆ bơ̆n pơtăm prit kơna lơ̆m mĭnh khei chă tĕch iŏk đei 5 triu hlak jên, dang ei hăm chă pơtăm ‘nhot lơ lơlou ‘noh lơ̆m vă jê̆ 2ha ‘nhot ‘noh lơ̆m mĭnh khei chă bŭch tĕch đei dang 7 triu hlak jên. Đơ̆ng khei 6 sơnăm sơ̆ ba jang hơdoi hăm Hơp tak xah đei ƀôh iŏk yau kơjăp tơpă mơ̆n. Hơp tak xah chă tơgŭm ăn hơdrĕch, phŏng păng pơtho trong vei lăng năng tông”.

Hăm đei hloh 13ha, mĭnh khei hơp tak xah 26-3 chă tĕch mơdro đei đơ̆ng 30-40 tân ‘nhot, ƀum plei ‘long rim kơ loăi. Vă tĕch mơdro hot pơđĭ ‘nhot sa, hơp tak xah hlôi păng vei kơjăp 4 hơdrơ̆r tĕch mơdro tơmam drăm rơgoh ‘lơ̆ng tơ̆ kơchơ 7/11, kơchơ 308 păng kơchơ Rặng Tếch, pơlei tơm Sơn La. Vei kơjăp kĭ pơkăp tĕch răt đunh đai hăm rim hnam gŏ pai por ‘nhot tơpôl nhen hnam pơgang, hnam trương; adoi pơih să chă tĕch mơdro tơmam drăm rơgoh ‘lơ̆ng tơ̆ rim siêu thị, kơchơ tơm tơring găh Tu. Dôm ‘nhot, ƀum plei ‘long rơgoh ‘lơ̆ng kơ Hơp tak xah jei chă tĕch măt ƀiơ̆ hăm kơ jă đe tĕch mơdro au to dang 20-30%, gơnơm kơ ‘noh kơna tơdrong jang sa đei iŏk yua lơ hloh ƀiơ̆. Mŏ Hoàng Thị Thắm, Kơ iĕng Kơdră chĕp pơgơ̆r Hơp tak xah Choh jang sa rơgoh ‘lơ̆ng 26-3 Sơn La tơbăt:“Tơdrong tĕch mơdro tơmam drăm kơ hơp tak xah nhôn đei lơ trong, mă blŭng ‘noh kiơ̆ mạng tơpôl nhen facebook, zalo păng tĕch mơdro điên tư. Nhôn chă tĕch mơdro kiơ̆ trong ‘noh jei hlôi hơnhăk đei iŏk yoa sơđơ̆ng, tơmoi apĭnh răt păng nhôn năm chơ ba hloi, dôm tơdrong jei hiôk hian, ƀônh ƀŏ hloh. Trong mă 2 ‘noh nhôn chă tĕch mơdro kiơ̆ offline tơ̆ rim hơnih tĕch mơdro ‘noh tĕch mơdro kơtă”.

Hăm trong jang hơ iă, tơdrong tơgoăt jang sa hơdoi ưh khan lăp tơgŭm ăn hơp tak xah pơih să hơgăt teh jang sa, pơjing đei lơ tơmam drăm choh jang sa, mă lei oei tơgŭm ăn kon pơlei chă tĕch tơmam drăm hăm kơjă sơđơ̆ng. Mĭnh trong jang ‘nao đei pơjing, hơnhăk đei iŏk yua kơjăp ăn pơđĭ rim pang vang jang kiơ̆, đơ̆ng noh pơm hơtŏk atŏk tơ iung mŭk drăm choh jang sa. ‘Nhŏng Nguyễn Đình Đại, pơlei Thống Nhất, tơring Chiềng Mung, apŭng Mai Sơn, dêh char Sơn La pơma:“Dang ei bơ̆n đei plei guga, hla sơƀei krôp, pro tŏk bŏk tơgoăt tĕch răt hăm hơp tak xah. Mư̆h bơ̆n đei jang hơdoi ‘noh tơmam drăm mă bơ̆n jang sa đei tĕch mơdro hlot lơ hloh, hơnhăk ba đei iŏk yua sơđơ̆ng hloh”.

Tơ̆ tơring choh jang sa kơ dêh char Sơn La, tơdrong tơgoăt jang hơdoi choh jang sa đei lăng jĭ trong jang trŏ lăp hloh, hơnhăk đei iŏk yua kơjăp ăn tơplih jang sa, pơjing đei trong tơgoăt jang sa hơdoi, pơm hơtŏk ‘lơ̆ng lơ tơmam drăm chŏh jang sa, trŏ lăp hăm tơdrong đe ‘meh vă răt sa.