Dôm năr hơtuch giĕng, kră pơlei Điểu Xem, bơngai M’Nông, linh so, bơngai đei bưng ai tih tơ̆ plei Đắk Blao, thĭ trơ̆n Kiến Đức, apŭng Đắk R’Lấp, dêh char Đắk Nông kŭm hăm khul vei lăng kơdih năm truh tơ̆ rim hnam tơnuh lơ̆m pơlei. Kơă pơlei ăn tơbăt, rim hnam đei tơdrong arih pha ra băl, athei pơma xa gơ̆h, băt hue lăng truh tơ̆ rim hnam ‘nŏh mă gơ̆h pơm hơtŏk đei tơdrong đei yoa đơ̆ng tơdrong tơgŭm đơ̆ng teh đak hăm kon pơlei. Dôm unh hnam tơnuh kăl đei pơtho tơƀôh tơ̆ yăn âu, iŏk đei hloi tơdrong tơgŭm găh tơmam drăm nhen bơ̆n tơđăh ‘long, kon yŏng, pơtâp pơhrăm ki thuơ̆t jang, iŏk đei hloi nơ̆r pơlung vă adrin jang tŏk.

Kiơ̆ kră pơlei Điểu Xem, mât 1 jơhngâm đon, vang tơgŭm băl ‘nŏh sư pơm ăn pơlei pơla gơ̆h sơđơ̆ng ‘lơ̆ng păng roi đunh jang tŏk roi pran: “Kon pơlei hơnơ̆ng mât 1 jơhngâm đon, oei xa hơdai, pơlung băl adrin jang xa, tưk tơiung mŭk drăm. Pơlei pơla sơđơ̆ng ‘lơ̆ng, đei dơ̆ng tơdrong tơgŭm đơ̆ng Đảng, Teh đak tơlĕch jên man trong, asong tŏk iŏk jên vă ăn kon pơlei jang xa kơna tơdrong arih xa roi đunh roi tŏk ‘lơ̆ng.”

Tơ̆ xăh sơlam Quảng Trực, apŭng Tuy Đức, dêh char Đắk Nông, hơnăp jang đơ̆ng đe kră pơlei, bơngai đei bưng ai, grih tih kŭm tôch đei yoa lơ̆m tơdrong vei kơjăp tơdrong sơđơ̆ng tơ̆ tơring sơlam păng jang tŏk mŭk drăm. Kră pơlei Điểu Đi, tơ̆ plei Bu Prăng 2, xăh Quảng Trực, tơroi, mĭnh jơhngâm kiơ̆ Đảng, kiơ̆ kăch mang, tơdrong arih xa kơ kon pơlei roi đunh roi phĭ tơtŏ dơnŏ ‘lơ̆ng, tơring sơlam tơplih ‘nao rim năr: “Oei tơblăh sơ̆, chăl nhôn vang iung tơblăh, vei lăng teh đak păng vei lăng tơring sơlam âu. Hrei ‘nâu rơngei, hiôk hian ‘nŏh đe đảng viên, linh so athei jang mă tơnăp, hơnơ̆ng năm hơdrol, chă krao hơvơn kon pơlei tưk tơiung tơdrong mât 1 ƀơ̆r đon, adrin jang xa, pơm hơtŏk tơdrong arih păng vei kơjăp tơring sơlam âu.”

Ƀôh hơdăh khul kră pơlei, bơngai đei bưng ai, grih tih đei hơnăp jang tôch gĭt kăl, đơ̆ng sơnăm 2013, Anih chĕp kơ̆l Đảng Đắk Nông tơlĕch Tơdrong jang 05 găh pơjing khul tơm dơnơm lơ̆m tơring kon kông. Truh dang ei, Khul âu đei vă jê̆ 500 ‘nu bơngai, đei pơtho tơƀôh găh trong jang đơ̆ng Đảng, khôi luơ̆t teh đak, trong chă krao hơvơn kon pơlei lơ̆m chăl ‘nao. Kiơ̆ đơ̆ng noh, đe sư kơchăng, adrin jang mă ‘lơ̆ng, băt hơdăh đon hơpơi ‘mĕh đơ̆ng kon pơlei, tơroi tơtom dôm tơdrong kăl tơ̆ tơring vă đei trong sek tơlang.

Kŭm kiơ̆ tơdrong adrin krao hơvơn đơ̆ng dôm bơngai đei grih tih, đei kon pơlei lui yom hlôi tơgŭm ăn kon pơlei hơtŏk đon kơchăng, vang tơjră, tang găn ‘lơ̆ng nơ̆r pơma kư̆ kă, ưh kơ trŏ, iŏk tơdrong kon kông, lui khop vă phă ngơ̆r teh đak. Lơ tơdrong hil băl, tơgar băl đei sek tơlang ‘lơ̆ng kơtă tơ̆ tơring. Hơdai hăm ‘nŏh, dôm bơngai đei grih âu oei adrin vang jang lơ̆m dôm tơdrong pơjei băl ‘mêm kơ teh đak, dôm tơdrong krao hơvơn tơ̆ tơring nhen đĭ đăng kon pơlei mât 1 ƀơ̆r đon pơjing tơring tơrang ‘nao, bơ̆ jang tơjur tơnuh hin kơjăp ‘lơ̆ng.

Ƀok Hồ Văn Mười, Phŏ Bí thư Đảng dêh char, Kơdră vei lăng kon pơlei dêh char Đắk Nông pơma hơdăh, tưk tơiung hơnăp jang đơ̆ng đe đảng viên, bơngai đei grih tih tơ̆ tơring kon kông ‘nŏh jĭ tơdrong tôch gĭt kăl đơ̆ng dôm anih jang kơpal vă dêh char gơ̆h jang tŏk: “Rim anih jang Đảng, khul kơdră pơgơ̆r tơring adrin pơgơ̆r đei lơ tơdrong jang vă tưk tơiung hơnăp jang đơ̆ng dôm bơngai đei bưng ai, grih tih, khul tơm dơnơm, hơnơ̆ng pơjing, hơmet kơjăp khul bơngai đei grih tih tơ̆ tơring kon kông; hơnơ̆ng pơjing păng pơih xă dôm trong jang rơgei găh rim tơdrong vă tơgop pơm hơtŏk mŭk drăm, joh ayŏ kơ dŏ xoang, vei sơđơ̆ng teh đak tơ̆ dôm tơring, vang tơgop pơjing pơlei pơla Đắk Nông roi đunh roi pơdrŏng ‘lơ̆ng rŏ.”

Tơchĕng ‘lơ̆ng trŏ hơnăp jang đơ̆ng bơngai đei grih tih lơ̆m tơpôl kon pơlei kon kông, đei trong tơgŭm mă lăp vă tưk tơiung tôch ai hơnăp jang đơ̆ng “dôm bơngai gơ̆h hơgei, vei lăng pơlei pơla”, vang tơgop tơgŭm ăn dêh char Đắk Nông vei kơjăp tơdrong sơđơ̆ng chinh trĭ, iŏk đei lơ tơdrong jơnei ‘lơ̆ng lơ̆m tơdrong atŏk tơiung mŭk drăm, tŏk klăih đơ̆ng dêh char tơnuh păng oei adrin jang tŏk vă gơ̆h jing dêh char đei ƀôh tơ̆ tơring Tây Nguyên.