Jang kiơ̆ nơ̆r krao hơvơn đơ̆ng Tổng Bí thư, Kơdră teh đak Tô Lâm păng Anih Trung ương Mặt trận Tổ quốc Việt Nam, hơtŏk tơdrong juăt mât 1 ƀơ̆r đon, "tơgŭm băl", "hla ‘lơ̆ng bơ̆ng hla hiăh" đơ̆ng hơdrĕch hơdrung bơ̆n, pơgê brei (12/9), tơ̆ Hnam Quốc hội, adrol kơ pơgơ̆r Hop akŏm mă 37 kơ Anih chĕp kơ̆l pơgơ̆r Quốc hội, Anih pơvih ăn Quốc hội pơm lêh tơra tơgop, tơgŭm ăn kon pơlei hơmet pơ ‘lơ̆ng hiong răm đơ̆ng ‘mi kial kơsô̆ 3.

Pơma tơ̆ jơ pơm lêh tơgop, Tổng Thư ký Quốc hội, Kơdră Anih pơvih ăn Quốc hội Bùi Văn Cường ăn tơbăt, lơ̆m dôm năr âu ki, ‘mi kial kơsô̆ 3 păng ‘mi tih đak lơ̆p hlôi pơm hiong răm tôch lơ găh bơngai păng tơmam drăm tơ̆ lơ dêh char, plt găh Tu teh đak bơ̆n. Vă tơgŭm ƀiơ̆ tơdrong pơma tat, vang hơmet pơ ‘lơ̆ng hiong răm đơ̆ng ‘mi kial hơbŭt; tưk tơiung tơdrong juăt "tơgŭm băl", "Hla ‘lơ̆ng bơ̆ng hla hiăh" đơ̆ng hơdrĕch bơ̆n păng jang kiơ̆ nơ̆r krao hơvơn đơ̆ng Tổng Bí thư, Kơdră teh đak Tô Lâm păng Anih Trung ương Mặt trận Tổ quốc Việt Nam tưk tơiung jơhngâm đon ‘lơ̆ng "băt ‘mêm băl đơ̆ng hơdrĕch hơdrung, đơ̆ng kon pơlei bơ̆n", Anih pơvih ăn Quốc hội pơgơ̆r tơra tơgop tơgŭm ăn kon pơlei tơ̆ tơring pŭ răm đơ̆ng ‘mi kial, vă jăh đei dơ̆ng tơdrong arih xa hiôk sơđơ̆ng.