Kơsơ̆ 10/9, Phŏ Kơdră chĕp kơ̆l Radio nơ̆r pơma VN Vũ Hải Quang truh pơlung, tơƀôh jơhngâm sơ ‘ngon păng pơjao kơsô̆ jên 10 triu hlak jên ăn unh hnam Thiếu tá công an Trần Quốc Hoàng, kăn ƀô̆ trư̆k tơ̆ Hnam phak Quảng Ninh lôch tang ƀât oei bơ̆ jang tang găn ‘mi kial Yagi. 

Gơmăng ‘năr 7/9, Thiếu tá Trần Quốc Hoàng adrin lĕch pơih ‘măng dur tơ̆ găh rŏng ƀât ‘mi kial oei hơbŭt vă đak gơ̆h ro lĕch, huei tơ̆ng lơ̆m hnam phak, vă vei sơđơ̆ng ăn bôl boăl păng dôm bơngai oei rôp phak tơ̆ âu mă lei yoa đak ro tôch jăng kơna tơjroh hŭt ‘măng dur, hoch hloi thiếu tá Hoàng, pơm ăn ‘nhŏng lôch tang ƀât oei bơ̆ jang. Lơ̆m gơmăng, vang bơ̆ jang tang găn ‘mi kial kŭm hăm bôl boăl, Thượng uý Nguyễn Đình Khiêm lôch lôch tang ‘năi. Kŭm hăm tơdrong truh ngôi, tơƀôh jơhngâm đon sơ ‘ngon păng pơlung unh hnam 2 ‘nu linh lôch tang âu, Phŏ Kơdră chĕp kơ̆l VOV Vũ Hải Quang oei pơjao kơsô̆ jên tơgŭm 10 triu đơ̆ng Radio nơ̆r VN ăn unh hnam 2 ‘nu linh âu.