Tơgĕch jơ pơdơ̆h ‘năr dơ̆ng, dăr lăng mir pơgar ‘nhot sa jing ƀlĭk ƀlăk păng choh ƀŭ hơmet kơnong pro ‘ngam plei triu trao vă pơjao ƀlep jơ ‘năr pơkă ăn bơngai răt, đảng viên Ya Dũng, Thôn trơng pơlei Labouye A, tơring Lạc Xuân, apŭng Đơn Dương, dêh char Lâm Đồng tơbăt, dôm năr ou bu bu jei pơjoal, ba hơdrin dreng lăng mir pơgar tơ̆ ‘năr dơ̆ng kơ yuơ tơ̆ kơsơ̆ ‘noh pơgơ̆r hop akŏm kon pơlei pơma dơnuh tơdrong tơ iung pơjing tơring tơrang ‘nao ‘lơ̆ng liĕm.

Ya Dũng tơbăt, kơ yuơ ƀôh hơdăh tơdrong jang chŭn ‘nhot kiơ̆ pơyan nhen sơ̆ ki kơ ŭnh hnam păng kon pơlei lơ̆m pơlei ưh kơ đei iŏk yua kơjăp kơna ‘nhŏng hlôi tơplih jang kiơ̆ choh jang sa hăm kmăi kmŏk hơgei. Gơnơm đơ̆ng noh, 4 sao chŭn ‘nhot jing ‘lơ̆ng kơ ŭnh hnam hlôi hơnhăk đei iŏk yua kơjăp, lơ̆m mĭnh pơyan iŏk đei hloh 100 triu hlak jên. Kiơ̆ đơ̆ng Ya Dũng, đơ̆ng đei iŏk yua ou kơna mă chă pơrô̆ hơvơn kon pơlei vang jang kiơ̆: “Kơdih ba hơdrin chă hŏk pơhrăm đơ̆ng lơ hơnih, ưh khan lăp tơ̆ ou mă oei tơ̆ tơring anai. Chă hŏk pơhrăm đe jang sa rei pơtăm ‘long pơtăm mă ou, mă to. Jĭ bơngai tang măt jơnŭm vei lăng kon pơlei kơna ba sa roi hơdrin hloh dơ̆ng lơ̆m trong jang sa hle vă hơnhăk đei iok yua kơjăp, dang ei ba tŏk bŏk jang kiơ̆ trong choh jang sa hle. Kơ yuơ kon pơlei vă atŭm dih băl tơ iung pơjing tơring pơlei pơla bơ̆n roi năr roi atŏk tơ iung hloh dơ̆ng”

Pơlei Labouye A, tơring Lạc Xuân, apŭng Đơn Dương, dêh char Lâm Đồng đei hloh 130 ŭnh hnam, lơ̆m đei hloh 70% ‘noh bơngai K’ho. Đơ̆ng trong jang sa iŏk yua kơjăp đơ̆ng Ya Dũng, kon pơlei lơ̆m pơlei hlôi hŏk pơhrăm păng jang kiơ̆. Truh dang ei 100% hơgăt teh jang sa kơ pơlei jei hlôi tơplih chă pơtăm ‘nhot sa, ƀum păng rim ‘long pơtăm anai. Jang sa đei iŏk yua kơjăp kơna lơ ŭnh hnam hlôi yak hloh dơnuh hin păng hơdrin tơ iung pơjing hơrih sa ‘nao.  

Ya Dũng tơbăt, truh dang ei, tring jang sa kơ kon pơlei lơ̆m pơlei Labouye A hlôi hlôh vao hloh pơtêng hăm sơ̆. Kon pơlei hlôi băt jang kiơ̆ khoa hŏk kih thuơ̆t pơjing đei tơmam drăm choh jang sa ‘lơ̆ng. Truh ou kơnh, Ya Dũng pơchoh trong ăn kon pơlei jang sa kiơ̆ kĭ pơkăp răt iŏk, iung jang hơdoi hăm rim hơnih mơdro sa, hơp tak xah vă sơđơ̆ng tĕch hlot tơmam drăm choh jang sa. “Hăm kơdih ba, truh ou kơnh gô hơlen păng vang mơ̆t lơ̆m Hơp tak xah vă sơđơ̆ng ăn tĕch mơdro tơmam drăm, đơ̆ng rŏng ‘noh chă pơrô̆ hơvơn lơ ŭnh hnam vang mơ̆t lơ̆m Hơp tak xah nhen ba. Đei Hơp tak xah bơih, đei vang iung jang sa hơdoi ‘noh rim bơngai jei gô đei atok tơ iung sơđơ̆ng hloh”.

Kiơ̆ đơ̆ng đảng viên Cruyang Cơi Long, sơ̆ jang Kơ iĕng Kơdră chĕp pơgơ̆r Hơnih Đảng tơring Lạc Xuân, apŭng Đơn Dương, dêh char Lâm Đồng, ưh khan pơm jŭk yŭk trong hơlou lơ̆m choh jang sa, Ya Dũng oei jing bơngai đei kon pơlei lui yom hloh păng ling lang pơm jŭk yuk trong hơlou lơ̆m rim tơdrong jang mă tơring tơlĕch ăn, mă kăl rim tơdrong jang tơgŭm djru dih ăl yak hloh dơnuh hin, vang kơrŭn tơ iung pơjing tơring tơrang ‘nao.“Kiơ̆ kơ ĭnh ƀôh Ya Dũng ‘noh jĭ minh ‘nu đảng viên ‘lơ̆ng, hơnơ̆ng yuk trong hơlou lơ̆m jang kiơ̆ păng chă pơrô̆ hơvơn kon pơlei vang iung jang rim tơdrong jang mă tơring tơlĕch ăn. Mă kăl, Ya Dũng tôch tơnăp hŏk pơhrăm păng jang kiơ̆ kmăi kmŏk ‘nao lơ̆m choh jang sa, đơ̆ng rŏng ‘noh chă pơrô̆ hơvơn kon pơlei vang jang kiơ̆ păng hơnhăk đei iŏk yua kơjăp, tơgop atŭm hăm tơring tơ iung pơjing pơlei pơla bơ̆n roi năr roi atŏk tơ iung hloh dơ̆ng”.

          Hăm dômn tơdrong iŏk đei, dôm sơnăm ou ki, Ya Dũng sơng iŏk đei lơ hla bơar pôk bơnê đơ̆ng Đảng ƀô̆, kơdră chĕp pơgơ̆r apŭng, dêh char păng jei hlôi đei sơng iŏk hla bơar pôk bơnê đơ̆ng Hơnih chĕp pơgơ̆r Tây Nguyên pôk ăn kơ yuơ bơ̆ jang ‘lơ̆ng lơ̆m tơdrong bơ̆ jang tơ iung pơjing pơlei pơla, koeng kơphô̆ sơđơ̆ng dơ̆ng kơjăp.