Hăm hloh 10 ti hlak jên đơ̆ng jên Tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông, tơring 3 Ea Hiu, apŭng Krông Pắc, dêh char Đắk Lắk đĭ pơm ƀê tŏng 9 jăl trong nơnăm tơring tơrang hăm akŏp kơjung vă jê̆ 5,4km. Tơdrong pơm hơmet ming, pơih să dôm trong ưh khan lăp pơyua ăn ‘lơ̆ng hloh lơ̆m tơdrong năm vih vơ̆t, chơ chuĕn tơmam đơ̆ng choh jang sa mă oei tơgop pơm tơƀưh trong nơnăm đơ̆ng dôm pơlei pơla hai. Yă H’Ninh Êban, kon pơlei oei tơ̆ xăh Ea Hiu roi tơbăt: “Hơdrol sơ̆ trong hlŭt rơƀơ̆r, đei trong ‘nâu ĭnh tôch kơ chhôk, kon oh năm hŏk, năm vih vơ̆t hiôk ƀiơ̆ păng lơ̆m pơyan yuă âu kon pơlei chơ ƀa dăh mă chơ chuĕn tơmam đơ̆ng choh jang sa ‘lơ̆ng hloh.”

Trong nơnăm đơ̆ng trong gre tih 27 truh tơ̆ Plei Biếp, xăh Yang Tao, apŭng Lắk, dêh char Đắk Lắk kŭm đei tơmơ̆t jên jang đơ̆ng jên Tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông. Trong kơjung vă jê̆ 3 km năm mơ̆t lơ̆m chơ kơi đak Bìm Bịp, mĭnh lơ̆m dôm hơnih đe chă năm tơmang lăng tôch kơ ‘lơ̆ng kơ apŭng Lắk. Trong ‘nâu đei pơm đang sơnăm 2023. Ƀok Y Mra Liêng, kon pơlei lơ̆m xăh tơbăt, iŏk đơ̆ng trong đei pơm đang lơ gre gơh kơ dâu mơ̆t truh tơ̆ jơ̆ng chơ kơi đak, năm vih vơ̆t hiôk kơna tơmoi tơmang truh tơ̆ chơ kơi đak tŏk lơ pơting hăm hơdrol, tơgop lơ̆m hơtŏk tơiung mŭk drăm kơ tơring. “Đei đăi trong, tơdrong nhôn năm vih vơ̆t tôch kơ hiôk, Pơlei pơla nhôn tơplih ‘lơ̆ng hơiă thoi âu, ĭnh kŭm chhôk dêh”.

Đơ̆ng sơnăm 2022 truh dang ei, hăm jên Tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông, apŭng Lắk, dêh char Đắk Lắk hlôi ming man păng pơm hơmet ming 37 tơdrong jang, anih jang kăl pơyua ăn jang sa, tơdrong arih sa lơ̆m tơring kon pơlei kon kông, hăm akŏp jên hloh 75 ti hlak jên. Dôm tơdrong jang hlôi ƀrư̆ ƀrư̆ pơjing trong nơnăm ‘lơ̆ng, pơm tơdrong hiôk vă iŏk jang dôm tơmam ‘lơ̆ng kơ tơring lơ̆m hơtŏk tơiung choh jang sa păng tơmang lăng. Ƀok Nguyễn Anh Tú, Phŏ Kơdră Anih vei lăng kon pơlei apŭng Lắk, dêh char Đắk Lắk pơma hơdăh: “Trong nơnăm hiôk tơgop ăn tơmam gơh chơ vih vơ̆t. Mă 2 ‘noh tơ jur jên chơ chuĕn. Thoi noh iŏk yua đơ̆ng tơmơ̆t jên jang pơm anih jang kăl đei trong nơnăm hơnhăk ăn iŏk yua. Găh cham char lăng rơgoh, ‘yâu hiôk ƀiơ̆”.

Tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông păng tơring groi kông hlôi tơgop pơm hơtŏk ‘lơ̆ng tơdrong arih sa tơring kon pơlei kon kông păng tơring groi kông dêh char Đắk Lắk. Sơnăm 2023, ŭnh hnam dơnuh hin bơngai kon kông tơ jur đơ̆ng 26,7% jur oei pă 19,7%, jur 7% pơting hăm hơtuch sơnăm 2021. Mă loi ‘noh, dôm tơdrong jang pơm trong nơnăm đei tơmơ̆t jên jang tơ̆ tơring kon pơlei kon kông, tơring mơmat tat hloh tơ̆ dêh char tŏk bŏk pơm tơdrong ‘lơ̆ng vă kon pơlei hơtŏk tơiung mŭk drăm, tơpôl, tơgop bơ̆jang kiơ̆ tơdrong hơgăt tơjur ŭnh hnam dơnuh hin lơ̆m kon pơlei kon kông đơ̆ng 3% truh 4% 1 sơnăm.

Blŭng khei 8 âu ki, tơ̆ pơlei tơm Buôn Ma Thuột, dêh char Đắk Lắk, Anih pơgơ̆r jang Trung ương dôm tơdrong jang tơm teh đak pơgơ̆r Hop akŏm trực tuyến hăm dôm dêh char Tây Nguyên găh tơdrong tơlĕch jang kiơ̆ dôm tơdrong jang tơm teh đak; sơkơ̆t hơdăh: Jên jang Trung ương sơnăm 2024 tơgŭm bơ̆jang kiơ̆ 3 Tơdrong jang tơm teh đak (Tơdrong jang hơtŏk tơiung mŭk drăm - tơpôl tơring kon pơlei kon kông păng tơring groi kông; Tơdrong jang tơjur dơnuh hin kơjăp păng Tơdrong jang pơjing tơring tơrang ‘nao) tơring Tây Nguyên ‘noh hloh 5.500 ti hlak jên. Truh dang ei, tơring Tây Nguyên đei dang 373 xăh đei tơchơ̆t drơ̆ng ăn jang đang tơring tơrang ‘nao. Phŏ Thủ tướng Trần Lưu Quang pơma hơdăh, vă tơlĕch jang kiơ̆ đei yua dôm Tơdrong jang tơm teh đak, rim dêh char athei lăng ‘noh jĭ tơdrong jang ‘lơ̆ng, tơgŭm ăn kon pơlei rim tơring mơmat tat đei tơdrong arih sa ‘lơ̆ng ƀiơ̆ kăl athei jang đĭ hơnăp jang, hơdrin, kơtang hloh dơ̆ng tơ̆ hơnăp kơnh. Phŏ Thủ tướng athei dôm tơring athei hŏk pơhrăm dih băl, tơring hơyơ jang tam mă gơh ‘noh athei hŏk pơhrăm dôm tơring jang ‘lơ̆ng vă vang hơdai băl bơ̆jang jơnei hơnăp jang đei pơjao: “Athei iĕm jang ă, jang hloi dôm tơdrong kĕ jang đei. Jên âu hăm 5 dêh char Tây Nguyên rŏ lăng ưh kơ lơ dang jên tơmơ̆t jên jang teh đak, mă lei sư tôch kơ gĭt kăl yua kơ sư mơ̆t lơ̆m rim pơlei pơla. Iĕm akhan 1 rơbâu tơdrong hơnat, chih iŏk đĭ, mă lei găh tơdrong iĕm athei mă hơdrin, dôm tơdrong bơ̆n đei ngăl bơ̆ih mă jang ưh kơ đang ‘noh hơnăp jang đơ̆ng bu lei? Truh khei 9 iĕm ưh kơ jang lăp oei đei trong hơlen lăng kơdih păng tơdăh jăl jang đơ̆ng rŏng klăih song jên ăn dôm tơring mơ̆ng kiơ̆ hơlen lăng tơdrong ‘lơ̆ng tơlĕch jang 3 Tơdrong jang âu đơ̆ng jăl jang ‘nâu nhôn gô pơjao lơ tơmam hloh ăn dôm bơngai gơh jang păng jang hơgei”.